സ്വാതന്ത്ര്യാനന്തരം ഇന്ത്യ നേരിട്ട പ്രധാന വെല്ലുവിളികളിലൊന്ന് സമൂഹത്തിൽ ആഴത്തിൽ വേരൂന്നിയിരുന്ന അന്ധവിശ്വാസങ്ങളെയും യുക്തിരഹിതമായ വിശ്വാസങ്ങളെയും പിന്തിരിപ്പൻ സാമൂഹിക ചിന്തകളെയും മറികടക്കുക എന്നതായിരുന്നു.
ശാസ്ത്രവിദ്യാഭ്യാസത്തിന്‍റെ വ്യാപനം, സാങ്കേതികവിദ്യയുടെ വളർച്ച, ആധുനിക ഗവേഷണ സ്ഥാപനങ്ങളുടെ വികാസം എന്നിവ ജനങ്ങളിൽ യുക്തിചിന്തയും അന്വേഷണബുദ്ധിയും വളർത്തുന്നതിൽ നിർണായക പങ്കു വഹിച്ചു. പഴമയുടെ പേരിൽ നിലനിന്ന പല തെറ്റായ ധാരണകളെയും ചോദ്യംചെയ്യാനും തെളിവുകളുടെ അടിസ്ഥാനത്തിൽ കാര്യങ്ങളെ വിലയിരുത്താനും ശാസ്ത്രം സമൂഹത്തെ പ്രാപ്തമാക്കി.
എന്നാൽ, 2014 മുതൽ 2026 വരെയുള്ള കാലയളവിൽ പൊതുമണ്ഡലത്തിൽ അശാസ്ത്രീയമായ വാദങ്ങൾ വീണ്ടും ഉയർന്നുവരുന്നത് ആശങ്കാജനകമാണ്. അതിലേറെ ഗൗരവമുള്ളത്, ഇത്തരം ചില പ്രസ്താവനകൾ പ്രമുഖ ശാസ്ത്രസ്ഥാപനങ്ങളുമായി ബന്ധപ്പെട്ടവരിൽനിന്നും ഉന്നത സ്ഥാനങ്ങൾ വഹിക്കുന്ന വ്യക്തികളിൽനിന്നും ഉണ്ടായിയെന്നതാണ് ഞെട്ടിക്കുന്നത്. ശാസ്ത്രസാങ്കേതിക രംഗത്ത് ആഗോള നേതൃത്വം ലക്ഷ്യമിടുന്ന ഇന്ത്യയിൽ, പാരമ്പര്യത്തിന്‍റെയും പുരാതന വിജ്ഞാനത്തിന്‍റെയും പേരിൽ തെളിവുകളില്ലാത്ത വാദങ്ങൾ ഉയർത്തപ്പെടുന്നത് ശാസ്ത്രബോധത്തോടുള്ള നമ്മുടെ പ്രതിബദ്ധതയെക്കുറിച്ച് ഗൗരവമായ ചോദ്യങ്ങൾ ഉയർത്തുന്നു.
ചില നേർസാക്ഷ്യങ്ങൾ
2015 ജനുവരിയിൽ മുംബൈയിൽ നടന്ന 102-ാമത് ഇന്ത്യൻ സയൻസ് കോൺഗ്രസിൽ പുരാതന ഇന്ത്യയിലെ വിമാനസാങ്കേതികവിദ്യയെക്കുറിച്ച് അവതരിപ്പിക്കപ്പെട്ട വാദങ്ങൾ വലിയ വിവാദമായി. പുരാതന വിമാനങ്ങൾക്ക് വായുവിൽ നിശ്ചലമായി നിൽക്കാനും വിവിധ ദിശകളിലേക്ക് സഞ്ചരിക്കാനും ഗ്രഹാന്തര യാത്ര നടത്താനും കഴിയുമായിരുന്നുവെന്നായിരുന്നു ക്യാപ്റ്റൻ ആനന്ദ് ജെ. ബോഡസിന്‍റെ അവതരണത്തിലെ അവകാശവാദങ്ങൾ. ശാസ്ത്ര സാങ്കേതികവും എൻജിനിയറിംഗ് സംബന്ധവുമായ തെളിവുകളുടെ അഭാവത്തിൽ ശാസ്ത്രജ്ഞർ ഈ വാദങ്ങളെ വിമർശിച്ചു. പുരാണസങ്കൽപങ്ങളെയും ഊഹാപോഹങ്ങളെയും തെളിയിക്കപ്പെട്ട ശാസ്ത്രസത്യങ്ങളായി അവതരിപ്പിക്കുന്നതിലെ അപകടമാണ് ഈ സംഭവം തുറന്നുകാട്ടിയത്.
അതുപോലെതന്നെ 2017ൽ രാജസ്ഥാനിലെ അന്നത്തെ വിദ്യാഭ്യാസമന്ത്രി വാസുദേവ് ദേവ്നാനി പശു മാത്രമാണ് ഓക്സിജൻ ശ്വസിക്കുകയും പുറത്തുവിടുകയും ചെയ്യുന്ന ജീവിയെന്ന തരത്തിൽ പ്രസ്താവിച്ചതായി റിപ്പോർട്ടുകൾ പുറത്തുവന്നു. അടിസ്ഥാന ജീവശാസ്ത്രവുമായിപോലും പൊരുത്തപ്പെടാത്ത ഇത്തരം വാദങ്ങൾ പൊതുപ്രവർത്തകരിൽനിന്ന് ഉയരുന്നത് ശാസ്ത്രീയമായ അറിവിന്‍റെ പ്രാധാന്യത്തെക്കുറിച്ച് ആശങ്കയുണർത്തി.
2018ൽ കേന്ദ്രമന്ത്രി സത്യപാൽ സിംഗ് ചാൾസ് ഡാർവിന്‍റെ പരിണാമസിദ്ധാന്തത്തെ ചോദ്യം ചെയ്യുകയും അത് വിദ്യാഭ്യാസ പാഠ്യപദ്ധതിയിൽനിന്ന് നീക്കണമെന്ന് ആവശ്യപ്പെടുകയും ചെയ്തു. ജനിതകശാസ്ത്രം, ഫോസിൽ പഠനം, താരതമ്യ ശരീരഘടനാശാസ്ത്രം തുടങ്ങിയ മേഖലകളിൽനിന്നുള്ള വിപുലമായ തെളിവുകൾ പരിണാമസിദ്ധാന്തത്തെ പിന്തുണയ്ക്കുന്നുണ്ട്. അതേ വർഷം, വേദങ്ങളിലെ ശാസ്ത്രീയ അറിവ് ഐൻസ്റ്റീന്‍റെ സിദ്ധാന്തങ്ങളേക്കാൾ മികച്ചതാണെന്ന തരത്തിലുള്ള വാദം കേന്ദ്ര ശാസ്ത്രസാങ്കേതിക മന്ത്രി ഹർഷവർധൻ ഉന്നയിച്ചതായി റിപ്പോർട്ടുകളുണ്ടായി. പുരാതന ഇന്ത്യയിൽ ഇന്‍റർനെറ്റും ഉപഗ്രഹവിനിമയവും ഉണ്ടായിരുന്നുവെന്ന ത്രിപുര മുൻ മുഖ്യമന്ത്രി ബിപ്ലബ് കുമാർ ദേബിന്‍റെ പ്രസ്താവനയും വിവാദമായി, അതിലേറെ ചിരിയുണർത്തുന്ന ചർച്ചയായി.
2019ലെ ഇന്ത്യൻ സയൻസ് കോൺഗ്രസിലും പുരാണകഥകളെ ആധുനിക ശാസ്ത്രസാങ്കേതിക നേട്ടങ്ങളുമായി ബന്ധിപ്പിക്കുന്ന വാദങ്ങൾ വിമർശനത്തിനിടയാക്കി. കൗരവരുടെ ജനനം സ്റ്റെം സെൽ സാങ്കേതികവിദ്യയുടെയോ ടെസ്റ്റ് ട്യൂബ് സാങ്കേതികവിദ്യയുടെയോ തെളിവാണെന്നതുപോലുള്ള അവകാശവാദങ്ങൾ ശാസ്ത്രീയമായി സ്ഥാപിക്കപ്പെട്ട അറിവുകളല്ല. പുരാതന ഇന്ത്യയുടെ വിജ്ഞാനപാരമ്പര്യത്തെ പഠിക്കേണ്ടതിന്‍റെ ആവശ്യകതയും, എന്നാൽ തെളിവില്ലാത്ത വാദങ്ങളെ ശാസ്ത്രമായി അവതരിപ്പിക്കരുതെന്ന മുന്നറിയിപ്പും ഈ വിവാദങ്ങൾ ഒരേസമയം പൊതുസമൂഹത്തിൽ ഉയർത്തി.
2023ൽ എൻസിഇആർടി പാഠപുസ്തകങ്ങളിലുണ്ടായ മാറ്റങ്ങളും പരിണാമസിദ്ധാന്തവുമായി ബന്ധപ്പെട്ട ഉള്ളടക്കത്തിന്‍റെ കുറവും ശാസ്ത്രജ്ഞർക്കിടയിൽ ആശങ്ക സൃഷ്ടിച്ചു. അടിസ്ഥാന ശാസ്ത്രസങ്കൽപങ്ങൾ വിദ്യാർഥികൾക്ക് ലഭ്യമാകേണ്ടതിന്‍റെ പ്രാധാന്യം ഇതിലൂടെ വീണ്ടും ചർച്ചയായി.
അതേ വർഷം സെപ്റ്റംബറിൽ ഐഐടി മാണ്ഡിയുടെ ഡയറക‌്ടർ പ്രഫ. ലക്ഷ്മീധർ ബെഹ്റ ഹിമാചൽപ്രദേശിലെ ഉരുൾപൊട്ടലുകളെയും മേഘവിസ്ഫോടനങ്ങളെയും മാംസാഹാരവുമായി ബന്ധപ്പെട്ട മൃഗങ്ങളോടുള്ള ക്രൂരതയുമായി ബന്ധപ്പെടുത്തി പ്രസ്താവന നടത്തിയതായി റിപ്പോർട്ടുകൾ പുറത്തുവന്നു. അതിന്‍റെ പേരിൽ വിദ്യാർഥികൾ മാംസാഹാരം ഉപേക്ഷിക്കണമെന്നും അദ്ദേഹം ആഹ്വാനം ചെയ്തതായി റിപ്പോർട്ടുകളുണ്ടായി. എന്നാൽ, ഉരുൾപൊട്ടലുകളും മേഘവിസ്ഫോടനങ്ങളും തീവ്രമഴ, ഭൂമിശാസ്ത്രപരമായ ഘടന, ചരിവുകളുടെ അസ്ഥിരത, ഭൂവിനിയോഗത്തിലെ മാറ്റങ്ങൾ തുടങ്ങിയ ഘടകങ്ങളുമായി ബന്ധപ്പെട്ട സങ്കീർണ പ്രതിഭാസങ്ങളാണ്. മാംസാഹാരം ഇത്തരം ദുരന്തങ്ങൾക്ക് നേരിട്ട് കാരണമാകുന്നു എന്നതിന് അംഗീകൃത ശാസ്ത്രീയ തെളിവുകളില്ല. പ്രമുഖ സാങ്കേതികവിദ്യാ സ്ഥാപനത്തിന്‍റെ മേധാവിയിൽനിന്ന് ഇത്തരമൊരു പ്രസ്താവനയുണ്ടായത് ശാസ്ത്രീയ വിശദീകരണങ്ങൾക്കു പകരം തെളിവില്ലാത്ത വ്യാഖ്യാനങ്ങൾ അവതരിപ്പിക്കുന്നതിന്‍റെ അപകടം ചൂണ്ടിക്കാട്ടി.
2025ലും പുരാതന ഇന്ത്യയിൽ ആധുനിക സാങ്കേതികവിദ്യകൾ ഉണ്ടായിരുന്നുവെന്ന തരത്തിലുള്ള അവകാശവാദങ്ങൾ വീണ്ടും ചർച്ചയായി. സാംസ്കാരികവും പുരാണപരവുമായ വിവരണങ്ങളെ ചരിത്രപരമായി തെളിയിക്കപ്പെട്ട വസ്തുതകളിൽനിന്ന് വേർതിരിച്ചറിയേണ്ടതിന്‍റെ ആവശ്യകത ഇത്തരം സംഭവങ്ങൾ ഓർമിപ്പിക്കുന്നു.
2026ൽ മദ്രാസ് ഐഐടി ഡയറക‌്ടർ വി. കാമകോടി ഗോമൂത്രത്തിന്‍റെ ഔഷധപ്രയോഗങ്ങളെക്കുറിച്ച് നടത്തിയ പരാമർശങ്ങളും ചർച്ചകൾക്കിടയാക്കി. പാരമ്പര്യ ചികിത്സാരീതികളുടെ പ്രയോജനങ്ങളെക്കുറിച്ചുള്ള അവകാശവാദങ്ങൾ ശാസ്ത്രീയ ഗവേഷണങ്ങളുടെയും ക്ലിനിക്കൽ പഠനങ്ങളുടെയും അടിസ്ഥാനത്തിൽ പരിശോധിക്കണം. പാരമ്പര്യത്തിന്‍റെ പേരിൽ ഒരു ചികിത്സാരീതിയെ അന്ധമായി അംഗീകരിക്കുന്നതും അതിനെ മുൻവിധിയോടെ തള്ളിക്കളയുന്നതും ശാസ്ത്രീയ സമീപനമല്ല.
ഈ സംഭവങ്ങളെല്ലാം ഒരേ സ്വഭാവത്തിലുള്ളവയല്ല. ചിലത് സ്ഥാപിത-പ്രഖ്യാപിത ശാസ്ത്രവിജ്ഞാനത്തിന് വിരുദ്ധമായ പ്രസ്താവനകളാണ്; മറ്റു ചിലത് ചരിത്രവ്യാഖ്യാനങ്ങളെയും പാഠ്യപദ്ധതി പരിഷ്കരണങ്ങളെയും പാരമ്പര്യവിജ്ഞാനത്തെയും സംബന്ധിച്ച തർക്കങ്ങളാണ്. എങ്കിലും അവയെല്ലാം ഉയർത്തുന്ന അടിസ്ഥാനചോദ്യം ഒന്നുതന്നെയാണ്: ഒരു വാദം ഉന്നയിക്കുന്ന വ്യക്തിയുടെ പദവിയോ സ്ഥാപനത്തിന്‍റെ പ്രശസ്തിയോ അല്ല, അതിനെ പിന്തുണയ്ക്കുന്ന തെളിവുകളാണ് അതിന്‍റെ ശാസ്ത്രീയ സാധുത നിർണയിക്കേണ്ടത്.
കേരളത്തിലും
ഉയർന്ന സാക്ഷരതയും ആരോഗ്യരംഗത്തെ മികച്ച നേട്ടങ്ങളും അവകാശപ്പെടുന്ന കേരളത്തിലും ശാസ്ത്രബോധത്തിന് വെല്ലുവിളിയുയർത്തുന്ന പ്രവണതകൾ നിലനിൽക്കുന്നുണ്ട്. പാരമ്പര്യചികിത്സകരായ വൈദ്യന്മാരും വിവിധ നാട്ടുചികിത്സാരീതികളും കേരളത്തിന്‍റെ ആരോഗ്യപാരമ്പര്യത്തിന്‍റെ ഭാഗമാണ്. എന്നാൽ, ശാസ്ത്രീയമായി തെളിയിക്കപ്പെടാത്ത ചികിത്സാവാദങ്ങൾ പ്രചരിപ്പിക്കുകയും ആധുനിക വൈദ്യശാസ്ത്രത്തെ പൂർണമായി ഉപേക്ഷിക്കാൻ ആളുകളെ പ്രേരിപ്പിക്കുകയും ചെയ്യുമ്പോൾ അത് ഗുരുതരമായ ആരോഗ്യപ്രശ്നങ്ങൾക്ക് വഴിവയ്ക്കുന്നു.
പ്രമേഹത്തിന് മരുന്നുകളും ഇൻസുലിനും ആവശ്യമില്ലെന്നും ചില പ്രത്യേക ഭക്ഷണങ്ങളോ പഞ്ചസാര ചേർത്ത ഉത്പന്നങ്ങളോ ഉപയോഗിച്ച് രോഗം നിയന്ത്രിക്കാമെന്നും അവകാശപ്പെടുന്ന പ്രചാരണങ്ങൾ സമൂഹമാധ്യമങ്ങളിൽ വ്യാപകമാണ്. ഇതിനു സമാനമായി, ചില ഔഷധസസ്യങ്ങൾ ഉപയോഗിച്ച് രക്തസമ്മർദവും കൊളസ്ട്രോളും പൂർണമായി മാറ്റാമെന്നും ആധുനിക മരുന്നുകൾ ഉപേക്ഷിക്കാമെന്നും അവകാശപ്പെടുന്ന പരസ്യങ്ങളും പ്രചരിക്കുന്നു. ഇത്തരം അവകാശവാദങ്ങൾ വിശ്വസിച്ച് ഡോക‌്ടർമാർ നിർദേശിച്ച ചികിത്സ നിർത്തുന്നത് രോഗാവസ്ഥ വഷളാകുന്നതിനും ഗുരുതരമായ സങ്കീർണതകൾക്കും കാരണമായേക്കാം. പ്രമേഹം, രക്തസമ്മർദം, കൊളസ്ട്രോൾ തുടങ്ങിയ രോഗങ്ങളുടെ ചികിത്സ ശാസ്ത്രീയ തെളിവുകളുടെയും രോഗിയുടെ ആരോഗ്യനിലയുടെയും അടിസ്ഥാനത്തിലായിരിക്കണം.
ഈ പ്രവണതകളെ ചോദ്യംചെയ്യുന്ന അനുഭവങ്ങളും കേരളത്തിന്‍റെ പൊതുമണ്ഡലത്തിലുണ്ട്. അന്തരിച്ച നടൻ ഇന്നസെന്‍റും നടൻ സലിംകുമാറും തങ്ങളുടെ വ്യക്തിപരമായ അനുഭവങ്ങളുടെ പശ്ചാത്തലത്തിൽ ആധുനിക വൈദ്യശാസ്ത്രത്തിന്‍റെ പ്രാധാന്യത്തെക്കുറിച്ച് സംസാരിച്ചിട്ടുണ്ട്. പ്രത്യേകിച്ച്, ചികിത്സാരംഗത്തെ തെറ്റായ അവകാശവാദങ്ങളിൽ വിശ്വസിച്ചതിലൂടെ നേരിടേണ്ടിവന്ന ബുദ്ധിമുട്ടുകളെക്കുറിച്ച് സലിംകുമാർ തുറന്നുപറഞ്ഞിട്ടുണ്ട്. ‘കാൻസർ വാർഡിലെ ചിരി’ എന്ന പുസ്തകത്തിലൂടെ ഇന്നസെന്‍റ് പല അശാസ്ത്രീയ രീതികളും തുറന്നുകാട്ടിയിട്ടുണ്ട്.വ്യക്തിപരമായ അനുഭവങ്ങൾ മാത്രം ശാസ്ത്രീയ തെളിവിന് പകരമാകില്ലെങ്കിലും, ചികിത്സ തെരഞ്ഞെടുക്കുമ്പോൾ വ്യാജവാഗ്ദാനങ്ങളേക്കാൾ വൈദ്യശാസ്ത്രപരമായ തെളിവുകൾക്കു പ്രാധാന്യം നൽകണമെന്ന സന്ദേശം ഇത്തരം അനുഭവങ്ങൾ മുന്നോട്ടുവയ്ക്കുന്നു.
മലയാള സിനിമയും ശാസ്ത്രബോധവുമായി ബന്ധപ്പെട്ട ഇത്തരം ചർച്ചകളിൽ ചിലപ്പോൾ ഇടപെട്ടിട്ടുണ്ട്. ‘സദാനന്ദന്‍റെ സമയം’, ‘ട്രാൻസ്’ തുടങ്ങിയ സിനിമകൾ അന്ധവിശ്വാസങ്ങളെയും മതപരമായ ചൂഷണങ്ങളെയും യുക്തിരഹിതമായ വിശ്വാസങ്ങളെയും വിമർശനാത്മകമായി സമീപിക്കുന്നവയാണ്. അതേസമയം, ‘അയാളും ഞാനും തമ്മിൽ’ ആധുനിക വൈദ്യശാസ്ത്രത്തിന്‍റെയും ശസ്ത്രക്രിയയുടെയും പ്രാധാന്യം അടിവരയിടുന്ന സിനിമയായി വായിക്കാം. രോഗചികിത്സയിൽ വിശ്വാസങ്ങളേക്കാൾ വൈദ്യശാസ്ത്രപരമായ അറിവിനും തെളിവുകൾക്കും പ്രാധാന്യം നൽകേണ്ടതിന്‍റെ ആവശ്യകത ഈ സിനിമ ചർച്ച ചെയ്യുന്നു.
പാരമ്പര്യചികിത്സയെ മുഴുവനായി തള്ളിക്കളയുകയോ ആധുനിക വൈദ്യശാസ്ത്രത്തെ ചോദ്യം ചെയ്യാൻ പാടില്ലെന്ന നിലപാട് സ്വീകരിക്കുകയോ അല്ല ശാസ്ത്രീയ സമീപനം. മറിച്ച്, ഏതു ചികിത്സാരീതിയുടെയും ഫലപ്രാപ്തിയും സുരക്ഷിതത്വവും തെളിവുകളുടെ അടിസ്ഥാനത്തിൽ പരിശോധിക്കുകയാണു വേണ്ടത്. രോഗശാന്തിയുടെ വാഗ്ദാനമല്ല, ചികിത്സയുടെ ശാസ്ത്രീയ സാധുതയാണ് വിശ്വാസത്തിന്‍റെ അടിസ്ഥാനം. വ്യാജചികിത്സാ പ്രചാരണങ്ങളെ തിരിച്ചറിയാനും ആരോഗ്യകാര്യങ്ങളിൽ തെളിവുകളുടെ അടിസ്ഥാനത്തിൽ തീരുമാനങ്ങളെടുക്കാനും ജനങ്ങളെ പ്രാപ്തരാക്കുന്ന ശാസ്ത്രബോധമാണ് കേരളത്തിന് ഇന്ന് കൂടുതൽ ആവശ്യമായിരിക്കുന്നത്.
Deepika
Corehub Solutions
E-paper LOGIN
LOGIN
