14

തിരുവനന്തപുരം: പ്രതിപക്ഷ ഉപനേതൃപദവി സംബന്ധിച്ച് എൽഡിഎഫ് കൺവീനറും സിപിഐ സംസ്ഥാന സെക്രട്ടറിയും തമ്മിൽ നടത്തിയ ചർച്ചയിൽ അന്തിമ തീരുമാനമായില്ല. എൽഡിഎഫ് കൺവീനർ ടി.പി. രാമകൃഷ്ണൻ ഇന്ന് സിപിഐ ആസ്ഥാനമായ എംഎൻ സ്മാരകത്തിലെത്തി സംസ്ഥാന സെക്രട്ടറി ബിനോയ് വിശ്വവുമായി ചർച്ച നടത്തിയിരുന്നു.

ചർച്ചയ്ക്ക് ശേഷം പുറത്തിറങ്ങിയ എൽഡിഎഫ് കൺവീനർ ഈ വിഷയത്തിൽ എൽഡിഎഫിൽ ഭിന്നത ഇല്ലെന്ന് വ്യക്തമാക്കി. കമ്മ്യൂണിസ്റ്റ് പാർട്ടികൾക്ക് ഒരേ നയം ആണെന്നും ബിനോയ് വിശ്വവും മാധ്യമപ്രവർത്തകരോട് പറഞ്ഞു.

എൽഡിഎഫ് കരുത്തോടെ മുന്നോട്ടുപോകുമെന്ന് ടി.പി. രാമകൃഷ്ണൻ വ്യക്തമാക്കി. ചർച്ചയിലെ കൂടുതൽ വിവരങ്ങൾ പുറത്തുപറയാനാകില്ലെന്ന് അദ്ദേഹം പറഞ്ഞു. അതേസമയം വിഷയത്തിൽ ഉടൻ പരിഹാരമാകുമെന്ന് ബിനോയ് വിശ്വം പ്രതികരിച്ചു.

നിയമസഭയിലെ പ്രതിപക്ഷ ഉപ നേതൃസ്ഥാനത്തേക്ക് സിപിഐയിലെ കെ.രാജനെ പരിഗണിക്കണമെന്നാണ് സിപിഐ ആവശ്യപ്പെട്ടത്. എന്നാൽ ഈ നിർദ്ദേശം സിപിഎം അവഗണിക്കുകയും കെ.എൻ. ബാലഗോപാലിനെ പരിഗണിക്കുകയുമായിരുന്നു. പ്രതിപക്ഷ ഉപനേതൃസ്ഥാനം തങ്ങൾക്ക് കിട്ടിയില്ലെങ്കിൽ കടുത്ത നടപടിയിലേക്ക് പോകുമെന്ന് സിപിഐ നേതൃത്വം സിപിഎമ്മിന് അന്ത്യശാസനം നൽകിയിരുന്നു.

ഈ പശ്ചാത്തലത്തിലാണ് എൽഡിഎഫ് കൺവീനർ ടി.പി. രാമകൃഷ്ണൻ ഇന്ന് സിപിഐ ആസ്ഥാനമായ എം.എൻ. സ്മാരകത്തിലെത്തി ബിനോയ് വിശ്വവുമായി ചർച്ച നടത്തിയത്.