തളിപ്പറമ്പ്: ചെറുപുഷ്പ മിഷൻലീഗ്, തിരുബാലസഖ്യം എന്നിവയുടെ തലശേരി അതിരൂപതാതല പ്രവർത്തനവർഷം തളിപ്പറമ്പ് സെന്റ് മേരീസ് ഫൊറോന പള്ളിയിൽ അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി ഉദ്ഘാടനം ചെയ്തു. അതിരൂപത പ്രസിഡന്റ് സുനിൽ ചെന്നിക്കര അധ്യക്ഷത വഹിച്ചു. ചെറുപുഷ്പ മിഷൻ ലീഗ് സംസ്ഥാന ഡയറക്ടർ ഫാ. ഷിനോജ് പുന്നയ്ക്കൽ മുഖ്യപ്രഭാഷണം നടത്തി.
കുട്ടികളിൽ പ്രകൃതിയോടും കൃഷിയോടുമുള്ള ആഭിമുഖ്യം വളർത്തിയെടുക്കുന്നതിന് ലക്ഷ്യംവച്ചുള്ള മിഷൻ പച്ചക്കറിത്തോട്ടത്തിന്റെ ഉദ്ഘാടനം തളിപ്പറമ്പ് ഫൊറോന വികാരി ഫാ. മാത്യു ആശാരിപറമ്പിൽ നിർവഹിച്ചു. സ്തുത്യർഹമായ സേവനത്തിനുശേഷം സ്ഥലം മാറിപ്പോകുന്ന വൈസ് ഡയറക്ടർ സിസ്റ്റർ ട്രീസ ജോയിക്ക് യാത്രയയപ്പും പുതുതായി നിയമിതയായ സിസ്റ്റർ ജോസ്ന കെ. ജോയ് എഫ്സിസി ക്ക് സ്വീകരണവും നൽകി. വിശ്വാസ പരിശീലനം അതിരൂപതാതല ഒന്നാംറാങ്ക്, എസ്എസ്എൽസി ഫുൾ എപ്ലസ് നേടിയവർ, കയ്യെഴുത്തു മാസിക വിജയികൾ, 2025- 26 മിഷൻ പച്ചക്കറിത്തോട്ട വിജയികൾ എന്നിവർക്കുള്ള സമ്മാനങ്ങളും വിതരണം ചെയ്തു.
സംസ്ഥാന ജനറൽ സെക്രട്ടറി ജയ്സൺ പുളിച്ചുമാക്കൽ, തളിപ്പറമ്പ് മേഖല ഡയറക്ടർ ഫാ. മാത്യു നരിക്കുഴി, മണിക്കടവ് മേഖലാ പ്രസിഡന്റ് എഡ്വിൻ തെക്കേമുറി, എടൂർ മേഖലാ വൈസ് ഡയറക്ടർ സിസ്റ്റർ ആൻ മരിയ സിഎംസി, അതിരൂപത ജൂണിയർ ഓർഗനൈസർ അഗത മേരി ജോൺ, ജനറൽ സെക്രട്ടറി മനോജ് മുടവനാട്ട്, ഓർഗനൈസർ ഷിജോ സ്രായിൽ എന്നിവർ പ്രസംഗിച്ചു. അതിരൂപത ഡയറക്ടർ ഫാ. ജിതിൻ വയലുങ്കൽ സ്വാഗതം പറഞ്ഞു.