ബലഹീനരെ ബലവാന്മാര് ഞെരിച്ചമര്ത്തും... പക്ഷേ, ഒന്നോര്ക്കുക, ആ ബലഹീനരുടെയും ലോകമാണ് നിങ്ങള്ക്കു ബലം നല്കുന്നത്, അല്ലെങ്കില് നല്കിയത്.
അവര് ഇല്ലായിരുന്നെങ്കില് ഒരുപക്ഷേ, നിങ്ങള്ക്ക് ആഘോഷങ്ങള് ഉണ്ടാകുമായിരുന്നില്ല. അവരെ നിഷ്പ്രഭമാക്കിയുള്ള ആഹ്ലാദങ്ങളും ആരവങ്ങളും ഗാലറിയെ ഇളക്കിമറിച്ചേക്കും... പക്ഷേ, ഒന്നോര്ക്കുക ബലഹീനരുടെയും അല്ലെങ്കില് കുഞ്ഞന്മാരുടെയും ലോകമാണിത്...
നെതര്ലന്ഡ്സ് എന്ന കരുത്തനു മുന്നില് ജപ്പാന്, സ്പാനിഷ് അര്മഡയ്ക്കു മുന്നില് കേപ് വെര്ദെ, ബ്രസീലിനു മുന്നില് മൊറോക്കോ... 2026 ഫിഫ ലോകകപ്പില് എതിരാളിയുടെ തലപ്പൊക്കത്തില് പതറാതിരുന്നവര്. ഇതില് ഏറ്റവും ശ്രദ്ധേയം നെതര്ലന്ഡ്സിനെതിരേ ജപ്പാന്റെയും സ്പെയിനിന് എതിരേ കേപ് വെര്ദെയുടെയും ഗോളിമാര് നടത്തിയ മിന്നും പ്രകടനങ്ങളാണ്. ഒരു ഗോള് കീപ്പര് എന്ന നിലയില് ജാപ്പനീസ് ഗോളി സീയോന് സുസുക്കിയുടെയും കേപ് വെര്ദെ ഗോളി വൊസീഞ്ഞയുടെയും സേവുകള് എനിക്കു രോമാഞ്ചജനകമാണ്.
നെതര്ലന്ഡ്സിന് എതിരേ സീയോന് സുസുക്കി നാല് സേവുകള് നടത്തിയപ്പോള്, ജപ്പാന് 2-2 സമനില സ്വന്തമാക്കി. ഈ ലോകകപ്പില് ഇതുവരെയുള്ള ഏറ്റവും ഹീറോയിസമായിരുന്നു സ്പെയിനിന് എതിരേ വൊസീഞ്ഞയുടേത്. ഏഴ് സേവുകള് സ്പെയിനിന് എതിരേ ഈ കേപ് വെര്ദെ ഗോള് കീപ്പര് നടത്തി.
കുഞ്ഞന്മാര്, ബലഹീനര് എന്നെല്ലാം വിശേഷണങ്ങളുള്ള കേപ് വെര്ദെയും കുറസാവോയും തങ്ങളുടേതായ ചരിത്രം രേഖപ്പെടുത്തിക്കഴിഞ്ഞു. ജര്മനിപോലുള്ള ഒരു വമ്പന്റെ വല രണ്ടു തവണ (ഒരു തവണ ഓഫ് സൈഡ്) കുറസാവോ താരങ്ങള് കുലുക്കി എന്നതാണ് ഫിഫ ലോകകപ്പിന്റെ സൗന്ദര്യം...