ഇരിട്ടി: തകർന്ന മാക്കൂട്ടം ചുരം പാതയിൽ അപകടങ്ങളും ഗതാഗതകുരുക്കും പതിവാകുന്നു. ഇന്നലെ പുലർച്ചെ ചരക്കുലോറി മറിഞ്ഞതിനെ തുടർന്ന് അഞ്ചു മണിക്കൂറോളം ചുരം പാതയിലൂടെയുള്ള ഗതാഗതം സ്തംഭിച്ചു.
മെതിയടിപ്പാറ ഹനുമാൻ സ്വാമി ക്ഷേത്രത്തിനു സമീപം കൂട്ടുപുഴ ഭാഗത്തു നിന്നു വീരാജ്പേട്ടയിലേക്ക് പോകുകയായിരുന്ന ലോറി മറിയുകയായിരുന്നു. കയറ്റം കയറുന്നതിനിടെ റോഡിലെ വളവിലുള്ള കുഴിയിൽപ്പെട്ടാണ് ലോറി മറിഞ്ഞത്. അപകടത്തെ തുടർന്ന് വലിയ വാഹനങ്ങൾക്ക് കടന്നുപോകാനാകാതെ ഗതാഗതം പൂർണമായും തടസപ്പെട്ടു.
ഇരിട്ടി, കണ്ണൂർ, തലശേരി ഭാഗങ്ങളിലേക്ക് പോകേണ്ട നിരവധി ടൂറിസ്റ്റ് ബസുകളും മറ്റു വാഹനങ്ങളും വനത്തിനുള്ളിൽ കുടുങ്ങി. സ്ത്രീകളും കുട്ടികളും പ്രായമായവരുമടക്കം നൂറുകണക്കിന് യാത്രക്കാർ വെള്ളവും പ്രാഥമിക സൗകര്യങ്ങളുമില്ലാതെ മണിക്കൂറുകളോളം ചുരത്തിൽ കഴിച്ചുകൂട്ടുകയായിരുന്നു. ചുരത്തിൽ മൊബൈൽ നെറ്റ്വർക്ക് ലഭ്യമല്ലാത്തതും പുറംലോകവുമായി ബന്ധപ്പെടുന്നതിനും തടസമായി.
വിമാനത്തിലും ട്രെയിനിലും യാത്ര ചെയ്യേണ്ടവരടക്കം കുരുക്കിൽപ്പെട്ടവരിലുണ്ടായിരുന്നു. കേരളത്തിലേക്ക് കർണാടകയിൽ നിന്ന് എത്തിക്കുന്ന പച്ചക്കറി, പാൽ, പഴവർഗങ്ങൾ എന്നിവയടങ്ങിയ ചരക്കുവാഹനങ്ങളും കുരുക്കിൽപ്പെട്ടു. ഗതാഗതക്കുരുക്ക് ഒഴിവാക്കാൻ പെരുമ്പാടിയിലും മാക്കൂട്ടത്തും പൊലിസ് വാഹനനിയന്ത്രണം ഏർപ്പെടുത്തി.
തകർച്ചയിൽ മാക്കൂട്ടം ചുരം
മാക്കൂട്ടം ചുരം പാതയിലെ റോഡിന്റെ ശോച്യാവസ്ഥയാണ് അപകടങ്ങൾ ആവർത്തിക്കാൻ പ്രധാന കാരണം. പെരുമ്പാടിയിൽനിന്ന് കേരള അതിർത്തിവരെയുള്ള 5.9 കിലോമീറ്റർ റോഡ് 11.75 കോടി രൂപ ചെലവിൽ മൂന്ന് റീച്ചുകളിലായി അടുത്തിടെയാണ് നവീകരിച്ചത്. എന്നാൽ, മഴ ശക്തമായതോടെ ഇതിൽ ഏകദേശം 1.1 കിലോമീറ്റർ ഭാഗത്തെ ടാറിംഗ് പൂർണമായും തകർന്നു. മെതിയടി
പ്പാറ ഹനുമാൻ ക്ഷേത്രത്തിനു സമീപമാണ് റോഡ് ഏറ്റവും അപകടാവസ്ഥയിലുള്ളത്. വലിയ കുഴികൾ രൂപപ്പെട്ടതോടെ വാഹനങ്ങൾക്ക് കടന്നുപോകാൻപോലും പ്രയാസമാണ്. നവീകരിച്ച ഭാഗങ്ങളിൽ റോഡരികുകൾ കോൺക്രീറ്റ് ചെയ്യാത്തതിനാൽ ടാറിംഗിൽ നിന്ന് പുറത്തേക്ക് മാറുന്ന വാഹനങ്ങളുടെ ചക്രങ്ങൾ താഴുന്നതും അപകടഭീഷണി ഉയർത്തുന്നു. നവീകരണം നടത്താത്ത 5.8 കിലോമീറ്റർ ഭാഗത്തും തകർച്ച രൂക്ഷമാണ്.
പെരുമ്പാടി-ബിട്ടംകാല റോഡിലെ നവീകരണം നടക്കാത്ത ഭാഗങ്ങളടക്കം 14 കിലോമീറ്റർ പാത 40 കോടി രൂപ ചെലവിൽ നവീകരിക്കാനുള്ള ശിപാർശ കർണാടക സർക്കാരിന്റെ പരിഗണനയിലാണ്. എന്നാൽ, തുടർനടപടികൾ വൈകുകയാണ്.
നവീകരിച്ച ഭാഗത്തെ തകർച്ച അടിയന്തരമായി പരിഹരിക്കുകയും ശേഷിക്കുന്ന റോഡ് ഗതാഗതയോഗ്യമാക്കുകയും വേണമെന്നാണ് യാത്രക്കാരുടെയും ഡ്രൈവർമാരുടെയും ആവശ്യം. അപകടങ്ങളും വാഹനത്തകരാറുകളും ഗതാഗതസ്തംഭനവും പതിവാകുന്ന സാഹചര്യത്തിൽ പാതയുടെ സമഗ്ര പുനർനിർമാണം അനിവാര്യമായിരിക്കുകയാണ്.