മണിമല: മണിമല ഹോളി മാഗി ഫൊറോന പള്ളിയുടെ നേതൃത്വത്തിൽ മണിമല, വെള്ളാവൂർ,കോട്ടാങ്ങൽ പഞ്ചായത്തുകളിലെ ജനപ്രതിനിധികളെ പൊന്നാട അണിയിച്ച് ആദരിച്ചു. 2025ലെ വിജയികളായ ജനപ്രതിനിധികൾ കക്ഷി രാഷ്ട്രീയ ഭേദമന്യേ മണിമല ഫൊറോനാപള്ളി ഒരുക്കിയ സ്വീകരണത്തിന് എത്തിച്ചേരുകയായിരുന്നു. മണിമലയുടെ ചരിത്രത്തിൽ ആദ്യമായാണ് ഇത്തരമൊരു സ്വീകരണം ജനപ്രതിനിധികൾക്ക് ഒരുക്കുന്നത്.
ഫൊറോനയിലെ മണിമല, വെള്ളാവൂർ, കോട്ടാങ്ങൽ പഞ്ചായത്തുകളിലെ ഇടവക വൈദികരും സംഘടനാ പ്രതിനിധികളും, പാരിഷ് കൗൺസിൽ അംഗങ്ങളും സംയുക്തമായാണ് ജനപ്രതിനിധികളുടെ കൂടിക്കാഴ്ച സംഘടിപ്പിച്ചത്.
ഫൊറോന വികാരി ഫാ. എബ്രഹാം തയ്യിൽ നെടുംപറമ്പിൽ അധ്യക്ഷതവഹിച്ച യോഗത്തിൽ കരിമ്പനക്കുളം ഇടവക വികാരി ഫാ. ജെയിംസ് കുന്നിൽ, ചുങ്കപ്പാറ ഇടവക വികാരി ഫാ. ടോണി മണിയൻചിറ, മണിമല ഇൻഫന്റ് ജീസസ് ഹോസ്പിറ്റൽ ഡയറക്ടർ ഫാ. ജോസ് പുത്തൻചിറ, അസിസ്റ്റന്റ് വികാരി ഫാ. ബിനു ചിറയിൽ, ഇടവക പ്രതിനിധി ജോസ് സി. വർഗീസ് ചെമ്മരപ്പള്ളി, പാരിഷ് കൗൺസിൽ സെക്രട്ടറി ബെന്നി തോമസ് എന്നിവർ പ്രസംഗിച്ചു. ജനപ്രതിനിധികളായ അജിത്ത് മുതിരമല, തോമസ് കുന്നപ്പള്ളി, ആശ ജോയി, സതീഷ് ബാബു തുടങ്ങിയവർ മറുപടി പ്രസംഗം നടത്തി.