നോവോസിബിർസ്ക്: റഷ്യൻ വ്യോമസേനയുടെ ടിയു-22എം3 ബോംബർ വിമാനം തകർന്നുവീണു. സൈബീരിയയിലെ ഇർകുത്സ്ക് മേഖലയിൽ തിങ്കളാഴ്ചയായിരുന്നു അപകടം.
പരിശീലന പറക്കലിനിടെയുണ്ടായ സാങ്കേതിക തകരാറാണ് അപകടത്തിന് കാരണമെന്ന് റഷ്യൻ പ്രതിരോധ മന്ത്രാലയം അറിയിച്ചു.
നിയന്ത്രണം നഷ്ടപ്പെട്ട വിമാനം കുത്തനെ താഴേക്ക് പതിക്കുകയായിരുന്നു. ഇതിനുപിന്നാലെ പ്രദേശത്ത് വലിയ തോതിൽ കറുത്ത പുക ഉയർന്നതായി ദൃക്സാക്ഷികൾ പറഞ്ഞു. ജനവാസമില്ലാത്ത മേഖലയിലാണ് വിമാനം തകർന്നുവീണത്.
അപകടസമയത്ത് വിമാനത്തിലുണ്ടായിരുന്ന നാല് ക്രൂ അംഗങ്ങളും സുരക്ഷിതമായി പുറത്തേക്ക് ചാടി. ഇവർക്ക് കാര്യമായ പരിക്കുകളില്ലെന്നാണ് പ്രാഥമിക വിവരങ്ങൾ. സംഭവത്തിൽ റഷ്യൻ പ്രതിരോധ മന്ത്രാലയം അന്വേഷണം പ്രഖ്യാപിച്ചിട്ടുണ്ട്.