വത്തിക്കാൻ സിറ്റി: കത്തോലിക്കാസഭയിലെ ആദ്യ മില്ലേനിയൽ വിശുദ്ധനായ കാർലോ അക്കുത്തിസിനു പിന്നാലെ രണ്ട് കൗമാരക്കാർകൂടി വിശുദ്ധപദവിയിലേക്കുള്ള പാതയിലേക്ക് നടന്നടുക്കുന്നു. ഇറ്റലിയിൽനിന്നുള്ള ജൂലിയ ഗബ്രിയേലിയും അമേരിക്കയിൽനിന്നുള്ള മരിയ മിഡിൽടണുമാണ് ചുരുങ്ങിയ ജീവിതംകൊണ്ട് വിശുദ്ധിയുടെ സൗരഭ്യം പരത്തി വിശുദ്ധാരാമത്തിലേക്ക് നടന്നടുക്കുന്നത്.
അർബുദബാധയെത്തുടർന്ന് 14-ാം വയസിൽ മരിച്ച ജൂലിയ ഗബ്രിയേലിയെ ധന്യയായി പ്രഖ്യാപിക്കാൻ ലെയോ പതിനാലാമൻ മാർപാപ്പ ശനിയാഴ്ച അനുമതി നൽകി. 18-ാം വയസിൽ മരിച്ച മരിയ മിഡിൽടണിന്റെ നാമകരണത്തിനായി അമേരിക്കൻ മെത്രാൻ സമിതി കഴിഞ്ഞയാഴ്ച വത്തിക്കാനോട് ശിപാർശ ചെയ്യുകയും ചെയ്തു.
ജൂലിയ ഗബ്രിയേലി: രോഗത്തെ നേരിട്ട ധൈര്യം
1997 മാർച്ച് മൂന്നിന് വടക്കൻ ഇറ്റലിയിലെ ബെർഗാമോയിലാണ് ജൂലിയ ജനിച്ചത്. പത്താം വയസിൽ ‘അൽവിയോളാർ റാബ്ഡോമയോസാർക്കോമ’ എന്ന അപൂർവവും തീവ്രവുമായ അർബുദം സ്ഥിരീകരിച്ചു. രണ്ടുവർഷത്തെ ചികിത്സയ്ക്കിടെ നേരിട്ട വേദനകളെയും പ്രതിസന്ധികളെയും വിശ്വാസത്തോടെയും പ്രത്യാശയോടെയുമാണ് അവൾ നേരിട്ടത്.
പാദുവായിൽ റേഡിയോതെറാപ്പി ചികിത്സയിലിരിക്കെ വിശുദ്ധ അന്തോനീസിന്റെ കബറിടത്തിങ്കൽ പ്രാർഥിക്കുമ്പോൾ, അപരിചിതനായ ഒരാൾ നൽകിയ സ്നേഹപൂർണമായ പ്രതികരണം ജൂലിയയ്ക്കു വലിയ കരുത്തായി മാറി. രോഗം ഗുരുതരമായിരുന്ന ഘട്ടത്തിലും ആശുപത്രിയിലെ കുട്ടികൾക്കായുള്ള ‘സ്കൂൾ ഇൻ പൈജാമസ്’ സംരംഭത്തിലൂടെ സെക്കൻഡറി വിദ്യാഭ്യാസത്തിന്റെ ആദ്യഘട്ട പരീക്ഷ അവൾ വിജയിച്ചു. 2011 ഓഗസ്റ്റ് 19ന് 14-ാം വയസിൽ ജൂലിയ അന്തരിച്ചു. രോഗത്തോടുള്ള ധീരമായ സമീപനവും ആത്മീയപക്വതയുമാണ് ധന്യപദവിയിലേക്ക് അവളെ നയിച്ചത്. രോഗബാധിതരായ കുട്ടികളെയും കുടുംബങ്ങളെയും സഹായിക്കുന്ന ‘കോൺ ജൂലിയ’ എന്ന സംഘടന ജൂലിയയുടെ മാതാപിതാക്കൾ ഇപ്പോഴും നടത്തുന്നുണ്ട്.
മരിയ മിഡിൽടൺ: കരുണയുടെയും പ്രത്യാശയുടെയും മാതൃക
2002 സെപ്റ്റംബർ 10ന് ജനിച്ച മരിയ, സ്പോർട്സും ഐറിഷ് നൃത്തവും സംഗീതവും ഇഷ്ടപ്പെട്ടിരുന്ന സാധാരണ കൗമാരക്കാരിയായിരുന്നു. ചെറുപ്പം മുതലേ ദൈവവിശ്വാസവും പരിശുദ്ധ കന്യകാമറിയത്തോടുള്ള ഭക്തിയും അവളുടെ ജീവിതത്തിന്റെ ഭാഗമായിരുന്നു. മൂന്നാം വയസ് മുതൽ അമ്മ സൂസനൊപ്പം ദിവ്യകാരുണ്യ ആരാധനയിൽ പങ്കെടുത്തിരുന്ന മരിയ, പതിനൊന്നാം വയസിൽ ഡയറിയിൽ കുറിച്ച ആദ്യ വാചകം ‘ദൈവം കരുണയുള്ളവനാണ്’ എന്നായിരുന്നു.
ഹൈസ്കൂൾ പഠനകാലത്ത് ജീവകാരുണ്യ പ്രവർത്തനങ്ങൾക്കു നേതൃത്വം നൽകിയ മരിയ, അർബുദബാധിതരായ കുട്ടികൾക്കായി സ്കൂളിൽ സംഘടിപ്പിച്ചിരുന്ന നൃത്തപരിപാടിയുടെ സഹ അധ്യക്ഷയായിരുന്നു. മരിയയുടെ സ്മരണാർഥം ഈ പരിപാടി ഇപ്പോഴും തുടരുന്നു.
2019 ജനുവരിയിൽ, 16-ാം വയസിൽ മരിയയ്ക്ക് ശസ്ത്രക്രിയയിലൂടെ നീക്കം ചെയ്യാനാകാത്ത മസ്തിഷ്ക മുഴ കണ്ടെത്തി. ഒമ്പത് മുതൽ 12 മാസം വരെയാണ് ഡോക്ടർമാർ ആയുസ് വിധിച്ചത്. എങ്കിലും പ്രത്യാശ കൈവിടാതെ, ദൈവഹിതത്തിനു കീഴടങ്ങി അവൾ ജീവകാരുണ്യ പ്രവർത്തനങ്ങൾ തുടർന്നു. രോഗനിർണയത്തിന് ഒമ്പത് മാസത്തിനുശേഷം മാതാപിതാക്കൾക്കൊപ്പം ഉഗാണ്ട സന്ദർശിച്ചപ്പോൾ ‘മേ എ വിഷ്’ ഫൗണ്ടേഷനിലൂടെ ലഭിച്ച ആനുകൂല്യം സ്വന്തം ആവശ്യങ്ങൾക്കുപകരം അവിടത്തെ ഒരു പാവപ്പെട്ട കുടുംബത്തെയും സ്കൂളിനെയും സഹായിക്കാനാണു മരിയ വിനിയോഗിച്ചത്.
2020ൽ കോവിഡ് നിയന്ത്രണങ്ങൾക്കിടെ പൊതു വിശുദ്ധ കുർബാന നിർത്തിവച്ചപ്പോൾ ദിവ്യകാരുണ്യം സ്വീകരിക്കാനുള്ള ആഗ്രഹം വ്യക്തമാക്കി മരിയ ഫിലാഡെൽഫിയ ആർച്ച്ബിഷപ് നെൽസൺ പെരസിന് കത്തെഴുതി. തുടർന്ന് ആർച്ച്ബിഷപ് നേരിട്ടെത്തി അവൾക്കു ദിവ്യകാരുണ്യം നൽകി. രോഗം മൂർച്ഛിച്ച് ചലനശേഷിയും സംസാരശേഷിയും നഷ്ടപ്പെട്ട അവസാന നാളുകളിൽ, ഏറെ പ്രയാസപ്പെട്ട് അവൾ കുറിച്ച അവസാന വാക്കുകൾ ‘പ്രത്യാശയോടെ ചിന്തിക്കുക’ എന്നതായിരുന്നു. അവളുടെ സ്മരണാർഥം രൂപീകരിച്ച ഫൗണ്ടേഷനും ഇതേ പേരാണു നൽകിയിരിക്കുന്നത്. 2020 ഒക്ടോബർ എട്ടിന് 18-ാം വയസിൽ മരിയ അന്തരിച്ചു. മാതാപിതാക്കളായ ബ്രയാനും സൂസനും ചേർന്ന് പുസ്തകങ്ങളിലൂടെയും പ്രഭാഷണങ്ങളിലൂടെയും അവളുടെ ജീവിതം പങ്കുവയ്ക്കുന്നുണ്ട്.
തുടക്കമിട്ട കാർലോ അക്കുത്തിസ്
കംപ്യൂട്ടർ പ്രോഗ്രാമിംഗിലും ഇന്റർനെറ്റിലും പ്രാവീണ്യമുണ്ടായിരുന്ന കാർലോ അക്കുത്തിസ്, സാങ്കേതികവിദ്യയെ സുവിശേഷവത്കരണത്തിനായി ഉപയോഗിച്ചതിലൂടെയാണു ലോകശ്രദ്ധ നേടിയത്. ‘ദൈവത്തിന്റെ ഇൻഫ്ലുവൻസർ’ എന്നറിയപ്പെടുന്ന കാർലോ രക്താർബുദം ബാധിച്ച് 2006 ഒക്ടോബർ 12നാണ് മരിച്ചത്. 2025 സെപ്റ്റംബർ ഏഴിന് അദ്ദേഹത്തെ വിശുദ്ധനായി പ്രഖ്യാപിച്ചു.