കൊച്ചി: വ്യാജ ട്രാഫിക് പിഴ സന്ദേശങ്ങളില്‍ ക്ലിക്ക് ചെയ്യരുതെന്ന മുന്നറിയിപ്പുമായി സൈബര്‍ ക്രൈം പൊലിസ്. സംസ്ഥാനത്ത് ട്രാഫിക് നിയമലംഘനങ്ങളുടെയും സിസിടിവി പരിശോധനകളുടെയും പേരില്‍ വ്യാജ എസ്എംഎസ് അയച്ച് ഓണ്‍ലൈന്‍ സാമ്പത്തിക തട്ടിപ്പുകള്‍ വ്യാപകമായതോടെയാണു പൊലിസിന്‍റെ മുന്നറിയിപ്പ് .
മോട്ടോര്‍ വാഹന വകുപ്പിന്‍റെ ഔദ്യോഗിക അറിയിപ്പ് എന്ന വ്യാജേനയാണ് ഇത്തരം സന്ദേശങ്ങള്‍ പൊതുജനങ്ങളുടെ ഫോണുകളിലേക്ക് എത്തുന്നത്. വാഹനങ്ങളുടെ യഥാര്‍ഥ രജിസ്‌ട്രേഷന്‍ നമ്പറുകള്‍ ഉള്‍പ്പെടുത്തി, ട്രാഫിക് നിയമലംഘനം കാമറയില്‍ പതിഞ്ഞിട്ടുണ്ടെന്നും പിഴയടയ്ക്കാന്‍ നല്‍കിയിരിക്കുന്ന ലിങ്കില്‍ ക്ലിക്ക് ചെയ്യണമെന്നുമാണ് സന്ദേശം.
സംശയം തോന്നാത്തവിധം ഔദ്യോഗിക രൂപത്തിലാണ് ഇത്തരം സന്ദേശങ്ങള്‍ തട്ടിപ്പുകാര്‍ തയാറാക്കുന്നത്. സന്ദേശത്തോടൊപ്പം നല്‍കിയിരിക്കുന്ന റഫറന്‍സ് നമ്പറും ചുരുക്കിയ വെബ് ലിങ്കും തട്ടിപ്പിന്‍റെ ഭാഗമാണ്.
ഈ ലിങ്കുകളില്‍ ക്ലിക്ക് ചെയ്യുമ്പോള്‍ മോട്ടോര്‍ വാഹന വകുപ്പിന്‍റെ ഔദ്യോഗിക വെബ്‌സൈറ്റിന‌ു സമാനമായ വ്യാജ പേജിലേക്കാണ് ഉപയോക്താക്കള്‍ എത്തുന്നത്. തുടര്‍ന്ന് പിഴയടയ്ക്കുന്നതിനായി ബാങ്ക് അക്കൗണ്ട് വിവരങ്ങള്‍, ഡെബിറ്റ്/ക്രെഡിറ്റ് കാര്‍ഡ് നമ്പറുകള്‍, സിവിവി, ഒടിപി തുടങ്ങിയ രഹസ്യവിവരങ്ങള്‍ നല്‍കാന്‍ ആവശ്യപ്പെടുന്നു. ഈ വിവരങ്ങള്‍ നല്‍കുന്നതോടെ അക്കൗണ്ടുകളില്‍നിന്ന് പണം നഷ്‌ടപ്പെടും.
ജാഗ്രതയാണു പ്രധാനം...
ഇത്തരം തട്ടിപ്പുകളില്‍നിന്ന് പൊതുജനങ്ങള്‍ ജാഗ്രത പാലിക്കണം. എസ്എംഎസുകളില്‍ ലഭിക്കുന്ന അപരിചിതമായ ലിങ്കുകളില്‍ ക്ലിക്ക് ചെയ്ത് ഒരിക്കലും പിഴയടയ്ക്കരുത്. വാഹനങ്ങള്‍ക്കു യഥാര്‍ഥത്തില്‍ പിഴയുണ്ടോയെന്ന് ഔദ്യോഗിക പരിവാഹന്‍ അല്ലെങ്കില്‍ ഇ ചെലാന്‍ വെബ്‌സൈറ്റുകള്‍ വഴി നേരിട്ടു പരിശോധിച്ച് ഉറപ്പുവരുത്തണം. ബാങ്ക് വിവരങ്ങളോ ഒടിപിയോ കാര്‍ഡ് വിശദാംശങ്ങളോ ഒരു കാരണവശാലും മറ്റാരുമായും പങ്കുവയ്ക്കരുത്. വ്യാജമെന്നു സംശയിക്കുന്ന സന്ദേശങ്ങളിലെ ലിങ്കുകള്‍ തുറക്കുകയോ മറ്റുള്ളവരിലേക്കു കൈമാറുകയോ ചെയ്യരുത്.
ഓണ്‍ലൈന്‍ സാമ്പത്തിക തട്ടിപ്പുകള്‍ക്ക് ഇരയായാല്‍ സമയം പാഴാക്കാതെ ഉടന്‍ തന്നെ 1930 എന്ന സൈബര്‍ ഹെല്‍പ്പ് ലൈന്‍ നമ്പറിലോ https:// cybercrime.gov.in എന്ന ഔദ്യോഗിക സൈബര്‍ ക്രൈം പോര്‍ട്ടല്‍ വഴിയോ പരാതി രജിസ്റ്റര്‍ ചെയ്യണം.
Deepika
Corehub Solutions
E-paper LOGIN
LOGIN