മരിച്ചെന്ന് കരുതി സംസ്കാര ചടങ്ങുകൾക്കായി വൈദ്യുത ശ്മശാനത്തിൽ എത്തിച്ച സ്ത്രീ, ചൂളയ്ക്കുള്ളിൽ വെച്ച് നിലവിളിച്ചുവെന്ന അവകാശവാദത്തോടെയുള്ള ഒരു വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയാണ്. ബന്ധുക്കൾ മരണം ഉറപ്പിച്ച് ശ്മശാനത്തിൽ കൊണ്ടുവന്ന സ്ത്രീയെ വൈദ്യുത ചൂളയിലേക്ക് കടത്തിയതിന് തൊട്ടുപിന്നാലെ ഉള്ളിൽ നിന്നും നിലവിളി കേട്ടതായും, ഇതോടെ പരിഭ്രാന്തരായ ആളുകൾ വാതിൽ തുറക്കാൻ ശ്രമിച്ചതായുമാണ് ദൃശ്യങ്ങൾക്കൊപ്പമുള്ള വിവരണത്തിൽ പറയുന്നത്.
ഈ ഞെട്ടിക്കുന്ന സംഭവം ഓൺലൈനിൽ വലിയ ആശങ്കയും ചർച്ചകളും സൃഷ്ടിച്ചിട്ടുണ്ടെങ്കിലും, ഇത് സ്ഥിരീകരിക്കുന്ന യാതൊരു തെളിവുകളും ഇതുവരെ ലഭ്യമായിട്ടില്ല. ചൂളയ്ക്കുള്ളിൽ വെക്കുമ്പോൾ സ്ത്രീക്ക് ജീവനുണ്ടായിരുന്നുവെന്നോ, കേട്ടതായി പറയുന്ന ശബ്ദം ഉള്ളിൽ നിന്ന് തന്നെയാണ് വന്നതെന്നോ പ്രചരിക്കുന്ന ദൃശ്യങ്ങളിൽ നിന്ന് വ്യക്തമാകുന്നില്ല. വീഡിയോ എപ്പോൾ ചിത്രീകരിച്ചതാണെന്നോ ഇതിന് പിന്നിലെ യഥാർഥ സാഹചര്യം എന്തായിരുന്നുവെന്നോ വ്യക്തമാക്കുന്ന വിവരങ്ങളും അജ്ഞാതമായി തുടരുകയാണ്.