20

സത്യൻ അന്തിക്കാട് സംവിധാനം ചെയ്ത 'മനസിനക്കരെ' എന്ന ചിത്രത്തിലെ കൊച്ചുത്രേസ്യയെയും മാത്തുക്കുട്ടിച്ചായനെയും മലയാളികൾ അത്ര പെട്ടെന്നൊന്നും മറക്കില്ല.

വർഷങ്ങൾക്കിപ്പുറം ആ മനോഹരമായ പ്രണയകഥയെ ഓർമ്മിപ്പിച്ചുകൊണ്ട് സോഷ്യൽ മീഡിയയിൽ തരംഗമാവുകയാണ് ടോണി - ആൻമരിയ ദമ്പതികളുടെ 'സേവ് ദ ഡേറ്റ്' വീഡിയോ.

സിനിമയിൽ ഷീല അവതരിപ്പിച്ച കൊച്ചുത്രേസ്യ തന്‍റെ പഴയകാല ഓർമ്മകളെക്കുറിച്ച് പറയുന്ന വൈകാരികമായ രംഗങ്ങളെയും ഡയലോഗുകളെയും മുൻനിർത്തിയാണ് ഈ വീഡിയോ അണിയിച്ചൊരുക്കിയിരിക്കുന്നത്.

സിനിമയിലെ ഐക്കോണിക് ഡയലോഗുകളെ പുനരാവിഷ്കരിക്കുന്ന ഈ വീഡിയോ ചുരുങ്ങിയ സമയം കൊണ്ടാണ് ഇൻസ്റ്റാഗ്രാമിൽ വൈറലായി മാറിയത്. ആത്രേയ വെഡിംഗ് സ്റ്റോറീസ് ചിത്രീകരിച്ചിരിക്കുന്ന ഈ ദൃശ്യവിരുന്നിൽ, മാത്തുക്കുട്ടിച്ചായനൊപ്പം ജീവിക്കാൻ കൊച്ചുത്രേസ്യ ഇറങ്ങിപ്പോകുന്നതു മുതൽ അങ്ങോട്ടുള്ള പ്രധാന നിമിഷങ്ങളെല്ലാം ടോപ് ക്ലാസ് ലെവലിലാണ് അവതരിപ്പിച്ചിരിക്കുന്നത്.

സിനിമയോട് നൂറു ശതമാനം നീതി പുലർത്തുന്ന നിർമ്മാണ നിലവാരമാണ് ഈ വീഡിയോയെ വ്യത്യസ്തമാക്കുന്നത്. വെറുമൊരു സേവ് ദ ഡേറ്റ് എന്നതിലുപരി ഒരു സിനിമയുടെ ക്വാളിറ്റിയുള്ള മേക്കിംഗാണ് വീഡിയോയുടെ ഹൈലൈറ്റ്. "സേവ് ദ ഡേറ്റ് എന്ന് പറഞ്ഞ് സിനിമയെടുത്ത് ആളെ പറ്റിക്കുന്നോ" എന്ന് തമാശരൂപേണ ചോദിച്ചുകൊണ്ടാണ് പലരും ഈ വീഡിയോയെ അഭിനന്ദിക്കുന്നത്.

എഐക്ക് പോലും പകരം വെക്കാനാകാത്ത വിധം റിയലിസ്റ്റിക്കായി ഈ ഓർമ്മകളെ പുനഃസൃഷ്ടിച്ചതിനെ സോഷ്യൽ മീഡിയ ഒന്നടങ്കം പുകഴ്ത്തുന്നു. മെയ് ഒമ്പതിനാണ് ടോണിയുടെയും ആൻമരിയയുടെയും വിവാഹം നിശ്ചയിച്ചിരിക്കുന്നത്. നവദമ്പതികൾക്ക് ആശംസകൾ നേരുന്നതിനൊപ്പം തന്നെ ഈ മനോഹരമായ ആവിഷ്കാരത്തിന് മികച്ച പ്രതികരണങ്ങളാണ് കമന്‍റ് ബോക്സിൽ ലഭിക്കുന്നത്.