4

ഐപിഎൽ 2026-ലെ ചെന്നൈ സൂപ്പർ കിങ്‌സ് - മുംബൈ ഇന്ത്യൻസ് മത്സരത്തിന് മുന്നോടിയായി ആരാധകർക്കിടയിൽ ഏറെ ശ്രദ്ധേയമാവുകയാണ് മുൻ ഇന്ത്യൻ ക്യാപ്റ്റൻ എം.എസ്. ധോണിയുടെ ഒരു കുഞ്ഞു വീഡിയോ.

സ്റ്റേഡിയത്തിന് പുറത്തുവെച്ച് കണ്ടുമുട്ടിയ കൊച്ചു ആരാധകനോട് ധോണി കാണിച്ച സ്നേഹപൂർവ്വമായ ഇടപെടലാണ് സമൂഹമാധ്യമങ്ങളിൽ ഇപ്പോൾ തരംഗമായി മാറിയിരിക്കുന്നത്.

കൈയിൽ ഒരു ചെറിയ ബാറ്റുമായി ഓട്ടോഗ്രാഫ് തേടിയെത്തിയ കുട്ടിയെ വളരെ വാത്സല്യത്തോടെയാണ് ധോണി സ്വീകരിച്ചത്.

കുട്ടിയുടെ ബാറ്റിൽ ഒപ്പിട്ടു നൽകിയ ശേഷം, ആ കുട്ടി സമ്മാനമായി കൊണ്ടുവന്ന ധോണിയുടെ തന്നെ ഫോട്ടോ ഫ്രെയിമിലും അദ്ദേഹം ഒപ്പിട്ടു നൽകി.

ബാറ്റ് കുട്ടിക്ക് സ്വന്തം സമ്മാനമായും, ഫ്രെയിം അച്ഛന് നൽകാനുള്ളതായും പറഞ്ഞ് ധോണി അത് തിരികെ ഏൽപ്പിച്ചത് ഏറെ ഹൃദ്യമായ ഒരു കാഴ്ചയായി മാറി.

ഈ വീഡിയോ കുട്ടിയുടെ പിതാവ് ക്യാമറയിൽ പകർത്തിയത് സോഷ്യൽ മീഡിയയിൽ നിമിഷനേരം കൊണ്ടാണ് പ്രചരിച്ചത്. സഹതാരങ്ങളുടെ മക്കൾക്കൊപ്പം സമയം ചെലവഴിക്കുന്നതും അവരോട് സ്നേഹത്തോടെ പെരുമാറുന്നതുമായ ധോണിയുടെ വീഡിയോകൾ നേരത്തെയും ചർച്ചയായിരുന്നു.

സഫർ ഖാന്‍റെ കുഞ്ഞിനൊപ്പമുള്ള താരത്തിന്‍റെ ദൃശ്യങ്ങളും വലിയ രീതിയിൽ ശ്രദ്ധിക്കപ്പെട്ടിരുന്നു. അതേസമയം, ഹാംസ്ട്രിംഗ് പരിക്കിനെ തുടർന്ന് ഐപിഎല്ലിലെ ആദ്യ ആറ് മത്സരങ്ങളിൽ നിന്നും വിട്ടുനിന്ന ധോണി നാളെ നടക്കുന്ന മുംബൈ ഇന്ത്യൻസിനെതിരായ നിർണായക പോരാട്ടത്തിലൂടെ കളിക്കളത്തിലേക്ക് തിരിച്ചെത്തുമെന്നാണ് കരുതപ്പെടുന്നത്.

വാംഖഡെ സ്റ്റേഡിയത്തിൽ വെച്ച് നടക്കുന്ന മത്സരത്തിൽ താരത്തിന്‍റെ സാന്നിധ്യം ചെന്നൈ സൂപ്പർ കിങ്‌സിന് വലിയ ഉണർവ് നൽകുമെന്ന പ്രതീക്ഷയിലാണ് ആരാധകർ.