അതിരമ്പുഴ: അറിവും നൈപുണ്യവും സർഗാത്മകതയും സമഞ്ജസമായി കൂടിച്ചേർന്ന കൗമാര വിസ്മയത്തിന്‍റെ ജാലകം തുറന്നു. റവന്യൂ ജില്ലാ സ്‌കൂൾ ശാസ്ത്രോത്സവം വിദ്യാർഥികളുടെ പ്രതിഭയെ അനാവരണം ചെയ്യുന്ന വേദിയായി.
നമ്മൾ വലിച്ചെറിയുന്ന പാഴ്‌വസ്തുക്കളിൽനിന്നും പ്രകൃതിയിൽനിന്നു ലഭിക്കുന്ന വിവിധയിനം വസ്തുക്കളിൽ നിന്നും മനോഹരമായ ഉത്പന്നങ്ങളാണ് വിദ്യാർഥികൾ തങ്ങളുടെ കരവിരുതിൽ നിർമിച്ചത്.
മന്ത്രി മോൻസ് ജോസഫ് ശാസ്ത്രോത്സവം ഉദ്ഘാടനം ചെയ്തു. നാട്ടകം സുരേഷ് എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്‌റ്റാൻഡിംഗ് കമ്മിറ്റി ചെയർമാൻ പി.കെ. വൈശാഖ്, ജില്ലാ പഞ്ചായത്ത് അംഗം ജിം അലക്സ്, അതിരമ്പുഴ പഞ്ചായത്ത് വൈസ് പ്രസിഡന്‍റ് തോമസ് പുതുശേരി, സ്‌കൂൾ അഡ്മിനിസ്ട്രേറ്റർ ഫാ. വിപിൻ കട്ടത്തറ, വിദ്യാഭ്യാസ ഉപഡയറക്ടർ ഹണി ജി. അലക്സാണ്ടർ തുടങ്ങിയവർ പ്രസംഗിച്ചു. ശാസ്‌ത്രോത്സവ ലോഗോ തയാറാക്കിയ സിഎംഎസ് ഹൈസ്കൂൾ വിദ്യാർഥിനി സാവിയ ഫാത്തിമയ്ക്ക് ഉപഹാരം നൽകി.
ഗണിതശാസ്‌ത്ര, പ്രവൃത്തി പരിചയ, ഐടി മേളകളാണ് ഇന്നലെ നടന്നത്. ഇന്ന് സെന്‍റ് അലോഷ്യസ് ഹയർ സെക്കൻഡറി സ്‌കൂളിൽ ശാസ്‌ത്രമേളയും ഐടി മേളയും സെന്‍റ് മേരീസ് ഗേൾസ് ഹൈസ്കൂളിൽ സാമൂഹ്യശാസ്ത്ര മേളയും നടക്കും.
ശാസ്ത്രപ്രതിഭകളെ കാത്ത് പുത്തൻ ട്രോഫികൾ
ജില്ലാ ശാസ്തോത്സവ വിജയികൾക്ക് ഇത്തവണ പുത്തൻ ട്രോഫികൾ ലഭിക്കും. ഏറെ കാലപ്പഴക്കം ചെന്ന് കേടുപാടുകൾ സംഭവിച്ച ട്രോഫികൾ മാറണമെന്ന വർഷങ്ങളായുള്ള ആവശ്യത്തിന് ഇത്തവണ പരിഹാരമായി.
ജില്ലാ പഞ്ചായത്ത് അംഗം ജിം അലക്സിന്‍റെ ഇടപെടലിൽ പോപ്പുലർ വെഹിക്കിൾസ് ആൻഡ് സർവീസസ് മുഴുവൻ ട്രോഫികളും സ്പോൺസർ ചെയ്തതോടെയാണ് 35 പുതിയ ട്രോഫികൾ ലഭ്യമായത്.
കരവിരുതിന്‍റെ കൗതുകം തീർത്ത് ക്ലേ മോഡലിംഗ്
ക്ലേ മോഡലിംഗില്‍ മൂന്നുമണിക്കൂറിനുള്ളില്‍ രൂപം പ്രാപിച്ചതു വിറക് ചുമക്കുന്നയാളും ഗര്‍ജിക്കുന്ന സിംഹവും. ക്ലേ മോഡലിംഗ് മത്സരത്തില്‍ ഹയര്‍ സെക്കന്‍ഡറി വിദ്യാര്‍ഥികള്‍ക്കു നല്കിയ വിഷയം വിറക് ചുമക്കുന്നയാളെ നിര്‍മിക്കാനായിരുന്നു. ഹൈസ്‌കൂള്‍ വിഭാഗത്തിന്‍റെ വിഷയം ഗര്‍ജിക്കുന്ന സിംഹവും.
കൈയിലും തോളിലും പുറത്തും വിറകുകെട്ടുമായി നടന്നുനീങ്ങുന്ന നിരവധി രൂപങ്ങള്‍ വിദ്യാര്‍ഥികള്‍ മൂന്നു മണിക്കൂറില്‍ നിര്‍മിച്ചു. ഗര്‍ജിക്കുന്ന സിംഹത്തിന്‍റെ രൂപങ്ങളും ശ്രദ്ധപിടിച്ചുപറ്റിയിരുന്നു. ഹയര്‍ സെക്കന്‍ഡറി വിഭാഗത്തില്‍ 19 പേരും ഹൈസ്‌കൂള്‍ വിഭാഗത്തില്‍ 26 വിദ്യാര്‍ഥികളുമാണ് മത്സരത്തില്‍ പങ്കെടുത്തത്.
കൊതിപ്പിക്കും വിഭവങ്ങളുമായി കുട്ടി ഷെഫുമാര്‍
അതിരമ്പുഴ: വീട്ടുമുറ്റത്തും തൊടിയിലുമുള്ള വിഭവങ്ങള്‍ ഉപയോഗിച്ച് രുചികരവും വ്യത്യസ്തവുമായി വിഭവങ്ങളുണ്ടാക്കി കുട്ടി ഷെഫുമാര്‍. ശാസ്ത്രോത്സവത്തോടനുബന്ധിച്ചുള്ള പാചക മത്സരത്തിലാണ് പരമ്പരാഗത തനിമ ചോരാത്ത വിഭവങ്ങളും ആധുനിക രുചിക്കൂട്ടുകളും കോര്‍ത്തിണക്കി വിദ്യാര്‍ഥികള്‍ നിരവധി വിഭവങ്ങള്‍ ഒരുക്കിയത്.
മൂന്നു മണിക്കൂറില്‍ 12 വിഭവങ്ങളാണ് മത്സരാര്‍ഥികള്‍ക്ക് തയാറാക്കേണ്ടത്. ഇതില്‍ ന്യൂട്രിഷന്‍ വിഭവത്തില്‍ ആറും പ്രിസര്‍വേറ്റീവ് വിഭവത്തില്‍ ആറുമാണ് തയാറാക്കേണ്ടത്. ഭക്ഷണത്തിന്‍റെ പോഷകഗുണത്തിലും നിര്‍മാണത്തിലും പുലര്‍ത്തിയ നിലവാരം വിധികര്‍ത്താക്കളുടെ പ്രശംസയും പിടിച്ചുപറ്റി.
താരമായി ചായക്കടക്കാരന്‍ രാമേട്ടന്‍
പപ്പറ്റ് നിര്‍മാണത്തില്‍ ഏവരുടെയും ശ്രദ്ധയാകര്‍ഷിച്ചതു ചായക്കടക്കാരന്‍ രാമേട്ടന്‍, മുത്തശി മുയല്‍, കണ്ണന്‍ തവള എന്നീ പപ്പറ്റുകള്‍. ലുങ്കിയും ബനിയും തോളില്‍ തോര്‍ത്തുമിട്ട് ഒരു കൈയില്‍ ചായക്കപ്പ്, മറ്റേ കൈയില്‍ ഗ്ലാസുമായി നില്ക്കുന്ന ചായക്കടക്കാരന്‍ രാമേട്ടനെ നോക്കുന്ന ആരും പിന്നീട് അവിടെ നിന്നും കണ്ണെടുക്കില്ല. അത്രയ്ക്കു മനോഹരമായിട്ടാണ് നൂല്‍ (സ്ട്രിംഗ്) പപ്പറ്റായി രാമേട്ടനെ കുറവിലങ്ങാട് സെന്‍റ് മേരീസ് എച്ച്എസ്എസിലെ പ്ലസ് ടു വിദ്യാര്‍ഥിനിയായ എസ്. ആദ്രിജ പാര്‍വതി നിര്‍മിച്ചിരിക്കുന്നത്. ആദ്രിജ സ്ട്രിംഗ് പപ്പറ്റായി രാമേട്ടനെയും ഹാന്‍ഡ് പപ്പറ്റായി മുത്തശി മുയല്‍, കണ്ണന്‍ തവള എന്നിവയെയാണ് നിര്‍മിച്ചത്.
കമുകിൻപാള പാഴല്ല...!
കമുകിൻപാളകൊണ്ട് ഇത്രയേറെ വസ്‌തുക്കളോ? കുട്ടികൾ അദ്ഭുതം കൂറി. വിശറിയും പാളത്തൊപ്പിയും ബാഗും ചെരിപ്പും തവിയും പ്ലേറ്റും ബാസ്‌കറ്റും വള്ളവും താമരയും മിറർ ഫ്രെയിമും കൗതുക വസ്തുക്കളും ഉൾപ്പടെ അസംഖ്യം വസ്‌തുക്കളാണ് മൂന്നു മണിക്കൂറിനുള്ളിൽ കുട്ടികൾ നിർമിച്ചത്.
Deepika
Corehub Solutions
E-paper LOGIN
LOGIN
