തിരുവനന്തപുരം: സ്ത്രീകളുടെ സംരക്ഷണം ഉറപ്പാക്കിയുള്ള മാതൃകാ വനിതാ നയം വിട്ടുവീഴ്ചയില്ലാതെ ഇച്ഛാശക്തിയോടെ സംസ്ഥാനത്ത് നടപ്പിലാക്കുമെന്ന് മുഖ്യമന്ത്രി വി.ഡി. സതീശൻ. പൊതുവിടങ്ങളിലും തൊഴിലിടങ്ങളിലും വീടുകളിലും സ്ത്രീകൾ നേരിടുന്ന അക്രമങ്ങളിൽ നിന്നും അപമാനങ്ങളിൽ നിന്നും പൂർണ സംരക്ഷണം ഉറപ്പാക്കും.
ഇന്ത്യയിലെ മറ്റു സംസ്ഥാനങ്ങൾക്ക് മാതൃകയാകുന്ന തരത്തിൽ എല്ലാ മേഖലയിലുള്ളവരുടെയും അഭിപ്രായങ്ങൾ സ്വരൂപിച്ചാണ് വനിതാ നയം തയാറാക്കുന്നതെന്നും മുഖ്യമന്ത്രി പറഞ്ഞു. മകൾക്കൊപ്പം പദ്ധതിയുടെ ഭാഗമായി വനിതാ-ശിശു വികസന വകുപ്പ് തിരുവനന്തപുരം ഹൈസിന്ത് ഹോട്ടലിൽ സംഘടിപ്പിക്കുന്ന ദ്വിദിന പുതുയുഗ വനിതാനയം ഹെർ സമ്മിറ്റ് 2026 ന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം.
വനിതാ സംരംഭകർക്ക് സാമ്പത്തിക-സാങ്കേതിക പിന്തുണ നൽകുന്നതിനൊപ്പം ഹരിത സമ്പദ് വ്യവസ്ഥയിലും പുതിയ തൊഴിൽ മേഖലകളിലും അർഹമായ പ്രാതിനിധ്യം വനിതാ നയത്തിൽ ഉറപ്പാക്കുമെന്ന് വനിതാ ശിശുസംരക്ഷണ മന്ത്രി ബിന്ദു കൃഷ്ണ പറഞ്ഞു.
തദ്ദേശ സ്വയംഭരണ സ്ഥാപനങ്ങളിലെ പങ്കാളിത്തത്തിനു പുറമെ, നയരൂപീകരണത്തിലും ബജറ്റ് തീരുമാനങ്ങളിലും ഭരണ നിർവഹണത്തിലും സ്ത്രീകളുടെ യഥാർഥ സ്വാധീനവും പങ്കാളിത്തവും ഉറപ്പുവരുത്തും. ലിംഗസമത്വവും അവകാശബോധവും വിദ്യാഭ്യാസത്തിന്‍റെ ഭാഗമാക്കും. കൗമാര-ആർത്തവ ആരോഗ്യം, മാനസികാരോഗ്യം, പോസ്റ്റ്പാർട്ടം ഡിപ്രഷൻ എന്നിവ ഗൗരവമായി അഭിസംബോധന ചെയ്യും- മന്ത്രി കൂട്ടിച്ചേർത്തു.
കേരളം കഴിഞ്ഞ 70 വർഷമായി മുന്നോട്ടു പോയത് ഏകപക്ഷീയ തീരുമാനങ്ങളിലൂടെയല്ല, മറിച്ച് ജനാധിപത്യപരമായ കൂട്ടായ ചർച്ചകളിലൂടെയാണെന്ന് മുഖ്യപ്രഭാഷണത്തിൽ പട്ടികജാതി-പട്ടികവർഗ പിന്നാക്കക്ഷേമ മന്ത്രി കെ എ തുളസി ചൂണ്ടിക്കാട്ടി.
ആ പാരമ്പര്യം തുടർന്നുകൊണ്ട് വീട്ടമ്മമാർ, തൊഴിലെടുക്കുന്ന സ്ത്രീകൾ, സംരംഭകർ, ജനപ്രതിനിധികൾ തുടങ്ങി സമഗ്രമേഖലകളിൽനിന്നുള്ള സ്ത്രീകളുടെ കൂട്ടായ അഭിപ്രായങ്ങൾ സ്വരൂപിച്ചാണ് വനിതാനയത്തിന് രൂപം നൽകുന്നതെന്ന് മന്ത്രി പറഞ്ഞു.
എംഎൽഎമാരായ ഉമാ തോമസ്, ഉഷാ വിജയൻ, ഭരണ പരിഷ്‌കാര കമ്മിഷൻ ചെയർപേഴ്സൺ ഡോ. എം.കെ. മുനീർ, വനിതാ കമ്മിഷൻ ചെയർപേഴ്സൺ പി. സതീദേവി, മുൻ മന്ത്രി പി.കെ. ശ്രീമതി, മുതിർന്ന ഉദ്യോഗസ്ഥർ തുടങ്ങിയവർ സന്നിഹിതരായി.
Deepika
Corehub Solutions
E-paper LOGIN
LOGIN
