പിറവം: പിറവത്ത് യുഡിഎഫ് സ്ഥാനാർഥി അനൂപ് ജേക്കബ് ജില്ലയിലെ ഏറ്റവും വലിയ ഭൂരിപക്ഷത്തിൽ വിജയിക്കുമെന്ന് പ്രതിപക്ഷ നേതാവ് വി.ഡി. സതീശൻ. യുഡിഎഫ് പിറവം നിയോജകമണ്ഡലം തെരഞ്ഞെടുപ്പ് കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
ശബരിമലയിലെ സ്വർണ കവർച്ചയ്ക്ക് കൂട്ടുനിന്ന സിപിഎമ്മിനെ കൊണ്ട് ജനം തെരഞ്ഞെടുപ്പിൽ മറുപടി പറയിപ്പിക്കും. കോടികൾ മുടക്കി വ്യാജ പരസ്യങ്ങളിലൂടെ ജനങ്ങളെ തെറ്റിദ്ധരിപ്പിക്കുകയാണ് പിണറായി സർക്കാർ. സർക്കാർ ജീവനക്കാരുടെയും പെൻഷൻകാരുടെയും ഡിഎ കുടിശിക ഉൾപ്പെടെയുള്ള ആനുകൂല്യങ്ങൾ അടുത്ത സാമ്പത്തിക വർഷം മുതൽ വിതരണം ചെയ്യുമെന്ന സർക്കാർ ഉത്തരവ് നടപ്പാക്കുക ഇനി വരുന്ന യുഡിഎഫ് സർക്കാർ ആയിരിക്കുമെന്നും സതീശൻ പറഞ്ഞു.
യുഡിഎഫ് ചെയർമാൻ കെ.ആർ. ജയകുമാർ അധ്യക്ഷനായി. ഫ്രാൻസിസ് ജോർജ് എംപി മുഖ്യപ്രഭാഷണം നടത്തി. എൽദോസ് കുന്നപ്പിള്ളി, സ്ഥാനാർഥി അനൂപ് ജേക്കബ്, വി.ജെ പൗലോസ്, ജെയ്സൺ ജോസഫ്, ഐ.കെ. രാജു, ആശ സനിൽ, കെ.ജി രാധാകൃഷ്ണൻ തുടങ്ങിയവരും പങ്കെടുത്തു.