ഇടക്കൊച്ചി : മാസങ്ങളായി തകർന്നു തരിപ്പണമായി കിടക്കുന്ന ഇടക്കൊച്ചി - കണ്ണങ്ങാട്ട് റോഡ് നന്നാക്കുവാൻ അധികൃതർ നടപടിയെടുക്കാത്തതിൽ നാട്ടുകാർ റോഡിലെ കുഴികളിൽ വാഴ നട്ടു പ്രതിഷേധിച്ചു.
അരൂർ, പള്ളുരുത്തി, ഇടക്കൊച്ചി ഭാഗങ്ങളിൽ നിന്ന് എറണാകുളത്തേക്ക് നിരവധി വാഹനങ്ങൾ കടന്നു പോകുന്ന റോഡാണിത്. റോഡ് തകർന്നതോടെ പ്രദേശത്തെ കാൽനടയാത്രക്കാരും വാഹനയാത്രക്കാരും വലിയ ദുരിതത്തിലാണ്. ദിവസേന നൂറുകണക്കിനു വാഹനങ്ങളാണ് ഇതുവഴി കടന്നുപോകുന്നത്.
റോഡിൽ രൂപപ്പെട്ട വലിയ കുഴികളിൽ ഇരുചക്ര വാഹനങ്ങൾ അപകടത്തിൽപ്പെടുന്നത് ഇവിടെ പതിവായിരിക്കുകയാണ്. സ്കൂൾ കുട്ടികളും പ്രായമായവരും രോഗികളും ഉൾപ്പെടെയുള്ളവർ ഈ വഴിയിലൂടെ സഞ്ചരിക്കാൻ ഏറെ ബുദ്ധിമുട്ടുന്നുണ്ട്. കണ്ണങ്ങാട്ട് റോഡിൽ നിന്ന് വാഹനങ്ങൾ ഇറങ്ങി വരുന്ന തൊട്ടടുത്ത ഇന്ദിരാഗാന്ധി റോഡും തകർന്ന അവസ്ഥയിലാണ്. കഴിഞ്ഞ ദിവസം റോഡിലൂടെ സഞ്ചരിച്ച പ്രവാസിയായ ഇരുചക്രവാഹന യാത്രികൻ കുഴിയിൽ വീണ് തലയ്ക്ക് പരിക്കേറ്റ് ചികിത്സയിലാണ്.
നഗരസഭയുടെ കീഴിലുള്ള റോഡിന്റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് വാർഡ് കൗൺസിലർ നിരവധി തവണ പരാതി നൽകിയിട്ടും യാതൊരു നടപടിയും ഉണ്ടായില്ലെന്ന് നാട്ടുകാർ ആരോപിക്കുന്നു. അടിയന്തരമായി റോഡ് സഞ്ചാരയോഗ്യമാക്കിയില്ലെങ്കിൽ വരും ദിവസങ്ങളിൽ ശക്തമായ സമരപരിപാടികളുമായി മുന്നോട്ട് പോകുമെന്ന് നാട്ടുകാർ പറയുന്നു.