ന്യൂഡൽഹി: ട്രാഫിക് നിയമങ്ങൾ ലംഘിച്ച് അപകടകരമായ രീതിയിൽ ബൈക്ക് ഓടിച്ച യുവാവിനെതിരെ നടപടിയെടുത്ത് ഡൽഹി പോലീസ്. വെള്ളിയാഴ്ച രാത്രി ഒന്പതോടെ തിസ് ഹസാരി സുഭാഷ് പാർക്ക് റോഡിലാണ് സംഭവം നടന്നത്.
സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. ബൈക്ക് യാത്രികൻ മറ്റ് വാഹനങ്ങൾക്കിടയിലൂടെ സിഗ്-സാഗ് രീതിയിൽ ഓടിക്കുന്നത് ദൃശ്യങ്ങളിൽ കാണാം. സമീപത്ത് പോലീസ് വാഹനം ഉണ്ടായിരുന്നിട്ടും യുവാക്കൾ സാഹസം തുടർന്നു.
സിസിടിവി ദൃശ്യങ്ങൾ പരിശോധിച്ച ശേഷം ബൈക്കിന്റെ ഉടമയായ ആഷു എന്നയാളെ പോലീസ് തിരിച്ചറിഞ്ഞിട്ടുണ്ട്. വാഹനത്തിന്റെ രജിസ്ട്രേഷൻ സർട്ടിഫിക്കറ്റ് ഡിജിറ്റലായി കണ്ടുകെട്ടിയിട്ടുണ്ട്. മോട്ടോർ വാഹന നിയമത്തിലെ വിവിധ വകുപ്പുകൾ പ്രകാരം ഇയാൾക്കെതിരെ പിഴ ചുമത്തിയിട്ടുണ്ട്. കൂടാതെ, റോഡ് സുരക്ഷ നിയമങ്ങളെക്കുറിച്ച് അവബോധം നൽകുന്നതിനായി ഡൽഹി ട്രാഫിക് പോലീസ് ആസ്ഥാനത്ത് നടക്കുന്ന കൗൺസിലിംഗ് സെഷനിൽ പങ്കെടുക്കാനും നിർദേശിച്ചിട്ടുണ്ട്.