മയാമി: അമേരിക്കൻ മലയാളികളുടെ ക്രൈസ്തവ ആത്മീയ യാത്രയ്ക്ക് പുതിയ അധ്യായം കുറിച്ചുകൊണ്ട് ഷിക്കാഗോ സീറോമലബാർ രൂപതയുടെ രജത ജൂബിലി ആഘോഷങ്ങളോടനുബന്ധിച്ച് സംഘടിപ്പിച്ച മലയാളി കത്തോലിക്കാ വൈദിക മഹാസംഗമം "കൊയ്നോനിയ 2025' മയാമിയിൽ വിജയകരമായി സമാപിച്ചു.
ഈ മാസം 18, 19 തീയതികളിലായി കോറൽ സ്പ്രിംഗ്സിലെ സെന്റ് എലിസബത്ത് ആൻ സെറ്റൺ കത്തോലിക്കാ പള്ളിയിൽ നടന്ന സംഗമത്തിൽ സീറോമലബാർ, സീറോമലങ്കര, ലത്തീൻ റീത്തുകൾ, ക്നാനായ സഭ, വിവിധ സന്യാസ സഭകൾ എന്നിവയിൽ നിന്നായി നൂറ്റിഅൻപതോളം വൈദികർ പങ്കെടുത്തു.
മയാമി ആർച്ച് ബിഷപ് തോമസ് വെൻസ്കി, പെൻസിക്കോള ബിഷപ് വില്യം എ. വാക്ക്, ഷിക്കാഗോ സീറോമലബാർ രൂപതാധ്യക്ഷൻ ബിഷപ് മാർ ജോയ് ആലപ്പാട്ട്, ബിഷപ് എമിറിറ്റസ് മാർ ജേക്കബ് അങ്ങാടിയത്ത്, വികാരി ജനറൽമാരായ ഫാ. ജോൺ മേലേപ്പുറം, ഫാ. തോമസ് കടുകപ്പള്ളി എന്നിവർ ഉൾപ്പെടെയുള്ള അതിഥികളെ കേരള തനിമയിൽ താലപ്പൊലിയുടേയും ചെണ്ടവാദ്യങ്ങളുടേയും അകമ്പടിയോടെയാണ് സ്വീകരിച്ചത്.
ബിഷപ് ജോയ് ആലപ്പാട്ടിന്റെ മുഖ്യ കാർമികത്വത്തിൽ ബിഷപ്പുമാരും 150 വൈദികരും ചേർന്ന് മലയാളത്തിൽ അർപ്പിച്ച കുർബാന അർപ്പിച്ചു. ആർച്ച്ബിഷപ് തോമസ് വെൻസ്കി "കൊയ്നോനിയ' ഔപചാരികമായി ഉദ്ഘാടനം ചെയ്യുകയും അമേരിക്കൻ സമൂഹത്തിന് മലയാളി വൈദികർ നൽകുന്ന ശുശ്രൂഷകളെ പ്രശംസിക്കുകയും ചെയ്തു.