തിരുവനന്തപുരം: സഹകരണ ബാങ്കുകളിൽ നിന്നു വായ്പയെടുത്തവർക്ക് റിസ്ക് ഫണ്ട് പദ്ധതിയുടെ നിബന്ധനകൾക്ക് ഇളവ് വരുത്തിയതായി സഹകരണ മന്ത്രി എം. ലിജു. നിലവിൽ ആറു മാസത്തെ തിരിച്ചടവ് കുടിശികയുണ്ടെങ്കിൽ റിസ്ക് ഫണ്ട് ആനുകൂല്യം നിരസിച്ചിരുന്ന സ്ഥാനത്ത്, ഇനി മുതൽ ഒരു വർഷം വരെ കുടിശികയുള്ളവർക്കും സഹായം ലഭ്യമാക്കാൻ തീരുമാനിച്ചതായി മന്ത്രി പറഞ്ഞു.
കേരള സഹകരണ വികസന ക്ഷേമനിധി ബോർഡിന്റെ ആഭിമുഖ്യത്തിൽ സഹകരണ റിസ്ക് ഫണ്ട് പദ്ധതി ധനസഹായ വിതരണത്തിന്‍റെ സംസ്ഥാനതല ഉദ്ഘാടനം തിരുവനന്തപുരം ജവഹർ സഹകരണ ഭവനിൽ നിർവഹിച്ചു പ്രസംഗിക്കുകയായിരുന്നു അദ്ദേഹം.
മാരകരോഗങ്ങൾ ബാധിച്ചവർക്കും കുടുംബനാഥൻ മരണപ്പെട്ട കുടുംബങ്ങൾക്കും ആശ്വാസമേകുകയാണ് സർക്കാരിന്‍റെ ലക്ഷ്യം. കാൻസർ, വൃക്കരോഗം തുടങ്ങി അതീവ ഗുരുതരമായ രോഗങ്ങൾ ബാധിച്ച് വായ്പക്കാരൻ മരണപ്പെട്ടാൽ എത്ര മാസത്തെ കുടിശികയുണ്ടെങ്കിലും റിസ്ക് ഫണ്ട് ആനുകൂല്യം നൽകും. ഇതിനായുള്ള പുതിയ ചട്ടങ്ങൾക്ക് രൂപം നൽകിയതായും മന്ത്രി പറഞ്ഞു.
സാധാരണക്കാരുടെ ആവശ്യങ്ങൾക്കായി ഗ്രാമങ്ങളിലും നഗരങ്ങളിലും രൂപപ്പെട്ട കൂട്ടായ്മകളാണ് സഹകരണ പ്രസ്ഥാനങ്ങൾ. സംസ്ഥാനത്ത് ഇത്തവണ 3,000ത്തിലധികം അപേക്ഷകളിലായി 37 കോടി രൂപയുടെ റിസ്ക് ഫണ്ട് ധനസഹായം വിതരണം ചെയ്യും.
വായ്പ തിരിച്ചടയ്ക്കാൻ കഴിയാതെ ദുരിതത്തിലാകുന്ന കുടുംബങ്ങൾക്ക് സർക്കാർ നൽകുന്ന വലിയൊരു കൈത്താങ്ങാണ് ഈ പദ്ധതിയെന്നും മന്ത്രി വ്യക്തമാക്കി.
Deepika
Corehub Solutions
E-paper LOGIN
LOGIN