ചാത്തന്നൂര്: കെഎസ്ആര്ടിസിയിലെ മികച്ച ഡ്രൈവര്മാര്ക്കും കണ്ടക്ടര്മാര്ക്കും സംസ്ഥാന തലത്തില് അവാര്ഡ് നല്കും. ഓരോ മാസവും മൂന്നു പേര്ക്ക് വീതമാണ് അവാര്ഡ്.
സംസ്ഥാന സര്ക്കാരിന്റെ 100 ദിന കര്മ പദ്ധതിയുടെ ഭാഗമായാണ് അവാര്ഡ് നല്കുന്നത്. ഇന്ധനക്ഷമത വര്ധിപ്പിക്കാനും കൂടുതല് കാര്യക്ഷമമായ സേവനം ജീവനക്കാരില് നിന്നുണ്ടാകാനും മത്സരാധിഷ്ഠിത സേവനത്തിലൂടെ സുരക്ഷിതത്വം വര്ധിപ്പിക്കുകയുമാണ് ലക്ഷ്യം.
പ്രവര്ത്തന മികവിന്റെ അടിസ്ഥാനത്തില് ഓരോ യൂണിറ്റില്നിന്നും മൂന്നു വീതം കണ്ടക്ടര്മാരെയും ഡ്രൈവര്മാരെയുമാണ് തെരഞ്ഞെടുക്കേണ്ടത്. ഇതിന് യൂണിറ്റ് അധികാരി അധ്യക്ഷനായ ഓരോ സെക്ഷനുകളുടെയും മേധാവികള് അംഗങ്ങളായുമുളള കമ്മിറ്റി രൂപീകരിക്കും.
ഓരോ ഷെഡ്യൂളിനും നിശ്ചയിച്ചിട്ടുള്ള ടാര്ജറ്റിന്റെ എത്ര ശതമാനം ടിക്കറ്റ് വരുമാനം നേടുന്നു, പ്രതിദിന ഹാജരും സമയ കൃത്യതയും, യാത്രക്കാരോടുള്ള സമീപനവും പെരുമാറ്റവും, കൃത്യമായ ഡ്യൂട്ടി നിര്വഹിക്കല് എന്നീ നാല് പ്രധാന ചോദ്യങ്ങളും ഉപചോദ്യങ്ങളുമാണ് മികച്ച കണ്ടക്ടര്മാരെ തെരഞ്ഞെടുക്കാനുള്ള മാനദണ്ഡം.
ഡ്രൈവര്മാര്ക്ക് ഓരോ ഷെഡ്യൂളിനും നിശ്ചയിച്ചു നല്കിയിട്ടുള്ള ഇന്ധന ക്ഷമതയാണ് പ്രധാനം. ഒരു ലിറ്റര് ഡീസലില് എത്ര കിലോമീറ്റര് നേടി എന്നതാണ് പ്രധാന മാനദണ്ഡം.
E-paper LOGIN
LOGIN