വാഹനത്തിന്റെ ടയറിൽ കാറ്റ് നിറയ്ക്കാൻ പോകുന്പോൾ പലപ്പോഴും ചോദ്യം വരും എയർ മതിയോ, നൈട്രജൻ വേണോ? നൈട്രജൻ നിറച്ചാൽ മൈലേജ് കൂടും, ടയർ കൂടുതൽ കാലം നിലനിൽക്കും, ചൂടാകുന്പോൾ പ്രഷർ കുറയില്ല. തുടങ്ങിയ അവകാശവാദങ്ങളും വ്യാപകമാണ്. എന്നാൽ യാഥാർഥ്യം എന്താണ്?
സാധാരണ എയർ
സാധാരണ എയർ എന്നത് അന്തരീക്ഷവായു തന്നെയാണ്. ഏകദേശം 78 ശതമാനം നൈട്രജനും 21 ശതമാനം ഓക്സിജനും കൂടാതെ ചെറിയ അളവിൽ ആർഗണ്, കാർബണ് ഡൈഓക്സൈഡ് തുടങ്ങിയ വാതകങ്ങളും ഇതിലുണ്ട്. അതേസമയം നൈട്രജൻ നിറയ്ക്കുന്പോൾ 95 ശതമാനവും നൈട്രജൻ വാതകമാണ് ടയറിലെത്തുന്നത്.
നൈട്രജന്റെ നേട്ടം എന്ത്?
നൈട്രജൻ തന്മാത്രകൾ ഓക്സിജനേക്കാൾ വലുതായതിനാൽ ടയറിന്റെ ചെറിയ സുഷിരങ്ങളിലൂടെ വാതകം പുറത്തേക്ക് പോകുന്ന തോത് കുറയുമെന്നാണ് പ്രധാന വാദം. അതിനാൽ ദീർഘകാലം ടയർ പ്രഷർ നിലനിർത്തുന്നതിൽ നൈട്രജന് ചെറിയ നേട്ടമുണ്ടാകാം.എന്നാൽ സാധാരണ റോഡ് ഉപയോഗത്തിലുള്ള കാറുകളിൽ ഈ വ്യത്യാസം വളരെ വലുതല്ല. ടയറിൽ ചെറിയ ചോർച്ചയുണ്ടെങ്കിൽ നൈട്രജൻ നിറച്ചാലും പ്രഷർ കുറയും.
മൈലേജ് കൂടുമോ?
നൈട്രജൻ നിറച്ചാൽ ഇന്ധനക്ഷമത ഗണ്യമായി വർധിക്കുമെന്നതിന് ശക്തമായ തെളിവില്ല. ടയറിലെ ശരിയായ പ്രഷർ നിലനിർത്തുന്നതാണ് മൈലേജിനെ കൂടുതൽ സ്വാധീനിക്കുന്നത്. പ്രഷർ കുറവുള്ള ടയറുകൾ കൂടുതൽ റോളിംഗ് റെസിസ്റ്റൻസ് ഉണ്ടാക്കുകയും ഇന്ധന ഉപഭോഗം വർധിപ്പിക്കുകയും ചെയ്യും.
ചൂടിൽ പ്രഷർ ഉയരുമോ?
നൈട്രജൻ നിറച്ചാലും ടയർ ചൂടാകുന്പോൾ അതിനുള്ളിലെ വാതകം വികസിക്കുകയും പ്രഷർ ഉയരുകയും ചെയ്യും. അതിനാൽ നൈട്രജൻ നിറച്ചാൽ ചൂടുമൂലമുള്ള പ്രശ്നമുണ്ടാകില്ല എന്നു പറയാനാകില്ല.
ടയറിന്റെ ആയുസ് കൂടുമോ?
നൈട്രജനിൽ ഈർപ്പം വളരെ കുറവായതിനാൽ ടയറിന്റെയും റിമ്മിന്റെയും അകത്തെ ഭാഗങ്ങളിൽ ഈർപ്പവുമായി ബന്ധപ്പെട്ട പ്രശ്നങ്ങൾ കുറയ്ക്കാൻ സഹായിക്കാം. എന്നാൽ സാധാരണ കാറിന്റെ ടയറിന്റെ ആയുസ് നൈട്രജൻ മാത്രം ഉപയോഗിച്ചതുകൊണ്ട് വർധിക്കില്ല. ടയറിന്റെ ഗുണനിലവാരം, പ്രഷർ, വീൽ അലൈൻമെന്റ്, ഡ്രൈവിംഗ് രീതി, റോഡ് സാഹചര്യം എന്നിവയെ ആശ്രയിച്ചിരിക്കും.
അപ്പോൾ എയർ മതിയോ?
ദൈനംദിന ഉപയോഗത്തിലുള്ള കാറുകൾക്ക് നല്ല നിലവാരത്തിലുള്ള സാധാരണ അന്തരീക്ഷ വായു മതിയാകും. നൈട്രജൻ സൗജന്യമായോ ചെറിയ ചെലവിലോ ലഭിക്കുന്നുണ്ടെങ്കിൽ ഉപയോഗിക്കുന്നതിൽ പ്രശ്നമില്ല. എന്നാൽ അതിനായി അധിക പണം ചെലവഴിക്കുന്നത് സാധാരണ വാഹന ഉടമയ്ക്ക് വലിയ പ്രയോജനം നൽകണമെന്നില്ല.
നൈട്രജനിലേക്ക് മാറുന്പോൾ
എയറിൽനിന്ന് നൈട്രജനിലേക്ക് മാറുന്പോൾ ടയറിലെ മുഴുവൻ എയറും കളഞ്ഞിട്ട് വേണം നൈട്രജൻ നിറയ്ക്കാൻ. പകുതി എയർ പകുതി നൈട്രജൻ എന്നത് യാതൊരു ഗുണവും ചെയ്യില്ല.
ഓർക്കുക
ടയറിൽ എന്ത് നിറച്ചാലും ഒരു കാര്യം മറക്കരുത്. ശരിയായ പ്രഷർ. വാഹന നിർമാതാവ് നിർദേശിക്കുന്ന ടയർ പ്രഷർ കൃത്യമായി പാലിക്കുകയും ഇടയ്ക്കിടെ പരിശോധിക്കുകയും ചെയ്യുന്നതാണ് ടയറിന്റെ സുരക്ഷയ്ക്കും മൈലേജിനും ഏറ്റവും പ്രധാനപ്പെട്ടത്.
Deepika
E-paper LOGIN
LOGIN
