മൂവാറ്റുപുഴ: നിര്മല കോളജ് ഡീന് ഓഫ് ഗ്ലോബല് എന്ഗേജ്മെന്റ് ആൻഡ് കമ്യൂണിറ്റി ഇംപാക്ടിന്റെയും വനിതാ സെല്ലിന്റെയും ആഭിമുഖ്യത്തില് സംഘടിപ്പിക്കുന്ന ഷീ ലീഡ്സ് ത്രിദിന വനിതാ സംരംഭകത്വ സമ്മേളനം ഇന്നുമുതല് 21 വരെ കോളജില് നടക്കും.
സമാപന ദിവസമായ 21നു രാവിലെ 11ന് കോളജിന്റെ വനിതാ സംരംഭകത്വം പ്രോത്സാഹനത്തിനുള്ള നിര്മല ഷീ കണക്ട്സ് ഡിജിറ്റല് പ്ലാറ്റ്ഫോം മുഖ്യമന്ത്രി വി.ഡി. സതീശന് ഉദ്ഘാടനം ചെയ്യും.
സംരംഭകത്വം ആഗ്രഹിക്കുന്നവര്ക്കും നിലവില് സംരംഭങ്ങള് നടത്തുന്നവര്ക്കും ഒരേ വേദിയില് മാര്ഗനിര്ദേശവും പിന്തുണയും ലഭ്യമാക്കുകയാണ് പദ്ധതിയുടെ ലക്ഷ്യം. ബിസിനസ് ആശയങ്ങളുടെ വികസനം, സംരംഭകത്വ പരിശീലനം, പ്രോജക്ട് റിപ്പോര്ട്ട് തയാറാക്കല്, ബാങ്ക് വായ്പാ സൗകര്യങ്ങള്, സര്ക്കാര് പദ്ധതികള്, നിയമപരമായ രജിസ്ട്രേഷന്, വിപണന സാധ്യതകള് എന്നിവയില് പ്ലാറ്റ്ഫോം സഹായം നല്കും. ബാങ്കുകള്, സര്ക്കാര് വകുപ്പുകള്, സാമ്പത്തിക വിദഗ്ധര്, വിജയകരമായ സംരംഭകര് എന്നിവരുമായി വനിതാ സംരംഭകരെ ബന്ധിപ്പിക്കുന്നതിനും സംവിധാനം സഹായകമാകും.
നിര്മല കോളജില് പ്രവര്ത്തിക്കുന്ന സംരംഭം വനിതകളുടെ സാമ്പത്തിക സ്വയംപര്യാപ്തതയും സംരംഭകത്വ ശേഷിയും വളര്ത്തുന്നതിനുള്ള അക്കാദമിക സാമൂഹിക ഇടപെടല്കൂടിയാണ്.100 സ്ത്രീകള് 100 ജീവിതങ്ങള്, അവബോധത്തില്നിന്ന് പ്രവര്ത്തനത്തിലേക്ക് എന്നതാണ് സമ്മേളനത്തിന്റെ പ്രമേയം.
ഇന്നു രാവിലെ 10ന് എറണാകുളം ജില്ലാ കളക്ടര് ജി. പ്രിയങ്ക സമ്മേളനം ഉദ്ഘാടനം ചെയ്യും. മൂവാറ്റുപുഴ, ആവോലി, കോതമംഗലം, തൊടുപുഴ മേഖലകളിലെ കുടുംബശ്രീ അംഗങ്ങള്, വനിതാ സംരംഭകര്, വിദ്യാര്ഥികള് എന്നിവര്ക്കായി സര്ക്കാര് ക്ഷേമപദ്ധതികള്, ബാങ്ക് വായ്പകള്, ഇന്ഷുറന്സ് എന്നിവയെക്കുറിച്ച് അവബോധം നല്കുകയാണ് പരിപാടിയുടെ ലക്ഷ്യം.
മൂന്നു ദിവസങ്ങളിലായി ആറു സെക്ഷനുകളും രണ്ട് പാനല് ചര്ച്ചകളും നടക്കും. ഡീന് കുര്യാക്കോസ് എംപി, മാത്യു കുഴല്നാടന് എംഎല്എ, ചീഫ് വിപ്പ് അപു ജോണ് ജോസഫ്, ഷിബു തെക്കുംപുറം എംഎല്എ, ചലച്ചിത്രതാരം ആശ ശരത്, സര്ക്കാര് ഉദ്യോഗസ്ഥര്, പ്രമുഖ വനിതാ സംരംഭകര് എന്നിവര് വിവിധ സെഷനുകളില് പങ്കെടുക്കും.
സമ്മേളനത്തോടനുബന്ധിച്ച് വനിതാ സംരംഭകരുടെ ഉത്പന്നങ്ങളുടെ പ്രദര്ശനവും വില്പ്പനയും ഉപയോഗിക്കാത്ത വസ്തുക്കള് കൈമാറ്റം ചെയ്യാവുന്ന സ്വാപ്പ് ഷോപ്പും 21ന് പ്രത്യേക ഫുഡ് ഫെസ്റ്റും ഒരുക്കിയിട്ടുണ്ട്.
സൗത്ത് ഇന്ത്യന് ബാങ്ക്, എസ്ബിഐ, എന്റെ നാട് കൂട്ടായ്മ, ആവോലി പഞ്ചായത്ത്, മൂവാറ്റുപുഴ നഗരസഭ തുടങ്ങിയവയുടെ സഹകരണത്തോടെയാണ് പരിപാടി സംഘടിപ്പിക്കുന്നത്.
കോതമംഗലം ബിഷപ് മാര് ജോര്ജ് മഠത്തിക്കണ്ടത്തില്, മാനേജര് മോണ്. ഡോ. പയസ് മലേക്കണ്ടത്തില്, പ്രിന്സിപ്പല് ഫാ.ഡോ. ജസ്റ്റിന് കെ. കുര്യാക്കോസ് എന്നിവര് നേതൃത്വം നല്കും.