പറവൂർ: ചേന്ദമംഗലം ഭരണിമുക്കിലുള്ള ഫിഷ് സ്റ്റാളിൽ നിന്ന് പുഴുവരിച്ച മീൻ ലഭിച്ചെന്ന് പരാതി. ചേന്ദമംഗലം സ്വദേശിയായ ഷിവിൻ ഇന്നലെ രാവിലെ ഇവിടെ നിന്നും ചൂരമീൻ വാങ്ങിയ ശേഷം വീട്ടിലെത്തി കഴുകിയപ്പോഴാണ് ഇതിൽ പുഴുക്കളെ കണ്ടത്.
മീൻ വാങ്ങിയ കടക്കാരെ വിളിച്ച് വിവരം അറിയിച്ചെങ്കിലും തങ്ങൾക്ക് ഇതിൽ ഒന്നും ചെയ്യാനില്ലെന്ന മറുപടിയാണ് ലഭിച്ചതെന്ന് ഷിവിൻ പറയുന്നു. ഇവിടെ നിന്ന് മുൻപും ഭക്ഷ്യയോഗ്യമല്ലാത്ത മീൻ ലഭിച്ചതായും രാസവസ്തുവിന്റെ ഗന്ധം ഉണ്ടായിരുന്നതായും പരാതിയിലുണ്ട്. മനക്കോടം ഭാഗത്ത് പ്രവർത്തിക്കുന്ന മീൻകടയെ സംബന്ധിച്ചും സമാന രീതിയിലുള്ള പരാതികളുണ്ട്.
വിവരം പഞ്ചായത്ത് അധികാരികളെയും, ഭക്ഷ്യസുരക്ഷാ വകുപ്പിനെയും അറിയിച്ചിട്ടുണ്ട്. പഞ്ചായത്ത് ലൈസൻസില്ലാതെയാണ് ഇരു സ്ഥാപനങ്ങളും പ്രവർത്തിക്കുന്നതെന്നാണ് വിവരം. മുൻപ് പരാതി ഉയർന്നിട്ടും പഞ്ചായത്ത് ആരോഗ്യവിഭാഗം വേണ്ട നടപടികൾ സ്വീകരിച്ചില്ലെന്ന ആക്ഷേപവും ശക്തമാണ്