വാഷിംഗ്ടൺ: വെള്ളിയാഴ്ചയുണ്ടായ രാജ്യവ്യാപകമായ വിമാന നിയന്ത്രണത്തിന് പിന്നാലെ, തിങ്കളാഴ്ചയോടെ വിമാന സർവീസുകൾ പൂർണതോതിൽ പുനരാരംഭിക്കാൻ കഴിയുമെന്ന് പ്രതീക്ഷിക്കുന്നതായി യുഎസ് ഗതാഗത സെക്രട്ടറി ഷോൺ ഡഫി അറിയിച്ചു.
ഫെഡറൽ ഏവിയേഷൻ അഡ്മിനിസ്ട്രേഷന്റെ (FAA) കമ്മ്യൂണിക്കേഷൻ നെറ്റ്വർക്ക് നവീകരണത്തിനിടെയുണ്ടായ സാങ്കേതിക തകരാറാണ് രാജ്യത്തെ വിമാന ഗതാഗതത്തെ സ്തംഭിപ്പിച്ചത്. ഇത് മൂലം ശനിയാഴ്ച ആയിരക്കണക്കിന് വിമാനങ്ങൾ റദ്ദാക്കിയിരുന്നു.
തകരാറിന്റെ കൃത്യമായ കാരണം കണ്ടെത്താൻ അർക്കൻസാസിലെ എൽ ഡൊറാഡോയിലും ടെക്സസിലെ അമറില്ലോയിലുമുള്ള രണ്ട് റൂട്ടറുകൾ അന്വേഷണ ഉദ്യോഗസ്ഥർ പരിശോധിച്ചു വരികയാണ്. കരാർ കമ്പനിയായ L3 ഹാരിസിന്റെ ഭാഗത്തുനിന്നുണ്ടായ പിഴവാണോ അതോ ഉപകരണങ്ങളുടെ തകരാറാണോ ഇതിന് പിന്നിലെന്ന് പരിശോധിക്കുന്നുണ്ട്. 69 റൂട്ടറുകളുടെ ബ്രോഡ്കാസ്റ്റ് സംവിധാനം താൽക്കാലികമായി നിർത്തിവച്ചാണ് പ്രതിസന്ധി പരിഹരിച്ചത്.
എയർ ട്രാഫിക് കൺട്രോൾ സംവിധാനം പൂർണമായും നവീകരിക്കുന്നതിനായി കോൺഗ്രസിൽ നിന്ന് 50 ബില്യൺ ഡോളർ ആവശ്യപ്പെടുമെന്നും ഡഫി വ്യക്തമാക്കി. നവീകരണ പ്രവർത്തനങ്ങൾ വേഗത്തിലാക്കാൻ കൂടുതൽ ഫണ്ട് അനുവദിക്കണമെന്ന് പ്രസിഡന്റ് ഡോണൾഡ് ട്രംപും ആവശ്യപ്പെട്ടിട്ടുണ്ട്.