ന്യൂഡൽഹി: ഇറാനിലെ സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്ന് ഇന്ത്യൻ വിദേശകാര്യ സെക്രട്ടറി വിക്രം മിസ്രി. ദ്വിദിന സന്ദർശനത്തിനായി ജർമൻ ചാൻസലർ ഫ്രീഡ്രിഷ് മെർസ് ഇന്ത്യയിലെത്തിയതിനു പിന്നാലെ നടത്തിയ പത്ര സമ്മേളനത്തിലാണ് മിസ്രി നിലപാട് വ്യക്തമാക്കിയത്.
നമ്മുടെ പ്രവാസികളുടെയും വിദ്യാർഥികളുടെയും ഒരു സമൂഹം ഇറാനിലുണ്ട്. ഇറാനിലെ സംഭവവികാസങ്ങൾ നിരീക്ഷിക്കുകയാണ്. നിയന്ത്രണങ്ങൾക്കിടെയും ഇറാനിലെ ഇന്ത്യൻ വിദ്യാർഥികളുമായി എംബസിക്ക് ബന്ധപ്പെടാൻ കഴിഞ്ഞു.
ആർക്കും ഇതുവരെ പ്രതിസന്ധികളില്ല. പുറത്തിറങ്ങരുതെന്നും പ്രശ്നങ്ങളിൽപ്പെടരുതെന്നും നിർദേശം കൊടുത്തിട്ടുണ്ടെന്നും വിക്രം മിസ്രി പറഞ്ഞു.