കടുത്തുരുത്തി: പ്രാദേശിക ജലസംഭരണികളായ നാട്ടിലെ ജലാശയങ്ങള് ശുചിയാക്കണമെന്ന ആവശ്യം ശക്തം. തോടുകളും കുളങ്ങളും കൈത്തോടുകളും ഉള്പ്പടെയുള്ള നാട്ടിലെ ജനസംഭരണികളെല്ലാം മാലിന്യം നിറഞ്ഞ അവസ്ഥയിലാണ്. പ്രശ്നപരിഹാരത്തിന് നടപടികളില്ലെന്നാണു നാട്ടുകാരുടെ പരാതി. ജലാശയങ്ങള് ശുചീകരിക്കണമെന്നും കുടിവെള്ള സ്രോതസുകള് മലിമാക്കുന്നവര്ക്കെതിരേ നടപടികള് വേണമെന്നും ആവശ്യം ശക്തമാണെങ്കിലും അധികൃതരുടെ ഭാഗത്തുനിന്നും യാതൊരു നടപടികളുമില്ല.
പ്രദേശത്തെ തോടുകളെല്ലാം മാലിന്യം നിറഞ്ഞ് ഉപയോഗശൂന്യമായിട്ട് വര്ഷങ്ങളായി. വേനല് ശക്തമായാല് പ്രദേശവാസികളെല്ലാം കുടിവെള്ളത്തിനായി പരക്കം പായുന്ന അവസ്ഥ നാട്ടില് വ്യാപകമാണെങ്കിലും നിറയെ വെള്ളമുള്ള ജലാശങ്ങള് മാലിന്യം മൂടി കിടക്കുന്നത് പരിഹരിക്കാന് നടപടികളില്ല. മാലിന്യം നിറഞ്ഞ ജലാശയങ്ങളെല്ലാം ദുര്ഗന്ധം വമിക്കുന്ന അവസ്ഥയിലാണ്. നീരെഴുക്കില്ലാത്ത തോടുകളില് ഖരമാലിന്യങ്ങളും പ്ലാസ്റ്റിക് മാലിന്യങ്ങളുമെല്ലാം കുമിഞ്ഞുകൂടുകയാണ്. പായലിനോടെപ്പം പ്ലാസ്റ്റിക്ക് ചാക്കുകളില് ഉപേക്ഷിക്കപ്പെട്ട മാലിന്യം ഇവിടത്തെ ജലാശയങ്ങളില് സ്ഥിരം കാഴ്ചയാണ്.
തോടുകളോട് ചേര്ന്ന് റോഡുകളുള്ള ഭാഗങ്ങളിലാണ് കൂടുതലായും മാലിന്യം തള്ളുന്നത്. തോടുകളിലേക്ക് വലിച്ചെറിയുന്ന മാലിന്യം ഒഴുകി പലയിടത്തായി തങ്ങിനില്ക്കുന്ന സ്ഥിതിയാണ്. ഇതുമൂലം നൂറുകണക്കിനാളുകള് കുളിക്കുന്നതിനും അലക്കുന്നതിനും പാത്രങ്ങള് കഴുകുന്നതിനുമെല്ലാമായി ഉപയോഗിക്കുന്ന തോട്ടിലെ വെള്ളം മലിനമാവുകയാണ്. തോട്ടിലേക്കു മറിഞ്ഞുവീണിരിക്കുന്ന മരക്കമ്പുകളിലും തോടിന്റെ വശങ്ങളിലെ പള്ളയിലുമെല്ലാം ഇത്തരത്തില് മാലിന്യങ്ങള് വന്നുനിറയുകയാണ്. കടുത്തുരുത്തി വലിയതോട്ടില് തന്നെ ഇത്തരത്തില് നിരവധി സ്ഥലങ്ങളിലാണ് മാലിന്യങ്ങള് തങ്ങിനില്ക്കുന്നത്.
കുപ്പികളും പ്ലാസ്റ്റിക്കും ചാക്കില് കെട്ടി തള്ളിയതും ഉള്പ്പടെയുള്ള മാലിന്യങ്ങളാണ് പലയിടത്തായി കെട്ടിനില്ക്കുന്നത്. തോടരികിലൂടെ പോകുമ്പോള് മാലിന്യത്തില് നിന്നുള്ള ദുര്ഗന്ധം മൂലം മൂക്ക് പൊത്തേണ്ട സ്ഥിതിയാണ്. തോട്ടില് മാലിന്യങ്ങള് കെട്ടിനില്ക്കുന്നത് ഗുരുതരമായ ആരോഗ്യ പ്രശ്നങ്ങള്ക്കു കാരണമാകുമെന്നു നാട്ടുകാര് മുന്നറിയിപ്പ് നല്കുന്നു. തോട്ടില് കെട്ടിനില്ക്കുന്ന മാലിന്യം നീക്കം ചെയ്യാന് നടപടി സ്വീകരിക്കണമെന്നും നാട്ടുകാര് ആവശ്യപ്പെട്ടു.
കടുത്തുരുത്തി വലിയ തോട്ടില് റെയില്വമേല്പാലത്തിന് സമീപത്തായി കൂറ്റന് മരം മറിഞ്ഞുവീണു കിടക്കുന്ന ഭാഗത്ത് ഇത്തരത്തില് ടൺകണക്കിന് മാലിന്യമാണ് തങ്ങി നില്ക്കുന്നത്.
റോഡരികില് നിന്നിരുന്ന മരം മറിഞ്ഞു തോട്ടിലേക്കു വീണതാണ് മാലിന്യങ്ങള് ഈ പ്രദേശത്ത് കെട്ടിക്കിടക്കാന് കാരണമായത്. നിരവധിയാളുകള് കുളിക്കുന്നതിനും അലക്കുന്നതിനുമുപയോഗിക്കുന്ന തോട്ടിലാണ് ഇത്തരത്തില് മാലിന്യങ്ങള് കെട്ടിക്കിടക്കുന്നത്. വലിയ തോട്ടിലും ചുള്ളിത്തോട്ടിലും ഉള്പ്പടെ പലയിടത്തും ഇത്തരത്തില് മാലിന്യം കെട്ടിക്കിടക്കുന്നുണ്ട്. ജലസ്രോതസുകളായ തോടുകളിലും പുഴകളിലുമെല്ലാം സാമൂഹ്യവിരുദ്ധര് മാലിന്യം തള്ളുന്നതാണ് ഒഴുക്ക് ശക്തമാകുമ്പോള് താഴേക്ക് ഒഴുകിയെത്തുന്നത്. തോടുകളിലും മറ്റും പ്ലാസ്റ്റിക്ക് കുപ്പികളടക്കമുള്ള മാലിന്യങ്ങള് നിറഞ്ഞിരിക്കുകയാണ്. തോടുകളും റോഡിന്റെ വശങ്ങളും ഓടകളും എന്നിങ്ങനെ മാലിന്യം തള്ളാന് എവിടെയും സാമൂഹ്യവിരുദ്ധര് ഉപയോഗപ്പെടുത്തുകയാണ്. ജലാശയങ്ങളില് മാലിന്യം നിറയുന്നത് ഗുരുതരമായ ഭവിഷത്താണ് ക്ഷണിച്ചുവരുത്തുന്നത്.
പലയിടത്തും മാലിന്യം മലപോലെ പെരുകുകയാണ്. റോഡിന്റെ വശങ്ങളും തോടുകളും ജലാശയങ്ങളുമെല്ലാം മാലിന്യം ഉപേക്ഷിക്കുന്ന കേന്ദ്രങ്ങളായിട്ടും ഇക്കാര്യത്തില് അധികൃതരുടെ ഭാഗത്തുനിന്നും യാതൊരു നടപടികളുമില്ലെന്നും നാട്ടുകാര് പറയുന്നു. തോട്ടിലും റോഡിന്റെ വശങ്ങളിലും രാത്രിയില് സമൂഹ്യ വിരുദ്ധര് മാലിന്യങ്ങള് പ്ലാസ്റ്റിക് കവറുകളിലാക്കി വാഹനങ്ങളിലെത്തിച്ചു തള്ളുന്ന അവസ്ഥയും തുടരുകയാണ്. ഇത്തരക്കാരെ കണ്ടെത്തി ശക്തമായ നടപടി സ്വീകരിക്കണമെന്നാണ് ജനങ്ങളുടെ ആവശ്യം.