അടുത്ത നിയമസഭാ തെരഞ്ഞെടുപ്പിന് രണ്ടുവർഷം ശേഷിക്കെ, കർണാടക രാഷ്ട്രീയത്തിൽ നിർണായക നീക്കങ്ങൾക്ക് തുടക്കമായിരിക്കുന്നു. ബിജെപിയുടെ തകർക്കാനാകാത്ത ശക്തിദുർഗമായ തീരദേശ കർണാടകയിലേക്ക് കടന്നുകയറാൻ കോൺഗ്രസിലെ പ്രമുഖ തന്ത്രജ്ഞനും മുഖ്യമന്ത്രിയുമായ ഡി.കെ. ശിവകുമാർ വ്യക്തമായ പദ്ധതികളോടെ രംഗത്തിറങ്ങിക്കഴിഞ്ഞു. മുഖ്യമന്ത്രിയായി സ്ഥാനമേറ്റ് 100 ദിവസം പിന്നിട്ടതിന്റെ ഭാഗമായി, ചരിത്രത്തിലാദ്യമായി മംഗളൂരുവിൽ പ്രത്യേക മന്ത്രിസഭാ യോഗം ചേർന്നത് ഈ നീക്കത്തിന്റെ കൃത്യമായ സൂചനയാണ്.
2024ലെ ലോക്സഭാ തെരഞ്ഞെടുപ്പിലടക്കം ദക്ഷിണ കന്നഡ, ഉഡുപ്പി-ചിക്കമഗളൂരു മണ്ഡലങ്ങളിൽ വൻ വിജയം നേടിയ ബിജെപിയുടെ പരമ്പരാഗത വോട്ട് ബാങ്കിലേക്ക് കടന്നുകയറാനാണ് കോൺഗ്രസ് ലക്ഷ്യമിടുന്നത്. ഇതിനായി ബംഗളൂരുവിനു പുറത്തുള്ള ആദ്യ മന്ത്രിസഭാ യോഗത്തിന് മംഗളൂരു പടിയിലെ ‘പ്രജാ സൗധ’ വേദിയായി. മുഖ്യമന്ത്രിയും മന്ത്രിമാരും തുറന്ന ബസിൽ യോഗസ്ഥലത്തേക്കെത്തിയത് വലിയ ജനശ്രദ്ധ നേടി.
"ടീം കർണാടക' എന്ന ആശയം മുൻനിർത്തി വികേന്ദ്രീകൃത വികസനം ഉറപ്പാക്കാനാണു സർക്കാർ ശ്രമിക്കുന്നതെന്ന് യോഗത്തിനു മുന്നോടിയായി ഡി.കെ. ശിവകുമാർ വ്യക്തമാക്കി. മുതിർന്ന നേതാവ് സിദ്ധരാമയ്യയുടെ ‘അഹിന്ദ’ (പിന്നാക്ക-ന്യൂനപക്ഷ-ദളിത്) കൂട്ടുകെട്ടിനുപുറമെ, ആർഎസ്എസ് ശക്തികേന്ദ്രങ്ങളിൽ ഹൈന്ദവ ക്ഷേത്രങ്ങളുടെ വികസനവും പ്രാദേശിക വികാരങ്ങളും മുൻനിർത്തി സ്വന്തം സ്വാധീനം ഉറപ്പിക്കാനാണു ഡികെയുടെ ശ്രമം.
തുളുനാടിന് ഔദ്യോഗിക ഭാഷാപെരുമ
തീരദേശ കർണാടകയുടെ പതിറ്റാണ്ടുകളായുള്ള സാംസ്കാരിക ആവശ്യത്തിനാണ് ഒടുവിൽ അംഗീകാരമായിരിക്കുന്നത്. ദക്ഷിണ കന്നഡ, ഉഡുപ്പി ജില്ലകളിൽ തുളു ഭാഷയെ കന്നഡയ്ക്കൊപ്പം കർണാടകയുടെ രണ്ടാമത്തെ ഔദ്യോഗിക ഭാഷയായി അംഗീകരിക്കാൻ പ്രത്യേക മന്ത്രിസഭായോഗം തീരുമാനിച്ചു.
2008ൽ ബിജെപി നേതാവും മുൻ മുഖ്യമന്ത്രിയുമായ ബി.എസ്. യെദിയൂരപ്പ വാഗ്ദാനം ചെയ്ത കാര്യമാണിത്. ദീർഘകാലം ഭരണത്തിലിരുന്നിട്ടും ബിജെപി നടപ്പാക്കാത്ത വാഗ്ദാനം യാഥാർഥ്യമാക്കിയതിലൂടെ വലിയൊരു രാഷ്ട്രീയനേട്ടമാണ് ഡി.കെ. ശിവകുമാർ സ്വന്തമാക്കിയത്. “മുൻ സർക്കാരുകൾ എന്തുകൊണ്ട് ഇതു ചെയ്തില്ലെന്ന് ചോദിക്കുന്നില്ല; ജനങ്ങളോടു ഞങ്ങൾക്ക് പ്രതിബദ്ധതയുണ്ട്, വികാരങ്ങളെ വച്ച് ഞങ്ങൾ രാഷ്ട്രീയം കളിക്കാറില്ല,” എന്നായിരുന്നു തീരുമാനത്തോട് ഡികെയുടെ പ്രതികരണം.
ഭാഷയുടെ പ്രചാരണത്തിനും വിവർത്തനത്തിനും പരിശീലനങ്ങൾക്കുമായി പ്രതിവർഷം 82 ലക്ഷം രൂപ അനുവദിക്കാനും സർക്കാർ തീരുമാനിച്ചു. ഇത് തുളു ഭാഷയെ ഭരണഘടനയുടെ എട്ടാം ഷെഡ്യൂളിൽ ഉൾപ്പെടുത്താനുള്ള ശ്രമങ്ങൾക്ക് വേഗം കൂട്ടും. കൂടാതെ, ഭാഷാസ്വത്വത്തെ ചേർത്തുപിടിച്ചുകൊണ്ട് ‘ദക്ഷിണ കന്നഡ’ ജില്ലയെ ‘മംഗളൂരു’ എന്ന് പുനർനാമകരണം ചെയ്യാനുള്ള കരട് വിജ്ഞാപനം പുറപ്പെടുവിക്കാനും മന്ത്രിസഭായോഗം തീരുമാനിച്ചു.
ഇതിനു പുറമെ തീരദേശ ജില്ലകളുടെ വികസനത്തിന് 32,611 കോടിയുടെ പാക്കേജും പ്രഖ്യാപിച്ചിട്ടുണ്ട്. വിവിധ ക്ഷേത്രങ്ങളുടെ വികസനം, പുത്തൂരിൽ 549.79 കോടി രൂപ ചെലവിൽ പുതിയ സർക്കാർ മെഡിക്കൽ കോളജും ആശുപത്രിയും വിവിധ റോഡ് വികസന പദ്ധതികളും ഇതിലുൾപ്പെടുന്നു. മംഗളൂരു ഫിഷറീസ് കോളജിനെ സർവകലാശാലയായി ഉയർത്താനും തീരുമാനിച്ചു.
തീരദേശ രാഷ്ട്രീയവും ബിജെപിയുടെ ആശങ്കകളും
കഴിഞ്ഞ മൂന്നു പതിറ്റാണ്ടുകളായി ബിജെപിയുടെ അടിയറവില്ലാത്ത കോട്ടയാണ് ദക്ഷിണ കന്നഡയും ഉഡുപ്പിയും. 1991 മുതൽ ബിജെപി കൈയടക്കിവച്ചിരിക്കുന്ന ദക്ഷിണ കന്നഡയിൽ 2024ലും ബിജെപിയുടെ ക്യാപ്റ്റൻ ബ്രിജേഷ് ചൗട്ടയാണു വിജയിച്ചത്. 2023ലെ നിയമസഭാ തെരഞ്ഞെടുപ്പിലും ഉഡുപ്പിയിലെ അഞ്ചു സീറ്റുകളും ദക്ഷിണ കന്നഡയിലെ എട്ടിൽ ആറു സീറ്റുകളും ബിജെപി നേടിയിരുന്നു. എന്നാൽ, വർഗീയ-ആശയപരമായ അജൻഡകൾക്കു മുകളിൽ പ്രാദേശിക വികസനവും സാംസ്കാരികത്തനിമയും ഉയർത്തിക്കാട്ടി കോൺഗ്രസ് നടത്തുന്ന ഈ കടന്നുകയറ്റം ബിജെപിയെ പ്രതിരോധത്തിലാക്കിയിട്ടുണ്ട്.
ആഭ്യന്തരതർക്കങ്ങളിൽ ഉഴലുന്ന ബിജെപി നേതൃത്വം പാർട്ടിയിൽ ഐക്യം പുനഃസ്ഥാപിക്കാനുള്ള ശ്രമങ്ങളിലാണ്. വാല്മീകി കോർപറേഷൻ അഴിമതി, കെപിഎസ്സി പരീക്ഷാക്രമക്കേടുകൾ എന്നിവയ്ക്കെതിരേ സംസ്ഥാന പ്രസിഡന്റ് ബി.വൈ. വിജയേന്ദ്ര നയിച്ച 200 കിലോമീറ്ററോളം ദൈർഘ്യമുള്ള ‘ബെല്ലാരി ചലോ’ പദയാത്ര വിജയകരമായി പൂർത്തിയായി. വിജയേന്ദ്രയുടെ നേതൃത്വത്തിനെതിരേ ബസനഗൗഡ പാട്ടീൽ യത്നാൽ, കെ.എസ്. ഈശ്വരപ്പ തുടങ്ങിയ മുതിർന്ന നേതാക്കൾ പരസ്യമായി രംഗത്തെത്തിയിരുന്നെങ്കിലും പദയാത്രയുടെ സമാപനത്തിൽ ബി.എസ്. യെദിയൂരപ്പ, ബസവരാജ് ബൊമ്മൈ, ആർ. അശോക് എന്നിവർ ഒന്നിച്ചെത്തിയത് വിജയേന്ദ്രയ്ക്ക് കരുത്തായി. എങ്കിലും സഖ്യകക്ഷിയായ ജെഡി-എസുമായി വേണ്ടത്ര ഏകോപനം ഉണ്ടായിരുന്നില്ലെന്ന വിമർശനം നിലനിൽക്കുന്നുണ്ട്.
പുതിയ ജാതി സമവാക്യങ്ങളും ഭാവി രാഷ്ട്രീയവും
ജാതി സമവാക്യങ്ങൾക്ക് ഏറെ പ്രാധാന്യമുള്ള സ്ഥലമാണു കർണാടക. പ്രബല വിഭാഗമായ വൊക്കലിഗ സമുദായത്തിൽനിന്നുള്ള ഡി.കെ. ശിവകുമാർ മുഖ്യമന്ത്രിസ്ഥാനത്തേക്ക് എത്തിയതോടെ ജാതി സമവാക്യങ്ങൾ പുനഃപരിശോധിക്കാൻ ബിജെപി നിർബന്ധിതരായിരിക്കുന്നു.
ബിജെപിയുടെ പ്രധാന വോട്ടുബാങ്കായ ലിംഗായത്ത് സമുദായത്തിൽ വിജയേന്ദ്രയുടെ കടന്നുവരവോടെ അസ്വാരസ്യങ്ങൾ ഉടലെടുത്തിട്ടുണ്ട്. വൊക്കലിഗ വോട്ടുകൾ ലക്ഷ്യമിട്ട് ജെഡി-എസ് നേതാവും കേന്ദ്രമന്ത്രിയുമായ എച്ച്.ഡി. കുമാരസ്വാമിയെ മുൻനിർത്തി ബിജെപി ഡി.കെ. ശിവകുമാറിനെ പ്രതിരോധിക്കാൻ ശ്രമിക്കുന്നുണ്ടെങ്കിലും ഒരു വൊക്കലിഗക്കാരൻ മുഖ്യമന്ത്രിയായത് കോൺഗ്രസിന് അനുകൂലമായേക്കാം. സിദ്ധരാമയ്യയെ മുഖ്യമന്ത്രിസ്ഥാനത്തുനിന്ന് മാറ്റിയതിൽ കുറുബ സമുദായത്തിനുള്ള അതൃപ്തി മുതലെടുക്കാൻ ബിജെപി നീക്കം നടത്തുന്നുണ്ട്.
പരമ്പരാഗതമായി കല്യാണ കർണാടക (ഹൈദരാബാദ്-കർണാടക), പഴയ മൈസൂരു മേഖലകളാണ് കോൺഗ്രസിന്റെ ഏറ്റവും വലിയ ശക്തികേന്ദ്രങ്ങൾ. എഐസിസി അധ്യക്ഷൻ മല്ലികാർജുൻ ഖാർഗെയുടെ ജന്മനാടായ മധ്യ കർണാടകയിലെ കലാബുരാഗി ഉൾപ്പെടുന്ന കല്യാണ കർണാടകയിൽ തുടർച്ചയായി വലിയ മുന്നേറ്റമാണു പാർട്ടി കാഴ്ചവയ്ക്കുന്നത്. കലാബുരാഗി, ബിദാർ, റായ്ച്ചുർ, ബെല്ലാരി തുടങ്ങി ഏഴു ജില്ലകളിലായി പരന്നുകിടക്കുന്ന ഈ മേഖലയിൽ നിയമസഭാ, ലോക്സഭാ തെരഞ്ഞെടുപ്പുകളിൽ ഭൂരിഭാഗം സീറ്റുകളും കോൺഗ്രസ് നേടിയിരുന്നു.
ജെഡി-എസിന്റെ കോട്ടയായിരുന്ന പഴയ മൈസൂരു മേഖലയിൽ വൊക്കലിഗ സമുദായത്തിന് പ്രാബല്യമുള്ള മൈസൂരു, മാണ്ഡ്യ, രാമനഗര, ചാമരാജനഗർ തുടങ്ങിയ ജില്ലകളിലും കഴിഞ്ഞ നിയമസഭാ തെരഞ്ഞെടുപ്പിൽ കോൺഗ്രസ് മികച്ച വിജയം നേടിയിരുന്നു.
ലിംഗായത്ത് സമുദായത്തിന് മേധാവിത്വമുള്ള വടക്കൻ കർണാടകയിലെ കിത്തൂർ കർണാടകയിലും (ബോംബെ-കർണാടക) മധ്യ കർണാടകയിലെ ദാവൺഗെരെ, ചിത്രദുർഗ എന്നിവിടങ്ങളിലും സമാനമായ മാറ്റങ്ങൾ പ്രകടമാണ്.
എന്നാൽ, ഈ മേഖലകളിലെ മുൻതൂക്കത്തിനു പുറമെ ബിജെപിയുടെ ആധിപത്യം തകർത്ത് ദക്ഷിണ കന്നഡ, ഉഡുപ്പി തുടങ്ങിയ തീരദേശ കർണാടകയിലും മേൽക്കൈ നേടാനുള്ള നീക്കങ്ങളാണ് കോൺഗ്രസ് നടത്തുന്നത്. ബിജെപിയുടെ സാംസ്കാരിക-വികസന അജൻഡകളെ അവരുടെ സ്വന്തം തട്ടകത്തിൽ വച്ചുതന്നെ വെല്ലുവിളിച്ചുകൊണ്ട് ഡി.കെ. ശിവകുമാർ തുടക്കമിട്ട ഈ നീക്കങ്ങൾ വരുംദിവസങ്ങളിൽ കർണാടക രാഷ്ട്രീയത്തിൽ വലിയ മാറ്റങ്ങൾക്കു വഴിവയ്ക്കുമെന്ന് ഉറപ്പാണ്.
Deepika
E-paper LOGIN
LOGIN
