പാലാ: നാനൂറ് ചുവട് കറിവേപ്പ്, പേര, റംബുട്ടാന്‍, പ്ലാവ് ഇങ്ങനെ ഓറഞ്ചുവരെ വിളഞ്ഞുനില്‍ക്കുന്ന പഴത്തോട്ടം. ചേനയും ചേമ്പും കാച്ചിലും പയറും വെണ്ടയുമടക്കം പച്ചക്കറികള്‍. ഇടവിളയായി കാപ്പി. പാലാ - തൊടുപുഴ റൂട്ടില്‍ പയപ്പാര്‍ മുണ്ടാങ്കല്‍ കാനാട്ട് പ്രമോദ് ജോസഫിന്‍റേതാണ് ഈ കൃഷിയിടം. 36 വര്‍ഷത്തോളം നീണ്ട അധ്യാപന ജീവിതത്തില്‍നിന്നു വിരമിച്ചതോടെയാണ് മുഴുവന്‍ സമയ കര്‍ഷകനായി പ്രമോദ് മാറിയത്.
2023 ലാണ് മൂലമറ്റം സെന്‍റ് ജോസഫ് കോളജിലെ അസിസ്റ്റന്‍റ് പ്രഫസറായി വിരമിച്ചത്. കഴിഞ്ഞ മൂന്നു വര്‍ഷമായി കൃഷിക്കൊപ്പമാണ് പ്രമോദ്. എല്ലാ ദിവസവും അതിരാവിലെ കൃഷിയിടത്തിലേക്ക് ഇറങ്ങും. പത്ത് ഏക്കറിലായാണ് കൃഷി. വീടിന്‍റെ ഒരു കിലോമീറ്റര്‍ ചുറ്റളവിലാണ് കൃഷിയിടങ്ങളെല്ലാം.
അറുനൂറോളം പേര, 550 വിയറ്റ്‌നാം ഏര്‍ളി പ്ലാവ്, 160 റംബുട്ടാന്‍, 90 റെഡ് ലേഡി പപ്പായ, 50 മാംഗോസ്റ്റിന്‍, 15 ഓറഞ്ച് ഇങ്ങനെ പോകുന്നു പ്രമോദിന്‍റെ തോട്ടത്തിലെ പഴങ്ങള്‍. കറിവേപ്പ്, ചേന, ചേമ്പ്, വഴുതന, പയര്‍, കോവല്‍, വെണ്ട, പീച്ചിങ്ങ, പാവല്‍, മുളക്, നിത്യ വഴുതന തുടങ്ങിയവയാണ് പച്ചക്കറികള്‍. ഇതിനൊപ്പം ഇടവിളയായി കാപ്പിയും കമുകുമുണ്ട്.
സുഗന്ധദ്രവ്യങ്ങള്‍ നിര്‍മിക്കാനുപയോഗിക്കുന്ന ഊദ് മരവും പറമ്പില്‍ വളരുന്നു. കറിവേപ്പിലയടക്കം വിളകളെല്ലാം വീടിനടുത്തുതന്നെയുള്ള കടകളിലാണ് വില്‍ക്കുന്നത്. ആവശ്യക്കാര്‍ വരുന്നതിനനുസരിച്ച് പറിച്ച് വില്‍ക്കുന്നതിനാല്‍ നല്ല വില ലഭിക്കാറുണ്ടെന്ന് പ്രമോദ് പറയുന്നു.
ദിവസവും കുറഞ്ഞത് 500 രൂപയോളം വരുമാനം ലഭിക്കും. രാസവളം ഉപയോഗിക്കാതെ തീര്‍ത്തും ജൈവരീതിയിലാണ് കൃഷിയിടത്തിലെ വളപ്രയോഗം. ചാണകം, ശര്‍ക്കര, കടലപ്പിണ്ണാക്ക്, വേപ്പിന്‍ പിണ്ണാക്ക് ഇവയുടെ മിശ്രിതം കൊണ്ട് വീട്ടില്‍ത്തന്നെ ഉണ്ടാക്കിയെടുക്കുന്ന ജൈവ വളമാണ് കൃഷിക്ക് ഉപയോഗിക്കുന്നത്.
ഭാര്യ റോസ്മിയും മക്കളായ ജോവാന, ജസ്റ്റീന, എല്‍ബിനെറ്റ്, ജൂലിയാന എന്നിവരും പ്രമോദിന് പൂര്‍ണ പിന്തുണയുമായി ഒപ്പമുണ്ട്.
Deepika
Corehub Solutions
E-paper LOGIN
LOGIN