കോട്ടയം: കെഎസ്ആര്ടിസി ഓര്ഡിനറി ബസുകളില് സ്ത്രീകള്ക്ക് സൗജന്യയാത്ര അനുവദിക്കുന്ന പ്രിയദര്ശിനി പദ്ധതിക്ക് ജില്ലയില് തുടക്കം. യാത്രയില് പങ്കുചേര്ന്നും മധുരം വിതരണം ചെയ്തും പല കേന്ദ്രങ്ങളിലും വനിതകള് ആദ്യദിനം ആഘോഷമാക്കി. റിബണുകളും ബലൂണും കെട്ടി അലങ്കരിച്ചാണ് പ്രിയദര്ശിനി ബസുകള് സര്വീസിനായി എത്തിയത്.
ജില്ലാതല ഉദ്ഘാടനം കോട്ടയം കെഎസ്ആര്ടിസി ബസ് സ്റ്റാൻഡില് നിയമസഭാ സ്പീക്കര് തിരുവഞ്ചൂര് രാധാകൃഷ്ണന് നിര്വഹിച്ചു. കുമകരം വഴി ചേര്ത്തലയ്ക്കു സര്വീസ് നടത്തുന്ന ഓര്ഡിനറി ബസിലെ യാത്രക്കാരിക്ക് അദ്ദേഹം സീറോ ടിക്കറ്റ് കൈമാറി.
ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, കോട്ടയം നഗരസഭാധ്യക്ഷന് എം.പി. സന്തോഷ് കുമാര്, ജില്ലാ ട്രാന്സ്പോര്ട്ട് ഓഫീസര് എസ്. രമേശ് എന്നിവര് പ്രസംഗിച്ചു. കോട്ടയം ഡിപ്പോയില് 22 ഓര്ഡിനറി സര്വീസുകളിലാണ് സ്ത്രീകള്ക്ക് സൗജന്യയാത്രാ സൗകര്യം ലഭ്യമാവുക.
കടുത്തുരുത്തി നിയോജകമണ്ഡലംതല ഉദ്ഘാടനം കടുത്തുരുത്തി സെന്ട്രല് ജംഗ്ഷനില് നടന്ന ചടങ്ങില് മന്ത്രി മോന്സ് ജോസഫ് നിര്വഹിച്ചു. കടുത്തുരുത്തി ബ്ലോക്ക് പഞ്ചായത്ത് പ്രസിഡന്റ് തങ്കമ്മ വര്ഗീസിന് ആദ്യയാത്രയ്ക്കുള്ള സീറോ ടിക്കറ്റ് മന്ത്രി കൈമാറി. തദ്ദേശ സ്ഥാപന അധ്യക്ഷന്മാര്, അംഗങ്ങള്, രാഷ്ട്രീയ പാര്ട്ടി പ്രതിനിധികള് തുടങ്ങിയവര് പങ്കെടുത്തു.
പുതുപ്പള്ളി ബസ് സ്റ്റാന്ഡില് ചാണ്ടി ഉമ്മന് എംഎല്എയും ഏറ്റുമാനൂര് കെഎസ്ആര്ടിസി ബസ് സ്റ്റാന്ഡില് നാട്ടകം സുരേഷ് എംഎല്എയും പൊന്കുന്നം പഞ്ചായത്ത് ബസ് സ്റ്റാന്ഡില് പ്രഫ. റോണി കെ. ബേബി എംഎല്എയും പ്രിയദര്ശിനി ബസിന്റെ യാത്ര ഉദ്ഘാടനം ചെയ്തു. ചങ്ങാശേരി പെരുന്ന ബസ് സ്റ്റാന്ഡില് വിനു ജോബ് എംഎല്എയും എരുമേലിയിലും മുണ്ടക്കയത്തും എം.ജെ. സെബാസ്റ്റ്യന് എംഎല്എയും വൈക്കം കെഎസ്ആര്ടിസി ബസ് സ്റ്റാന്ഡില് കെ. ബിനിമോന് എംഎല്എയും ഉദ്ഘാടനം നിര്വഹിച്ചു.
പ്രതിഷേധവുമായിമഹിളാ മോര്ച്ച
കോട്ടയം: സംസ്ഥാനത്തെ മുഴുവന് കെഎസ്ആര്ടിസി ബസുകളിലും സ്ത്രീകള്ക്ക് സൗജന്യ യാത്ര അനുവദിക്കണമെന്ന് ആവശ്യപ്പെട്ട് കോട്ടയത്ത് മഹിളാ മോര്ച്ച പ്രവര്ത്തകരുടെ പ്രതിഷേധം. കോട്ടയം ഡിപ്പോയില്നിന്നു സര്വീസ് ആരംഭിക്കാനിരുന്ന ബസ് തടഞ്ഞായിരുന്നു പ്രവര്ത്തകര് സമരം നടത്തിയത്. പ്രതിഷേധത്തിന്റെ ഭാഗമായി മഹിളാ മോര്ച്ച പ്രവര്ത്തകര് ബസിനുള്ളില് കയറി മുദ്രാവാക്യം വിളിക്കുകയും യാത്ര തടസപ്പെടുത്തുകയും ചെയ്തു. അപ്രതീക്ഷിതമായി നടത്തിയ സമരം തങ്ങളെ ബുദ്ധിമുട്ടിലാക്കുന്നെന്ന് ചൂണ്ടിക്കാട്ടി ബസിലുണ്ടായിരുന്ന യാത്രക്കാര് സമരക്കാര്ക്കെതിരേ രംഗത്തുവന്നു. യാത്രക്കാരുടെ ഭാഗത്തുനിന്നു ശക്തമായ പ്രതിഷേധവും എതിര്പ്പും ഉയര്ന്നതിനെ തുടര്ന്ന് മഹിളാ മോര്ച്ച പ്രവര്ത്തകര് ബസിനുള്ളിലെ സമരം അവസാനിപ്പിച്ചു പിന്മാറുകയായിരുന്നു.
സംസ്ഥാന വ്യാപകമായി സംഘടിപ്പിച്ച പ്രതിഷേധ സമരത്തിന്റെ ഭാഗമായി കോട്ടയം വെസ്റ്റ് ജില്ലാ കമ്മിറ്റിയുടെ നേതൃത്വത്തില് കോട്ടയം കെഎസ്ആര്ടിസി സ്റ്റാന്ഡില് നടത്തിയ സമരം മഹിളാമോര്ച്ച സംസ്ഥാന സെക്രട്ടറി മഞ്ജു സുരേഷ് ഉദ്ഘാടനം ചെയ്തു. കോട്ടയം വെസ്റ്റ് ജില്ലാ അധ്യക്ഷ ഉഷാ സുരേഷ് അധ്യക്ഷത വഹിച്ചു.
Deepika
E-paper LOGIN
LOGIN
