പത്തനംതിട്ട: പുതുതായി തെരഞ്ഞെടുക്കപ്പെട്ട തദ്ദേശ സ്ഥാപന ഭരണസമിതികളില് സ്റ്റാന്ഡിംഗ് കമ്മിറ്റി (സ്ഥിരം സമിതി) തെരഞ്ഞെടുപ്പുകള് അഞ്ചിന് ആരംഭിക്കും. അഞ്ചു മുതല് ഏഴുവരെയാണ് തെരഞ്ഞെടുപ്പ് നിശ്ചയിച്ചിരിക്കുന്നത്.
ഗ്രാമ, ബ്ലോക്ക് പഞ്ചായത്തുകളില് ധനകാര്യം, വികസനകാര്യം, ക്ഷേമകാര്യം, ആരോഗ്യ വിദ്യാഭ്യാസകാര്യം എന്നിങ്ങനെ നാല് സ്റ്റാന്ഡിംഗ് കമ്മിറ്റികളാണ് രൂപീകരിക്കേണ്ടത്. ജില്ലാ പഞ്ചായത്തില് ധനകാര്യം, വികസനകാര്യം, പൊതുമരാമത്ത് കാര്യം, ആരോഗ്യ വിദ്യാഭ്യാസ കാര്യം, ക്ഷേമകാര്യം എന്നിങ്ങനെ അഞ്ച് സ്റ്റാന്ഡിംഗ് കമ്മിറ്റികളുണ്ടാകും.
നഗരസഭകളില് ധനകാര്യം, വികസനകാര്യം, ക്ഷേമകാര്യം, ആരോഗ്യകാര്യം, മരാമത്ത്, വിദ്യാഭ്യാസ കലാകായികം എന്നിങ്ങനെ ആറ് സ്റ്റാന്ഡിംഗ് കമ്മിറ്റികളുണ്ടാകും. കോര്പറേഷനുകളില് ധനകാര്യം, വികസനം, ക്ഷേമം, ആരോഗ്യം, മരാമത്ത്, നഗരാസൂത്രണ, നികുതി - അപ്പീല്, വിദ്യാഭ്യാസം - കായികകാര്യങ്ങള് എന്നിങ്ങനെ എട്ടെണ്ണമായിരിക്കും.
അതത് തദ്ദേശ സ്ഥാപന വരണാധികാരികളുടെ ചുമതലയിലാണ് തെരഞ്ഞെടുപ്പുകള്. സ്റ്റാന്ഡിംഗ് കമ്മിറ്റികളുടെ രൂപീകരണത്തിനുശേഷം ഓരോ സമിതിയും വെവ്വേറെ യോഗം ചേര്ന്ന് അധ്യക്ഷരെ തെരഞ്ഞെടുക്കണം. സ്റ്റാന്ഡിംഗ് കമ്മിറ്റി രൂപീകരണത്തിനുശേഷം പ്രത്യേക നോട്ടീസ് നല്കിയാണ് ചെയര്മാന്മാരെ തെരഞ്ഞെടുക്കാന് യോഗം ചേരുന്നത്.
എല്ലാ അംഗങ്ങള്ക്കും പ്രാതിനിധ്യം
തദ്ദേശ സ്ഥാപനങ്ങളിലെ എല്ലാ അംഗങ്ങളും ഏതെങ്കിലും ഒരു സ്റ്റാന്ഡിംഗ് കമ്മിറ്റിയില് അംഗമായിരിക്കണമെന്നതാണ് വ്യവസ്ഥ. ഒരു അംഗം ഒരു സ്റ്റാന്ഡിംഗ് കമ്മിറ്റിയില് മാത്രമേ അംഗമാകാനും പാടുള്ളൂ. തദ്ദേശ സ്ഥാപന അധ്യക്ഷര് ഒഴികെയുള്ള അംഗങ്ങള് ഇത്തരത്തില് ഉള്പ്പെടും.
ധനകാര്യ സ്റ്റാന്ഡിംഗ് കമ്മിറ്റിയിലാണ് ഉപാധ്യക്ഷര് ഉള്പ്പെടുക. ഈ കമ്മിറ്റിയുടെ അധ്യക്ഷ പദവിയും ഉപാധ്യക്ഷര്ക്കായിരിക്കും. മറ്റ് സ്റ്റാന്ഡിംഗ് കമ്മിറ്റികളില് ഉള്പ്പെടുന്നവരില് നിന്നായിരിക്കും അധ്യക്ഷരെ തെരഞ്ഞെടുക്കുക.
എല്ലാ സ്റ്റാന്ഡിംഗ് കമ്മിറ്റിയിലും ഒരു സ്ഥാനം വനിതാ സംവരണമായിരിക്കും. ധനകാര്യ സ്ഥിരം സമിതി അധ്യക്ഷയാകുന്ന ബന്ധപ്പെട്ട തദ്ദേശ സ്ഥാപന വൈസ് പ്രസിഡന്റ് വനിതയാണെങ്കില്കൂടി മറ്റൊരു അംഗത്തെ ധനകാര്യ സ്ഥിരം സമിതിയില് ഉള്പ്പെടുത്താം.
എല്ലാ സ്റ്റാന്ഡിംഗ് കമ്മിറ്റികളിലും ഒരു വനിത ഉള്പ്പെടണമെന്നതിനാൽ വനിതാസംവരണ സ്ഥാനങ്ങളാകും ആദ്യം നികത്തുക. ഏതെങ്കിലും സ്റ്റാന്ഡിംഗ് കമ്മിറ്റിയിലേക്ക് സ്ത്രീസംവരണ സ്ഥാനത്തേക്ക് നാമനിര്ദേശം ലഭിക്കാത്തതു മൂലം അംഗത്തെ തെരഞ്ഞെടുക്കാന് കഴിയാതെ വന്നാല് വീണ്ടും യോഗം ചേര്ന്ന് സ്ത്രീസംവരണ സ്ഥാനം നികത്തണം.
സ്റ്റാന്ഡിംഗ് കമ്മിറ്റി തലപ്പത്തും വനിതകള്
ഉപാധ്യക്ഷസ്ഥാനം വനിതകള്ക്കായി സംവരണം ചെയ്തിട്ടുള്ള ഒരു പഞ്ചായത്തില് ധനകാര്യ സ്റ്റാന്ഡിംഗ് കമ്മിറ്റി ഒഴികെയുള്ള ഒരു സ്റ്റാന്ഡിംഗ് കമ്മിറ്റിയിലെ അധ്യക്ഷസ്ഥാനം കൂടി വനിതയ്ക്കു ലഭിക്കും. ഉപാധ്യക്ഷസ്ഥാനം വനിതയ്ക്കു സംവരണം ചെയ്തിട്ടില്ലാത്ത തദ്ദേശ സ്ഥാപനങ്ങളില് ധനകാര്യ കമ്മിറ്റി ഒഴികെയുള്ള രണ്ട് സ്റ്റാന്ഡിംഗ് കമ്മിറ്റികളുടെ അധ്യക്ഷസ്ഥാനം വനിതയ്ക്കു ലഭിക്കും.
എന്നാല്, ജില്ലാ പഞ്ചായത്തിന്റെ വൈസ് പ്രസിഡന്റ് സ്ഥാനം വനിതയ്ക്കായി സംവരണം ചെയ്തിട്ടുള്ള ഇടങ്ങളില് ധനകാര്യ സ്റ്റാന്ഡിംഗ് കമ്മിറ്റി ഒഴികെയുള്ള രണ്ട് സ്റ്റാന്ഡിംഗ് കമ്മിറ്റികളിലെ അധ്യക്ഷസ്ഥാനങ്ങളും വൈസ് പ്രസിഡന്റ് സ്ഥാനം സ്ത്രീകള്ക്കായി സംവരണം ചെയ്തിട്ടില്ലാത്ത ഇടങ്ങളില് ധനകാര്യ സ്റ്റാന്ഡിംഗ് കമ്മിറ്റി ഒഴികെയുള്ള മൂന്ന് സ്റ്റാന്ഡിംഗ് കമ്മിറ്റികളിലെ അധ്യക്ഷസ്ഥാനവും വനിതകള്ക്കാണ്.
വൈസ് പ്രസിഡന്റ് സ്ഥാനം വനിതകള്ക്കായി സംവരണം ചെയ്യപ്പെട്ടിട്ടുള്ള ഗ്രാമ, ബ്ലോക്ക് പഞ്ചായത്തുകളില് ക്ഷേമകാര്യ സ്റ്റാന്ഡിംഗ് കമ്മിറ്റി ചെയര്മാന് സ്ഥാനം കൂടി വനിതകള്ക്ക് ലഭിക്കും. വൈസ് പ്രസിഡന്റ് സ്ഥാനം വനിതകള്ക്കായി സംവരണം ചെയ്യപ്പെട്ടിട്ടില്ലെങ്കില് വികസനം, ആരോഗ്യം, വിദ്യാഭ്യാസം സമിതികളുടെ അധ്യക്ഷപദവികൂടി ലഭിക്കും.
ജില്ലാ പഞ്ചായത്തുകളില് വൈസ് പ്രസിഡന്റ് സ്ഥാനം വനിതകള്ക്കാണെങ്കില് വികസനം, ആരോഗ്യം സ്റ്റാന്ഡിംഗ് കമ്മിറ്റികളുടെ അധ്യക്ഷപദവികളായിരിക്കും വനിതകള്ക്കു ലഭിക്കുക.
Deepika
E-paper LOGIN
LOGIN
