കൊട്ടിയം : കിണറുകളിലെ അപകടകരമായ വാതകങ്ങള് തിരിച്ചറിയാന് സ്മാര്ട്ട് ഓക്സിജന് ഡിറ്റക്ടര് വികസിപ്പിച്ച് എസ്എന് പോളിടെക്നിക് വിദ്യാര്ഥി. കിണര് വൃത്തിയാക്കുന്നതിനും മറ്റ് അറ്റകുറ്റപ്പണികള്ക്കുമായി കിണറുകളിലിറങ്ങുന്ന തൊഴിലാളികളുടെ ജീവന് അപകടത്തിലാക്കുന്നത് ഒഴിവാക്കാന് പരിഹാരം കണ്ടെത്തുകയാണ് കൊട്ടിയം ശ്രീനാരായണ പോളിടെക്നിക് കോളജിലെ മെക്കാനിക്കല് വിദ്യാര്ഥി എന്.എസ്. ജസല്.
കിണറിനുള്ളിലെ ഓക്സിജന്റെ സാന്നിധ്യം പരിശോധിക്കാന് പരമ്പരാഗതമായി മെഴുകുതിരി ഉപയോഗിക്കുന്ന രീതിക്ക് പകരമായാണ് ജസല് ജസ് ക്യൂ ദി റസ്ക്യുര് ഓക്സിജന് ഡിറ്റക്ടര് വികസിപ്പിച്ചെടുത്തത്.
കിണറിനുള്ളില് ഓക്സിജന്റെ അളവ് കുറയുന്നതും കാര്ബണ് മോണോക്സൈഡ്, ഹൈഡ്രജന് സള്ഫൈഡ് തുടങ്ങിയ അപകടകരമായ വാതകങ്ങള് സാന്നിധ്യമറിയിക്കുന്നതും തൊഴിലാളികള്ക്ക് വലിയ ഭീഷണിയാണ്.
മെഴുകുതിരി ഉപയോഗിച്ചുള്ള പരിശോധന ഇത്തരം അപകടസാധ്യതകള് കൃത്യമായി തിരിച്ചറിയാന് പര്യാപ്തമല്ല. ഈ പ്രശ്നത്തിന് പരിഹാരമായാണ് ജസല് സെന്സര് അധിഷ്ഠിത ഉപകരണം രൂപകല്പന ചെയ്തത്.
ഉപകരണം കിണറിനുള്ളിലേക്ക് ഇറക്കുമ്പോള് അതിലെ സെന്സറുകള് വിവിധ വാതകങ്ങളുടെ സാന്നിധ്യവും അളവും തിരിച്ചറിഞ്ഞ് ഡിജിറ്റല് ഡിസ്പ്ലേയില് കാണിക്കുന്നു. വാതകങ്ങളുടെ അളവ് അപകടകരമായ നിലയിലെത്തിയാല് അലാറവും മുന്നറിയിപ്പ് ലൈറ്റും പ്രവര്ത്തിച്ച് തൊഴിലാളികള്ക്ക് അപായസൂചന നല്കും. റീചാര്ജ് ചെയ്ത് വീണ്ടും ഉപയോഗിക്കാവുന്ന രീതിയിലാണ് ഉപകരണം വികസിപ്പിച്ചത്.
കിണറുകള്ക്ക് പുറമെ ഖനികള്, മാന്ഹോളുകള്, മറ്റ് പരിമിതമായ ഇടങ്ങള്, രക്ഷാപ്രവര്ത്തന മേഖലകള് എന്നിവിടങ്ങളിലും ഈ ഉപകരണം പ്രയോജനപ്പെടുത്താന് കഴിയും. ജസലിന്റെ ഈ നൂതന ആശയത്തിന് സംസ്ഥാനതലത്തിലും ശ്രദ്ധ നേടാനായി.
കഴിഞ്ഞ 16ന് കൊച്ചി രാജഗിരി കോളജില് നടന്ന കെ. ഡിക് യംഗ് ഇന്നൊവേറ്റീവ് പ്രോഗ്രാം സംസ്ഥാനതല വിജയികളുടെ ഇന്ഡസ്ട്രി മീറ്റില് ഉന്നത വിദ്യാഭ്യാസ മന്ത്രി റോജി എം. ജോണിന്റെ സാന്നിധ്യത്തില് പദ്ധതി അവതരിപ്പിക്കാന് ജസലിന് അവസരം ലഭിച്ചു. ഉദ്ഘാടന സെഷനില് മന്ത്രി ഈ പ്രോജക്ടിനെ പ്രത്യേകം പരാമര്ശിക്കുകയും അഭിനന്ദിക്കുകയും ചെയ്തു.
കേരള സ്റ്റാര്ട്ടപ്പ് മിഷന്, സ്കില് ഇന്ത്യ, ഇന്സ്റ്റിറ്റിയൂഷന് ഇന്നവേഷന് കൗണ്സില് എന്നിവയുടെ സഹകരണത്തോടെ സംഘടിപ്പിച്ച ഇന്നോടെക് എക്സിബിഷനില് ഏറ്റവും മികച്ച സസ്റ്റെയിനബിള് പ്രോജക്ടിനുള്ള പുരസ്കാരവും ഈ ആശയത്തിന് ലഭിച്ചിരുന്നു.
ഒരു മെഴുകുതിരി നല്കുന്ന പരിതമായ മുന്നറിയിപ്പില് നിന്ന് ശാസ്ത്രീയമായ സുരക്ഷാ സംവിധാനത്തിലേക്കുള്ള ഈ മാറ്റം, സാധാരണക്കാരായ തൊഴിലാളികളുടെ ജീവന് സംരക്ഷിക്കാന് സഹായിക്കുന്ന വലിയൊരു ചുവടുവയ്പാണ്.