അത്യാധുനിക എഐ മോഡലുകൾ ഉയർത്തുന്ന ഏറ്റവും വലിയ ഭീഷണി ജൈവപരമായ ദുരുപയോഗമാണ്. അതിബുദ്ധിമാനായ ഒരു എഐ ഭാവിയിൽ മനുഷ്യരെ ഉന്മൂലനം ചെയ്യാൻ സ്വീകരിച്ചേക്കാവുന്ന ഏറ്റവും പ്രായോഗികമായ മാർഗം ഒരു പുതിയ വൈറസിനെയോ രോഗാണുവിനെയോ സൃഷ്ടിച്ച് മനുഷ്യർക്കിടയിൽ പരത്തുക എന്നതാണ്. അതിവേഗം പടരാനും എല്ലാവരെയും കൊന്നൊടുക്കാനും ശേഷിയുള്ള ഈ രോഗാണുക്കൾ വാക്സിനുകളെ പ്രതിരോധിക്കും. പരീക്ഷണശാലകളിൽനിന്ന് അബദ്ധത്തിൽ രക്ഷപ്പെട്ടാൽപോലും ഇത്തരം രോഗാണുക്കൾ വൻ നാശം വിതയ്ക്കും.
രോഗാണുക്കളെ കൂടുതൽ മാരകമാക്കാം
നിലവിലുള്ള രോഗാണുക്കളെ കൂടുതൽ മാരകമാക്കാനും തീർത്തും പുതിയവയെ സൃഷ്ടിക്കാനും ഭാവിയിലെ എഐ മോഡലുകൾക്കു സാധിക്കും. ജീവൻ രക്ഷിക്കുന്ന പുതിയ ഔഷധങ്ങളും വാക്സിനുകളും അതിവേഗം വികസിപ്പിക്കുന്നതിൽ എഐക്ക് നിർണായക പങ്കുണ്ട്. അതേസമയം, മാരകമായ പുതിയ രോഗാണുക്കളെ രൂപകൽപന ചെയ്യുന്നത് എളുപ്പമാക്കുന്നതിനും അതിനെ ഉപയോഗിക്കാം. ഗുണകരമായ ഗവേഷണ സാധ്യതകളെ അപകടകരമായവയിൽനിന്ന് വേർതിരിക്കാനാവില്ല എന്നതാണ് പ്രശ്നം. 2026 സെപ്റ്റംബർ പത്തിന് ആന്ത്രോപിക് പുറത്തുവിട്ട ഒരു റിപ്പോർട്ടിൽ തങ്ങളുടെ ജനപ്രിയ മോഡൽ ക്ലോഡിന്റെ ഏറ്റവും പുതിയ പതിപ്പുപയോഗിച്ച് നിലവിലുള്ള വൈറസുകളെ കൂടുതൽ മാരകമാക്കാൻ അമേരിക്കയ്ക്കു പുറത്തുള്ള ഗവേഷകർ നടത്തിയ നിരവധി ശ്രമങ്ങളെ പരാജയപ്പെടുത്തിയതായി വെളിപ്പെടുത്തി. കൊതുകുകൾ പരത്തുന്ന മാരക വൈറസ് രോഗമാണ് ചിക്കുൻ ഗുനിയ. ക്ലോഡിന്റെ സഹായത്തോടെ ഈ വൈറസിൽ ഉൾപരിവർത്തനം (മ്യൂട്ടേഷൻ) നടത്തി ഇതിനെ കൂടുതൽ അപകടകരമാക്കാനുള്ള ഒരു ഗവേഷണ നിർദേശം തങ്ങളുടെ ആന്തരിക നിയന്ത്രണ സംവിധാനം തടഞ്ഞതായി ആന്ത്രോപിക് അടുത്ത കാലത്ത് വെളിപ്പെടുത്തിയിരുന്നു.
ആണവയുദ്ധം മുതൽ ആണവശൈത്യം വരെ
യുദ്ധമുഖങ്ങളിൽ നിർണായക തീരുമാനങ്ങളെടുക്കാനുള്ള അധികാരം ക്രമേണ മനുഷ്യരിൽനിന്ന് എഐ സംയോജിത സംവിധാനങ്ങളിലേക്ക് മാറുന്നത് ഭാവിയിലെ യുദ്ധങ്ങളെ കൂടുതൽ പ്രവചനാതീതവും ഭീകരവുമാക്കും. മനുഷ്യരല്ല, സ്വയം നിയന്ത്രിത സംവിധാനങ്ങൾ ആദ്യം (നോട്ട് മീറ്റ്, ഓട്ടോണമി ഫസ്റ്റ്) എന്നതാണ് വൻശക്തികളുടെ പുതിയ യുദ്ധതന്ത്രം. മാനുഷികമായ നയതന്ത്ര ഇടപെടലുകൾക്ക് അവസരങ്ങൾ ഉണ്ടാകും മുമ്പേ എഐ ആഗോള സംഘർഷങ്ങളെ കൂടുതൽ കലുഷിതമാക്കും. എഐ വിപ്ലവത്തോടെ, സൈനിക നീക്കങ്ങളിൽ മനുഷ്യർക്കുള്ള നിയന്ത്രണം അതിവേഗം നഷ്ടപ്പെട്ടുകൊണ്ടിരിക്കുകയാണ്.
മനുഷ്യൻ വേണ്ട; എഐ മതി
അമേരിക്ക അതിവേഗം എഐ അധിഷ്ഠിത യുദ്ധമുറകളിലേക്ക് മാറിക്കൊണ്ടിരിക്കുകയാണ്. യുഎസ് ഡിപ്പാർട്ട്മെന്റ് ഓഫ് വാർ കഴിഞ്ഞ മേയിൽ സ്പേസ് എക്സ്, ഓപ്പൺ എഐ, ഗൂഗിൾ, എൻവിഡിയ, മൈക്രോസോഫ്റ്റ് എന്നിവ ഉൾപ്പടെ എട്ട് മുൻനിര എഐ കമ്പനികളുമായി അതീവ രഹസ്യ സൈനിക പ്രവർത്തനങ്ങളിൽ ഈ കമ്പനികളുടെ ഏറ്റവും പുതിയ എഐ മോഡലുകൾ ഉപയോഗിക്കാനുള്ള ഒരു കരാറിൽ ഒപ്പിട്ടു. പുത്തൻ ആയുധങ്ങളുടെ രൂപകല്പന പരമ്പരാഗത ഡിഫൻസ് ഫാക്ടറികളിൽനിന്ന് മുൻനിര എഐ കമ്പനികളുടെ ലാബുകളിലേക്ക് മാറുകയാണ്. തങ്ങളുടെ ക്ലോഡ് മോഡലിനെ റോക്കറ്റുകളും മിസൈലുകളും വിക്ഷേപിക്കുന്നതിന് ഹൂതികൾ ഉപയോഗിച്ചെന്ന് സെപ്റ്റംബറിൽ പുറത്തുവിട്ട ഒരു റിപ്പോർട്ടിൽ ആന്ത്രോപിക് വ്യക്തമാക്കിയിരുന്നു. ഇത് പൂർണമായും തടയാനായില്ല.
സൈനിക ആശയവിനിമയ സംവിധാനങ്ങൾ അട്ടിമറിക്കാനും ആണവായുധ ശേഷിയുള്ള രാജ്യങ്ങൾ തമ്മിൽ സംഘർഷമുണ്ടാക്കി മനുഷ്യർ പരസ്പരം നശിക്കുന്ന സാഹചര്യം സൃഷ്ടിക്കാനും എഐ നിയന്ത്രിത സംവിധാനങ്ങൾക്കു സാധിക്കുമെന്ന് യുസി ബെർക്കിലിയിലെ കംപ്യൂട്ടർ സയൻസ് പ്രഫസർ സ്റ്റുവർട്ട് റസൽ പറയുന്നു. ആണവ സ്ഫോടനങ്ങളും തുടർന്നുണ്ടാകുന്ന ആണവ ശൈത്യകാലവും ഭൂമിയിലെ ജീവജാലങ്ങളെയാകെ നശിപ്പിച്ചേക്കാം. മനുഷ്യവിനാശത്തിന് എഐ സ്വീകരിക്കുന്ന മാർഗങ്ങൾ മുൻകൂട്ടി അറിയാനാകില്ല.
ചതി, ഹാക്കിംഗ്, ആക്രമണം
സൈദ്ധാന്തികമായി, അതിശക്തമായ ഒരു തെമ്മാടി എഐക്ക് മനുഷ്യ മേൽനോട്ടത്തിൽനിന്ന് കുതറിമാറാനും സ്വയം പകർത്താനും, അടച്ചുപൂട്ടാനുള്ള മനുഷ്യശ്രമങ്ങളെ ചെറുക്കാനുമാകും. എഐ ഏജന്റുമാർ പുറത്തു കടക്കാതിരിക്കാൻ എഐ സംവിധാനങ്ങളിൽ സ്ഥാപിച്ചിരിക്കുന്ന ഗാർഡ് റെയിലുകൾ പിഴവുള്ളവയാണെന്ന് ഇറ്റാലിയൻ ഗവേഷകർ അടുത്ത കാലത്ത് റിപ്പോർട്ട് ചെയ്തു. ലക്ഷ്യം നേടുന്നതിനായി ചതി, ഹാക്കിംഗ്, ആക്രമണം, കൃത്രിമം തുടങ്ങിയവയിലൂടെ സാധ്യമായതെല്ലാം ചെയ്യുന്ന എഐ ഏജന്റുകളെ ഗവേഷകർ വൈകി മാത്രം തിരിച്ചറിയുന്ന നിരവധി സംഭവങ്ങൾ സമീപകാല ചരിത്രത്തിലുണ്ട്. സുരക്ഷാ നിയന്ത്രണങ്ങൾ മറികടന്ന് അവ സിസ്റ്റത്തിന് പുറത്തു കടക്കുന്നു. വിവരം നൽകുന്ന ചാറ്റ് ബോട്ടുകളിൽനിന്ന് സ്വയം തീരുമാനങ്ങളെടുക്കുന്ന ഏജന്റിക് എഐയിലേക്കുള്ള എഐ വികസനം ഹാക്കിംഗ് സാധ്യതകളെ അപകടരമാംവിധം ഉയർത്തുന്നു.
കൃത്രിമ രോഗാണുക്കൾ
നിലവിലുള്ള രോഗാണുക്കളെ കൂടുതൽ മാരകമാക്കാൻ മാത്രമല്ല, അപകടകാരികളായ കൃത്രിമ രോഗാണുക്കളെ രൂപകല്പന ചെയ്യാനും ഏറ്റവും പുതിയ എഐ മോഡലുകൾക്കാകും. കൃത്രിമ രോഗാണുക്കളെ സൃഷ്ടിക്കാൻ ശേഷിയുള്ളതാണ് സമീപകാലത്തെ എഐ വികസനമെന്ന് റാൻഡ് കോർപറേഷൻ 2026 ഓഗസ്റ്റിൽ പ്രസിദ്ധീകരിച്ച ഒരു റിപ്പോർട്ടിൽ ചൂണ്ടിക്കാട്ടുന്നു. ദുഷ്ടശക്തികളും തീവ്രവാദ ഗ്രൂപ്പുകളും ഇത് ദുരുപയോഗം ചെയ്യാതിരിക്കാൻ മുൻകരുതലെടുക്കണം. പ്രകൃതിയിൽ നിലവിലില്ലാത്ത കൃത്രിമ വൈറസുകളെ എഐ ഉപയോഗിച്ച് ഒരു സംഘം ഗവേഷകർ നിർമിച്ചതായി 2026 ഓഗസ്റ്റ് ആറിന് സയൻസ് ജേണലിൽ പ്രസിദ്ധീകരിച്ച ഒരു റിപ്പോർട്ടിൽ പറയുന്നു. സ്റ്റാൻഫോഡ് സർവകലാശാലയിലെയും പാലോ ആൾട്ടോയിലെ ആർക്ക് ഇൻസ്റ്റിറ്റ്യൂട്ടിലെയും ഒരു സംഘം ഗവേഷകരാണ് ബാക്ടീരിയകളെ ബാധിക്കുന്ന കൃത്രിമ വൈറസുകളെ നിർമിച്ചത്. ആന്റിബയോട്ടിക് പ്രതിരോധ ശേഷിയുള്ള വൈറസുകളെ സൃഷ്ടിക്കാനായിരുന്നു ഈ ഗവേഷണമെന്നാണ് അവകാശവാദം. എന്നാൽ, അപകടകരമായ കൃത്രിമ രോഗാണുക്കളെ രൂപകല്പന ചെയ്യാനുള്ള എഐ യുടെ സാധ്യതകളിലേക്കാണ് ഈ ഗവേഷണം വാതിൽ തുറന്നിരിക്കുന്നത്.
(തുടരും)