കോഴിക്കോട്: നിയമസഭാ തെരഞ്ഞെടുപ്പ് സുഗമമാക്കാനുള്ള സുരക്ഷാക്രമീകരണങ്ങള്ക്കും ഉദ്യോഗസ്ഥര്ക്ക് പ്രത്യേക അലവന്സ് നല്കുന്നതിനുമായി പോലീസിന് 42.89 കോടി രൂപ. സംസ്ഥാന പോലീസ് 85.61 കോടി രൂപയാണ് ആവശ്യപ്പെട്ടതെങ്കിലും 42.89 കോടി രൂപയ്ക്കാണ് സര്ക്കാര് ഭരണാനുമതി നല്കിയത്.
തെരഞ്ഞെടുപ്പിനു മുന്നോടിയായുള്ള സുരക്ഷാ ക്രമീകരണങ്ങള്, വോട്ടെടുപ്പ് ദിനത്തിലെ ബന്ദോബസ്ത് (തെരഞ്ഞെടുപ്പ് കാലയളവില് ക്രമസമാധാനം ഉറപ്പാക്കുന്നതിനായി പോലീസ് നടത്തുന്ന വിപുലമായ സുരക്ഷാ ക്രമീകരണങ്ങള്), വോട്ടെണ്ണല് കേന്ദ്രങ്ങളിലെ സുരക്ഷ, വിവിഐപി സുരക്ഷ തുടങ്ങിയ ആവശ്യങ്ങള്ക്കായാണ് ഈ തുക വിനിയോഗിക്കുക.
തെരഞ്ഞെടുപ്പ് ഡ്യൂട്ടിക്കായി നിയോഗിക്കപ്പെടുന്ന പോലീസുകാര്ക്കും മറ്റു വകുപ്പുകളിലെ ജീവനക്കാര്ക്കും നിശ്ചിത ദിനബത്തയുടെ ഒന്നര ഇരട്ടി പ്രത്യേക അലവന്സായി നല്കും. ഇത് പരമാവധി ഏഴു ദിവസത്തേക്ക് മാത്രമായിരിക്കും (വോട്ടെടുപ്പിന് നാലു ദിവസവും വോട്ടെണ്ണലിന് മൂന്നു ദിവസവും). ഇതിനായി 12 കോടി രൂപ ചെലവഴിക്കും. പോലീസ് നീക്കത്തിനായി വാഹനങ്ങള് വാടകയ്ക്കെടുക്കാന് മൂന്നു കോടി രൂപ അധികമായി അനുവദിച്ചിട്ടുണ്ട്.
ഭക്ഷണ അലവന്സ്
പോലീസുകാര്, കേന്ദ്രസേനകള്, മറ്റു സംസ്ഥാനങ്ങളില്നിന്നുള്ള സുരക്ഷാ ഉദ്യോഗസ്ഥര് എന്നിവര്ക്ക് വോട്ടെടുപ്പ്, വോട്ടെണ്ണല് ദിവസങ്ങളില് 250 രൂപ വീതം ഭക്ഷണ അലവന്സ് നല്കും. ഇതിനായി രണ്ടു കോടി രൂപയാണ് ചെലവഴിക്കുക.
ഇന്ധന ഇനത്തില് ഏഴു കോടി രൂപയും ഓഫീസ് ആവശ്യങ്ങള്ക്കായും വാഹനങ്ങളുടെ അറ്റകുറ്റപ്പണികള്ക്കായും മൂന്നു കോടി രൂപ വീതവും മാറ്റിവച്ചിട്ടുണ്ട്. ടെലിഫോണ് നിരക്കുകള്ക്കായി 50 ലക്ഷം രൂപയും രഹസ്യാന്വേഷണ പ്രവര്ത്തനങ്ങള്ക്കായി സീക്രട്ട് സര്വീസ് ഫണ്ട് എന്ന പേരില് ഒരു കോടി രൂപയും അനുവദിച്ചു.
25,000 സ്പെഷല് പോലീസ് ഓഫീസര്മാര്
വോട്ടെടുപ്പ് ദിവസവും തലേദിവസവുമായി 25,000 സ്പെഷല് പോലീസ് ഓഫീസര്മാരെ നിയോഗിക്കാന് തെരഞ്ഞെടുപ്പ് കമ്മീഷന് അനുമതി നല്കിയിട്ടുണ്ട്. ഇവര്ക്ക് പ്രതിദിനം 1400 രൂപ പ്രതിഫലവും വോട്ടെടുപ്പ് ദിവസം 250 രൂപ ഭക്ഷണ അലവന്സും ലഭിക്കും. 2,000 ഹോം ഗാര്ഡുകളെ പരമാവധി രണ്ടുദിവസത്തേക്ക് നിയമിക്കും. ഇവര്ക്ക് സാധാരണ വേതനത്തിന് പുറമെ രണ്ട് ദിവസത്തേക്ക് 500 രൂപ പ്രതിഫലവും വോട്ടെടുപ്പ് ദിവസം 250 രൂപ ഭക്ഷണത്തുകയും നല്കും.
തെരഞ്ഞെടുപ്പ് ആവശ്യങ്ങള്ക്കായി 8,400 വാഹനങ്ങള് വാടകയ്ക്കെടുക്കാന് പോലീസിന് അനുമതിയുണ്ട്. ഓരോ മണ്ഡലത്തിലും 20 വാഹനങ്ങള് വീതം മൂന്ന് ദിവസത്തേക്ക് പ്രതിദിനം 3,000 രൂപ നിരക്കില് വാടകയ്ക്കെടുക്കും.