കരുവാരകുണ്ട്: കല്ക്കുണ്ട് നിവാസികളുടെ ദീര്ഘകാലത്തെ ആവശ്യം പൂവണിയുന്നു. മാമ്പറ്റയില് പുതിയ പാലം ഉടന് നിര്മിക്കുമെന്ന് മന്ത്രി പി.കെ. ബഷീര് പ്രഖ്യാപിച്ചു. കഴിഞ്ഞ ദിവസം കിഴക്കേത്തലയില് നടന്ന യോഗത്തിലായിരുന്നു മന്ത്രിയുടെ പ്രഖ്യാപനം.
മാമ്പറ്റ പാലം തകര്ച്ചയുടെ വക്കിലായിട്ട് വര്ഷങ്ങളായി. വീതി കുറഞ്ഞ പാലത്തിന് കൈവരികളുമില്ല. മലയോരത്ത് അനുഭവപ്പെടുന്ന തീവ്രമഴയെ തുടര്ന്നുണ്ടാകുന്ന മലവെള്ളപ്പാച്ചിലിലാണ് പാലത്തിന്റെ കൈവരികള് തകര്ന്നത്. പലപ്പോഴായി ഇവിടെ അപകടങ്ങള് സംഭവിക്കുകയും പാലം കവിഞ്ഞൊഴുകി ഗതാഗതം തടസപ്പെടുകയും ചെയ്തിരുന്നു.
1977-ലാണ് നാട്ടുകാരുടെ മേല്നോട്ടത്തില് ഈ പാലം നിര്മിച്ചത്. കിഴക്കേത്തല-കല്ക്കുണ്ട് റോഡിലെ പ്രധാന പാലമാണിത്. മുള്ളറ, ചേരിപ്പടി, കപ്പിലാന്തോട്ടം, കല്ക്കുണ്ട്, അട്ടി, കേരളാംകുണ്ട് വെള്ളച്ചാട്ടം, ആര്ത്തല തുടങ്ങി നിരവധി പ്രദേശങ്ങളിലേക്ക് എത്തിപ്പെടാനുള്ള ഏക മാര്ഗമാണ് മാമ്പറ്റ പാലം.
പാലത്തില് കുഴികള് രൂപപ്പെടുകയും വശങ്ങളില് ബലക്ഷയം സംഭവിക്കുകയും ചെയ്തതോടെ വലിയൊരു ദുരന്തം ഉണ്ടാകുന്നതിന് മുമ്പ് പാലം പുനര്നിര്മിക്കണമെന്ന് നാട്ടുകാര് നിരന്തരം ആവശ്യപ്പെട്ടിരുന്നു. പുതിയ പാലം യാഥാര്ഥ്യമാകുമെന്ന പ്രതീക്ഷയിലാണ് നാട്ടുകാര്.