കാക്കനാട്: തൃക്കാക്കര നഗരസഭാ മാര്ക്കറ്റിലെ മലിനജല സംസ്കരണ പ്ലാന്റിന്റെ പ്രവര്ത്തനം നിലച്ചിട്ട് മാസങ്ങളായിട്ടും നടപടിയില്ല. നഗരസഭ ലക്ഷങ്ങള് മുടക്കി സ്ഥാപിച്ച വാട്ടര് റീട്രീറ്റ്മെന്റ് പ്ലാന്റിന്റെ മറവില് വന് അഴിമതിയാണ് നടക്കുന്നതെന്നാണ് ആക്ഷേപം.
നഗരസഭ മാര്ക്കറ്റിന് സമീപം രണ്ട് ടാങ്കുകള് സ്ഥാപിച്ച് പണിക്കാരുടെ പേര് പറഞ്ഞ് കരാറുകാരന് മാസം തോറും 30,000 രൂപ വീതം കൈപ്പറ്റുന്നുണ്ടെങ്കിലും, സ്ഥലത്ത് യാതൊരു വേസ്റ്റ് വാട്ടര് മാനേജ്മെന്റ് പ്രവര്ത്തനങ്ങളും നടക്കുന്നില്ലെന്ന് വാര്ഡ് കൗണ്സിലറും പറയുന്നു.മാര്ക്കറ്റില് നിന്നുള്ള മലിനജലം ശുദ്ധീകരിച്ച് കാനയിലൂടെ പുറത്തേക്ക് ഒഴുക്കിവിടണമെന്നാണ് കരാറുകാരനുമായുള്ള വ്യവസ്ഥയെങ്കിലും മലിനജലം അതേപടി കാനയിലൂടെ ഒഴുക്കിവിടുന്നതായി പ്രദേശവാസികള് പരാതിപ്പെടുന്നു. സുരഭി നഗര്, ഡിവൈന് നഗര് എന്നീ പ്രദേശങ്ങളിലെ താമസക്കാരും വാഹന യാത്രക്കാരും കാല്നട യാത്രക്കാരുമാണ് ഇതുമൂലം ദുരിതത്തിലാവുന്നത്.