പയ്യാവൂർ: മലയോരത്തെ വിവിധ പ്രദേശങ്ങളിൽ അറവിനായി എത്തിക്കുന്ന പോത്തുകളെ രാത്രിയിൽ മോഷ്ടിച്ചു കടത്തുന്ന അന്തർ സംസ്ഥാന സംഘത്തിലെ രണ്ടു പേർ അറസ്റ്റിൽ.
കർണാടകയിലെ ഹാസൻ സ്വദേശികളായ അസ്ഹർ ഹുസൈൻ (36), ഇമ്രാൻ അലി (34) എന്നിവരെയാണ് പയ്യാവൂർ എസ്ഐ ട്വിങ്കിൾ ശശിയുടെ നേതൃത്വത്തിലുള്ള സംഘം അറസ്റ്റ് ചെയ്തത്.
പയ്യാവൂർ ചാച്ചമ്മ ജംഗ്ഷനിലെ "ഡെയ്ലി ഫ്രഷ് ' എന്ന മാംസ വില്പന കേന്ദ്രത്തിലെ പോത്തുകളെ മോഷ്ടിച്ച സംഭവത്തിൽ നടത്തിയ അന്വേഷണത്തിലാണ് ഇവർ പിടിയിലാകുന്നത്. ജില്ലയിലെ വിവിധയിടങ്ങളിലെ സമാന മോഷണങ്ങളിൽ ഇവർക്ക് പങ്കുണ്ടെന്നാണ് പ്രാഥമിക നിഗമനം.
കർണാടക കേന്ദ്രീകരിച്ച് പ്രവർത്തിക്കുന്ന വൻസംഘമാണ് ഇതിനു പിന്നിലെന്നാണ് സൂചന.
ഇതേത്തുടർന്ന് തളിപ്പറന്പ് പോലീസും ഹാസനിലെത്തി അന്വേഷണം നടത്തിയിരുന്നു.