ന്യൂഡൽഹി: പ്രധാനമന്ത്രി നരേന്ദ്ര മോദിയുടെയും കേന്ദ്ര ആഭ്യന്തരമന്ത്രി അമിത് ഷായുടെയും മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറിന്‍റെയും തട്ടിപ്പുകൾ ഇനി രാജ്യത്തു നടപ്പില്ലെന്ന സന്ദേശമാണ് ‘ചലോ ദില്ലി’ മഹാറാലി നൽകുന്നതെന്ന് സിപിഎം ജനറൽ സെക്രട്ടറി എം.എ. ബേബി. ഡൽഹി രാംലീല മൈതാനത്ത് ഇന്ത്യ സഖ്യം സംഘടിപ്പിച്ച ജനകീയ പ്രക്ഷോഭത്തെ അഭിസംബോധന ചെയ്തു പ്രസംഗിക്കുകയായിരുന്നു അദ്ദേഹം.
ഗ്യാനേഷ് കുമാറിനെ പുറത്താക്കാനും നുണകളുടെ രാജാവായ മോദിയുടെ ഭരണം അവസാനിപ്പിക്കാനുമുള്ള നിർണായക പോരാട്ടത്തിനാണ് രാജ്യത്തു തുടക്കമായിരിക്കുന്നത്. മഹാത്മാഗാന്ധി, ജവഹർലാൽ നെഹ്റു, ബി.ആർ. അംബേദ്കർ, സർദാർ വല്ലഭ് ഭായി പട്ടേൽ തുടങ്ങിയ മഹാരഥന്മാരുടെയും ഭഗത് സിംഗിൽനിന്ന് ആവേശം ഉൾക്കൊണ്ട യുവജനങ്ങളുടെയും ചരിത്രപരമായ പ്രക്ഷോഭങ്ങൾക്ക് രാംലീല മൈതാനം സാക്ഷ്യം വഹിച്ചിട്ടുണ്ട്. അതിനു സമാനമായി രാജ്യത്തിന്‍റെ രാഷ്‌ട്രീയചരിത്രത്തിലെ പുതിയൊരു പോരാട്ടത്തിനാണ് ഈ മണ്ണ് ഇപ്പോൾ സാക്ഷിയാകുന്നത്.
സംഘപരിവാറിൽനിന്നു രാജ്യത്തെ മോചിപ്പിക്കാനുള്ള രണ്ടാം സ്വാതന്ത്ര്യസമര പ്രക്ഷോഭത്തിനാണ് ഇവിടെ തിരിതെളിഞ്ഞിരിക്കുന്നത്. രാജ്യത്തിന്‍റെ ജനാധിപത്യവും ഭരണഘടനയും സംരക്ഷിക്കാനുള്ള പോരാട്ടങ്ങളിൽ സിപിഎമ്മും ഇടതുപക്ഷ പ്രസ്ഥാനങ്ങളും എപ്പോഴും മുൻനിരയിലുണ്ടാകുമെന്നും എം.എ. ബേബി വ്യക്തമാക്കി.
Deepika
Corehub Solutions
E-paper LOGIN
LOGIN
