മഞ്ചേരി: മഞ്ചേരിയിലും പരിസര പ്രദേശങ്ങളിലും മോഷണം വ്യാപകമാകുന്നു. കരുവമ്പ്രം, നറുകര, മേലാക്കം ഭാഗങ്ങളിലായി കഴിഞ്ഞ രണ്ടു മാസത്തിനിടെ നിരവധി മോഷണങ്ങളാണ് നടന്നത്.
സംഭവവുമായി ബന്ധപ്പെട്ട് അന്വേഷണം ഊര്ജ്ജിതമാക്കിയിരിക്കുകയാണ് പൊലിസ്. പ്രദേശങ്ങളിലെ സിസിടിവി ദൃശ്യങ്ങള് പരിശോധിച്ചതില് നിന്നും മോഷ്ടാക്കള് പലരാണെന്നാണ് പൊലിസിന്റെ കണ്ടെത്തല്. കഴിഞ്ഞ 10-നും 13-നും ഇടയിലുള്ള ദിവസങ്ങളില് മേലാക്കം സഹൃദയ നഗറിലെ വലിയവീട്ടില് രാജേന്ദ്രന്റെ വീട്ടില് നിന്നും അരലക്ഷം രൂപ വിലവരുന്ന നാല് ഗ്രാം സ്വര്ണനാണയവും 40,000 രൂപ വിലവരുന്ന 200 ഗ്രാം വെള്ളിക്കട്ടിയും മോഷണം പോയിരുന്നു.
13-ന് കരുവമ്പ്രം അമ്പലപ്പടി കൃഷ്ണ ഹൗസില് കൃഷ്ണന്കുട്ടിയുടെ വീട്ടില് നടന്ന മോഷണത്തില് രണ്ട് ഗ്രാം തൂക്കമുള്ള സ്വര്ണ മോതിരവും നഷ്ടപ്പെട്ടു. അമ്പലപ്പടി കരിങ്കാളികാവ് ക്ഷേത്ര പരിസരത്ത് താമസിക്കുന്ന കരിയത്തന് ബാലകൃഷ്ണന്റെ വീട്ടിലും പിഎന്എ റോഡിലെ റിട്ടയേര്ഡ് എല്ഐസി ജീവനക്കാരന് സുരേഷിന്റെ വീട്ടിലും മോഷണശ്രമം നടന്നുവെങ്കിലും വിലപിടിപ്പുള്ള വസ്തുക്കളൊന്നും നഷ്ടപ്പെട്ടിരുന്നില്ല. കരുവമ്പ്രം വെസ്റ്റ് മീന്കുളത്തിന് സമീപമുള്ള റിട്ടയേര്ഡ് വാട്ടര് അഥോറിറ്റി ജീവനക്കാരന് ബാലഗോപാലന്റെ കൃഷ്ണകൃപയില് കയറിയ മോഷ്ടാവ് ആദ്യം കവര്ന്നത് സിസിടിവി കാമറയായിരുന്നു. തുടര്ന്ന് 45,000 രൂപയും രണ്ട് പവന് സ്വര്ണണാഭരണങ്ങളും മോഷ്ടിച്ചു. നവംബര് ഒന്നിനായിരുന്നു ഈ സംഭവം. ഒക്ടോബര് 22-ന് പുലര്ച്ചെയാണ് കരുവമ്പ്രം മുട്ടിയറ പള്ളിക്കത്തൊടി തങ്കത്തിന്റെ വീട്ടില് മോഷണം നടന്നത്. ഇവിടെനിന്ന് ഒരു പവന് തൂക്കമുള്ള സ്വര്ണവള, നാല് പവന് തൂക്കമുള്ള സ്വര്ണ മോതിരങ്ങള്, രണ്ടു പവന്റെ മൂന്ന് ജോഡി കമ്മല് എന്നിവ നഷ്ടപ്പെട്ടു.മഞ്ചേരി ടെക്നിക്കല് ഹൈസ്കൂള് പരിസരത്തുള്ള ഇന്വെര്ട്ടര് റിപ്പയറിംഗ് കടയില് കഴിഞ്ഞ 11-ന് നടന്ന മോഷണശ്രമത്തിന്റെ ദൃശ്യങ്ങളും സിസിടിവിയില് വ്യക്തമായി പതിഞ്ഞിട്ടുണ്ട്. കടയുടെ ഗ്ലാസ് വാതില് കുത്തിത്തുറന്ന് അകത്തുകയറി മേശവലിപ്പ് പരിശോധിക്കുന്നതും വിലപിടിപ്പുള്ളതൊന്നും ലഭിക്കാതെ മോഷ്ടാവ് മടങ്ങുന്നതും ദൃശ്യങ്ങളില് കാണാം.