ഓഗസ്റ്റ് ഒന്നു മുതല് ബോട്ടുകള് കടലില് ഇറങ്ങും
ചവറ : 52 ദിവസത്തെ ട്രോളിംഗ് നിരോധനം അവസാനിക്കാന് ദിവസങ്ങള് മാത്രം ശേഷിക്കെ മത്സ്യബന്ധന മേഖലയില് ഒരുക്കങ്ങള് സജീവമായി. നിരോധനം അവസാനിക്കുന്നതോടെ ട്രോളറുകളും മറ്റ് യന്ത്രവത്കൃത മത്സ്യബന്ധന ബോട്ടുകളും വീണ്ടും കടലിലിറങ്ങും.
നിരോധന കാലയളവില് മത്സ്യബന്ധന ബോട്ടുകളുടെ എന്ജിനുകള്, വലകള്, നാവിഗേഷന് ഉപകരണങ്ങള്, പെയിന്റിംഗ്, അറ്റകുറ്റപ്പണികള് എന്നിവ പൂര്ത്തിയാക്കാനുള്ള അവസാനഘട്ട തയാറെടുപ്പുകളിലാണ് മത്സ്യത്തൊഴിലാളികള്.
വരും ദിവസങ്ങളില് ഡീസല് നിറയ്ക്കല്, ഐസ് ശേഖരണം, ഭക്ഷ്യവസ്തുക്കളും മറ്റ് അവശ്യസാധനങ്ങളും ബോട്ടുകളില് എത്തിക്കല് തുടങ്ങിയ ജോലികള് പുരോഗമിക്കും. ഓഗസ്റ്റ് ഒന്നു മുതല് നീണ്ടകര, ശക്തികുളങ്ങര, അഴീക്കല് ഉള്പ്പെടെയുള്ള മത്സ്യബന്ധന കേന്ദ്രങ്ങള് വീണ്ടും സജീവമാവുകയാണ്.
മത്സ്യലേല കേന്ദ്രങ്ങള്, ഐസ് പ്ലാന്റുകള്, ഡീസല് പമ്പുകള്, മത്സ്യസംസ്കരണ യൂണിറ്റുകള്, മത്സ്യഗതാഗത മേഖല എന്നിവയും പൂര്ണ സജ്ജമാകും. ട്രോളിംഗ് പുനരാരംഭിക്കുന്നതോടെ മത്സ്യവിപണിയിലും അനുബന്ധ മേഖലകളിലും തൊഴില് അവസരങ്ങള് വര്ധിക്കുമെന്ന പ്രതീക്ഷയിലാണ് തൊഴിലാളികള്.
ഇത്തവണ മികച്ച മത്സ്യലഭ്യത ഉണ്ടാകുമെന്നാണ് മത്സ്യത്തൊഴിലാളികളുടെ പ്രതീക്ഷ. കാലാവസ്ഥ അനുകൂലമായാല് ആദ്യ ദിവസങ്ങളില് തന്നെ ചെമ്മീന്, കിളിമീന്, അയില, വാള ഉള്പ്പെടെ വിവിധ ഇനം മത്സ്യങ്ങള് ലഭിക്കുമെന്ന് പ്രതീക്ഷിക്കുന്നു.
കടലില് പോകുന്ന എല്ലാ ബോട്ടുകളും ലൈഫ് ജാക്കറ്റ്, ആശയവിനിമയ ഉപകരണങ്ങള്, സുരക്ഷാ സംവിധാനങ്ങള് എന്നിവ ഉറപ്പുവരുത്തിയ ശേഷമേ കടലില് ഇറങ്ങാവു എന്നും അധികൃതര് ബന്ധപ്പെട്ടവര്ക്ക് നിര്ദേശം നല്കിയിട്ടുണ്ട്. ട്രോളിംഗ് നിരോധനം അവസാനിക്കുന്നതോടെ 52 ദിവസം പ്രതിസന്ധി നേരിട്ടിരുന്ന മത്സ്യബന്ധന മേഖലയ്ക്ക് പുതിയ ഉണര്വും തീരദേശ സമ്പദ് വ്യവസ്ഥയ്ക്ക് വലിയ ആശ്വാസമാകുമെന്നുമാണ് ഈ മേഖലയിലുള്ളവര് പ്രതീക്ഷ പ്രകടിപ്പിക്കുന്നത്.
Deepika
E-paper LOGIN
LOGIN
