കോളിച്ചാൽ: അബദ്ധത്തിൽ എലിവിഷം ഉള്ളിൽച്ചെന്ന് ഭാര്യ മരിച്ചതിന് പിന്നാലെ ഭർത്താവ് ജീവനൊടുക്കി. കോളിച്ചാൽ മൊട്ടയംകൊച്ചി ഒണിയത്ത് സജീവനെ(55)യാണ് ഇന്നലെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്.
കഴിഞ്ഞ ഫെബ്രുവരി മൂന്നിനാണ് സജീവന്റെ ഭാര്യ ബി.വി. ശോഭന(53)മരിച്ചത്. ജനുവരി 28ന് രാത്രി എലിയെ കൊല്ലാൻ വിഷം വയ്ക്കുന്നതിനിടെ തൊട്ടടുത്തുണ്ടായിരുന്ന ഗ്ലാസിലേക്ക് അല്പം വിഷം തെറിച്ചുവീഴുകയും അല്പനേരത്തിനു ശേഷം അബദ്ധത്തിൽ ആ ഗ്ലാസിലെ വെള്ളം ശോഭന കുടിക്കുകയുമായിരുന്നുവെന്നാണ് പറയുന്നത്.
പിന്നീട് അവശത അവുഭവപ്പെട്ടതോടെയാണ് സംഭവം വീട്ടിലുള്ളവരോട് പറഞ്ഞത്. കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെയാണ് ശോഭന മരിച്ചത്. ഇതിനു ശേഷം സജീവൻ കടുത്ത മാനസിക വിഷമത്തിലായിരുന്നതായി പറയപ്പെടുന്നു. മക്കൾ: സനീഷ്, സചിത്ര. മരുമക്കൾ: ശാന്തി, സനീഷ്.