കോതമംഗലം: സ്ത്രീകളുടെ കുടുംബ ബജറ്റിൽ വലിയ ആശ്വാസം സൃഷ്ടിക്കുന്ന പദ്ധതിയാണ് കെഎസ്ആർടിസി ബസുകളിലെ പ്രിയദർശിനി സൗജന്യയാത്രാ പദ്ധതിയെന്ന് ഷിബു തെക്കുംപുറം എംഎൽഎ പറഞ്ഞു. പ്രതിദിനം ജോലിക്കും വിദ്യാഭ്യാസ ആവശ്യങ്ങൾക്കുമായി യാത്ര ചെയ്യുന്ന അനേകം സ്ത്രീകൾക്ക് പദ്ധതി സാമ്പത്തികമായി വലിയ പിന്തുണയാകും.
കുടുംബ ചെലവുകളിൽ ഗണ്യമായ ലാഭം കൈവരിക്കാൻ ഇത് സഹായിക്കും. പ്രകടനപത്രികയിൽ ഉൾപ്പെടുത്തിയിട്ടുള്ള മറ്റ് ജനക്ഷേമ പദ്ധതികളും യുഡിഎഫ് ഘട്ടംഘട്ടമായി നടപ്പാക്കുമെന്നും അദ്ദേഹം പറഞ്ഞു.
സൗജന്യ യാത്രാ പദ്ധതിയുടെ കോതമംഗലം ഡിപ്പോതല ഉദ്ഘാടനവും ആദ്യ യാത്രയുടെ ഫ്ലാഗ് ഓഫും എംഎൽഎ നിർവഹിച്ചു. കോതമംഗലം ഡിപ്പോയിൽ നിന്ന് 26 റൂട്ടുകളിലാണു സൗജന്യ യാത്രാ പദ്ധതിയുടെ ഭാഗമായി സർവീസുകൾ നടത്തുന്നത്.
മുനിസിപ്പൽ ചെയർപേഴ്സൺ ഭാനുമതി രാജു അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് ജെസി സാജു, ഷമീർ പനക്കൽ, ബാബു ഏലിയാസ്, കെ.പി. ബാബു, ഇബ്രാഹിം കവലയിൽ, മാത്യു ജോസഫ്, പി.കെ. മൊയ്തു, എ.ടി. പൗലോസ്, എം.എസ്. എൽദോസ്, അബു മൊയ്തീൻ, ഷിബു കുര്യാക്കോസ്, പി.എം. സക്കറിയ, പി.സി. ജോർജ്, ബാബു പോൾ, പി.എ.എം. ബഷീർ, സൗമ്യ ശശി, ജോമി തെക്കേക്കര, വിവിധ പഞ്ചായത്ത് പ്രസിഡന്റുമാർ, മുനിസിപ്പൽ കൗൺസിലർമാർ, വാർഡ് അംഗങ്ങൾ, സംഘടനാ നേതാക്കൾ, കോതമംഗലം കെഎസ്ആർടിസി യൂണിറ്റ് ഓഫീസർ ജെ. നിജാമുദീൻ തുടങ്ങിയവർ പ്രസംഗിച്ചു.
മധുരം നൽകി കോൺഗ്രസ് പ്രവർത്തകർ
കോതമംഗലം: വനിതകൾക്കും ട്രാൻസ്ജെൻഡർ വിഭാഗക്കാർക്കുമായി യുഡിഎഫ് സർക്കാർ നടപ്പിലാക്കിയ പ്രിയദർശിനി പദ്ധതിയിൽ ആഹ്ലാദം പ്രകടിപ്പിച്ച് കോഴിപ്പിള്ളിയിൽ ലഡു വിതരണം നടത്തി. വാരപ്പെട്ടി പഞ്ചായത്ത് രണ്ടാം വാർഡിലെ കോൺഗ്രസ് പ്രവർത്തകർ മുള്ളരിങ്ങാട് - കോതമംഗലം കെഎസ്ആർടിസി ബസിലെ യാത്രക്കാർക്കാണ് ലഡു വിതരണം നടത്തിയത്. കോൺഗ്രസ് കവളങ്ങാട് ബ്ലോക്ക് കമ്മിറ്റി അംഗം ഷാജു ലൂക്കോസ് നേതൃത്വം നൽകി. വാരപ്പെട്ടി മണ്ഡലം ജനറൽ സെക്രട്ടറി ഷാനി മാർട്ടിൻ, ഭാരവാഹികളായ സി.കെ. ബേബി, എം.ഡി. ആന്റണി, സേവി ജോസഫ്, എം.വി. ബാബു, പി. പോൾ, ടി.പി. ഇമ്മനുവേൽ ടി.പി. ആന്റണി എന്നിവർ പ്രസംഗിച്ചു.