ഏറ്റവും ഉയരത്തിൽ പറക്കുന്ന ഡ്രോണ്‍... മെയ്ഡ് ഇൻ ചൈന

Wednesday, November 1, 2017 3:03 AM IST

ഡ്രോണ്‍ സങ്കേതികവിദ്യയിൽ അഭിമാനനേട്ടവുമായി ചൈന. ഏറ്റവും ഉയരത്തിൽ പറക്കുന്ന ഡ്രോണുകളുടെ പരീക്ഷണം ചൈന വിജയകരമായി പൂർത്തിയാക്കി. സമുദ്രനിരപ്പിൽനിന്ന് 25 കിലോമീറ്റർ ഉയരത്തിലുള്ള അന്തരീക്ഷമേഖലയിൽ പാറിപ്പറക്കുന്ന ഡ്രോണുകളാണ് ചൈനീസ് ശാസ്ത്രജ്ഞർ വികസിപ്പിച്ചിരിക്കുന്നത്.

ബഹിരാകാശത്തിനടുത്തുള്ള അന്തരീക്ഷ മേഖലയായതിനാൽ "നിയർ സ്പേസ് ഏരിയ' എന്നാണ് ഇവിടം അറിയപ്പെടുന്നത്. തീരെ കനം കുറഞ്ഞ വായുപാളിയും താണ അന്തരീക്ഷ താപനിലയുമുള്ള ഈ മേഖലയിൽ ഡ്രോണുകൾക്ക് പറക്കൽ ഏറെ ദുഷ്കരമാണ്. പല രാജ്യങ്ങളും ഈ മേഖലയിൽ ഡ്രോണുകൾ പറത്താൻ ശ്രമിച്ചിട്ടുണ്ടെങ്കിലും പാതിവഴിയിൽ പ്രവർത്തനരഹിതമായി താഴെ വീഴുകയായിരുന്നു പതിവ്. എന്നാൽ, ചൈന ഇക്കാര്യത്തിൽ വിജയിച്ചുവെന്നാണ് ഏറ്റവും പുതിയ വാർത്ത. പരീക്ഷണങ്ങളുടെ അന്തിമഘട്ടം പൂർത്തിയാകാനുള്ളതിനാൽ ഡ്രോണിന്‍റെ വിവരങ്ങൾ അധികൃതർ പുറത്തുവിട്ടിട്ടില്ല.

സമുദ്രനിരപ്പിൽനിന്ന് 19 കിലോമീറ്റർ ഉയരത്തിൽവരെ പറക്കുന്ന ആർക്യു-4 ആണ് നിലവിൽ ഏറ്റവും ഉയരത്തിൽ പറക്കാൻ കഴിയുന്ന ഡ്രോണ്‍. ചൈനയുടെ സൈനിക ആവശ്യങ്ങൾക്കും ബഹിരാകാശ ഗവേഷണങ്ങൾക്കും ഏറെ പ്രയോജനകരമാണ് പുതിയ ഡ്രോണ്‍വിദ്യ എന്നാണ് വിലയിരുത്തൽ.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.