മലയാള സിനിമയ്ക്കൊരു പുതിയ നസ്രിയ : Cinema News

മലയാളത്തിലും തമിഴിലുമൊക്കെ ഒരുപോലെ തിളങ്ങിനിൽക്കുന്പോഴാണ് നസ്രിയ നസിം ഫഹദ് ഫാസിലിനെ കല്യാണം കഴിച്ച് ആ ഫീൽഡ്തന്നെ വിടുന്നത്. അന്നുമുതൽ നസ്രിയ തിരിച്ച് എന്ന് അഭിനയിക്കാനെത്തും എന്ന അന്വേഷണത്തിലാണ് ആരാധകർ. നസ്രിയയുടെ കുസൃതി നിറഞ്ഞ അഭിനയം മലയാളികൾ ശരിക്കും മിസ് ചെയ്തു തുടങ്ങിയപ്പോൾ രൂപംകൊണ്ടുപോലും നസ്രിയയോട് സാദൃശ്യമുള്ള ഒരു നായിക എത്തിയിരിക്കുന്നു.

ഡബ്സ്മാഷിലൂടെ ശ്രദ്ധിക്കപ്പെട്ട വർഷ ബൊല്ലമ്മ എന്ന തമിഴ്നാട്ടുകാരിയാണ് മലയാള സിനിമയിൽ അരങ്ങേറ്റം കുറിക്കാൻ ഒരുങ്ങുന്നത്. ഒറ്റ നോട്ടത്തിൽ നസ്രിയയാണെന്നേ ആരും പറയൂ. ഷൂട്ടിംഗ് ലൊക്കേഷനുകളിലൊക്കെ പലരും നസ്രിയ എന്നാണ് വിളിക്കുന്നത്. ആദ്യമൊക്കെ ഞാൻ നസ്രിയ അല്ല എന്ന് വർഷ പറയുമായിരുന്നു. എന്നാൽ ഇപ്പോൾ അതിനും ശ്രമിക്കാറില്ല.

പുതിയ നസ്രിയ എന്ന പേരിൽ വർഷയുടെ ഡബ്സ്മാഷുകൾ നേരത്തെ സമൂഹമാധ്യമങ്ങളിൽ വെെറലായിരുന്നു. നസ്രിയയുടെ ഡബ്സ്മാഷ് എന്ന പേരിലായിരുന്നു അവയിൽ പലതും പ്രചരിച്ചിരുന്നത്. നസ്രിയയുടെ അതേ കണ്ണുകൾ. മുഖത്ത് അതേ കുസൃതിഭാവം- ഇവയൊക്കെകൊണ്ട് മലയാളികളുടെ മനസിൽ ഇടംപിടിച്ചുകഴിഞ്ഞു വർഷ. എന്നാൽ താനും നസ്രിയയുമായി യാതൊരു സാമ്യവുമില്ലെന്നാണ് വർഷ പറയുന്നത്. തന്‍റെ അഭിനയം കാണുന്പോൾ അത് പ്രേക്ഷകർക്ക് മനസിലാകുമെന്നും താരം പറയുന്നു.

രാജേഷ് നായർ സംവിധാനം ചെയ്യുന്ന കല്യാണം എന്ന ചിത്രത്തിലൂടെയാണ് വർഷ മലയാളത്തിലെത്തുന്നത്. ശാരി എന്നാണ് കഥാപാത്രത്തിന്‍റെ പേര്. മുകേഷിന്‍റെ മകൻ ശ്രാവണാണ് ചിത്രത്തിലെ നായകൻ. ആദ്യ മലയാള ചിത്രം പുറത്തുവരുന്നതിനുമുന്പുതന്നെ ആസിഫ് അലി നായകനാകുന്ന ചിത്രത്തിലും വർഷയ്ക്ക് അവസരം ലഭിച്ചുകഴിഞ്ഞു. കല്യാണത്തിന്‍റെ ഷൂട്ടിംഗ് കഴിഞ്ഞാലുടൻ ആസിഫിന്‍റെ നായികയാകാൻ വർഷ എത്തും.