എസ്എംഇ പാരാമെഡിക്കൽ കോഴ്സുകൾക്ക് അഫിലിയേഷനില്ല
തൃശൂർ: മഹാത്മാഗാന്ധി സർവകലാശാലയുടെ കീഴിലുള്ള സ്കൂൾ ഓഫ് മെഡിക്കൽ എഡ്യൂക്കേഷനിലെ അടുത്ത അധ്യയനവർഷം മുതലുള്ള പ്രവേശനം ആരോഗ്യ സർവകലാശാലയിലൂടെ ആയിരിക്കുമെന്ന പത്രവാർത്ത ശ്രദ്ധയിൽപ്പെട്ടതായും, എസ്എംഇയുടെ കീഴിലുള്ള പാരാമെഡിക്കൽ കോഴ്സുകൾ ഇപ്പോൾ ആരോഗ്യസർവകലാശാലയിൽ അഫിലിയേറ്റ് ചെയ്തിട്ടുള്ളതല്ലെന്നും അധികൃതർ പത്രക്കുറിപ്പിൽ അറിയിച്ചു. അതിനാൽ അവിടത്തെ കുട്ടികൾക്ക് ആരോഗ്യസർവകലാശാല വഴി പ്രവേശനം നടത്തുന്നതിനോ, ആരോഗ്യ സർവകലാശാലയിൽനിന്നു സർട്ടിഫിക്കറ്റ് ലഭിക്കുന്നതിനോ കഴിയുന്നതല്ല.
ഈ കോഴ്സുകൾ ആരോഗ്യ സർവകലാശാലയിൽ അഫിലിയേറ്റ് ചെയ്യുന്നെങ്കിൽ മാത്രമേ ആരോഗ്യ സർവകലാശാലയ്ക്കു സർട്ടിഫിക്കറ്റ് നൽകാൻ കഴിയുകയുള്ളൂ. ഇപ്പോൾ അവിടെ പഠിച്ചുകൊണ്ടിരിക്കുന്ന വിദ്യാർഥികൾക്ക് അർഹതാ സർട്ടിഫിക്കറ്റും തുല്യതാ സർട്ടിഫിക്കറ്റും നൽകുന്ന കാര്യം ഈമാസം 22ന് കൂടുന്ന അക്കാദമിക് കൗണ്സിലും തുടർന്നുനടക്കുന്ന ഗവേണിംഗ് കൗണ്സിലും പരിഗണിക്കാനിരിക്കുന്നതേയുള്ളൂ എന്നും പത്രക്കുറിപ്പിൽ വ്യക്തമാക്കി.