അന്താരാഷ്ട്ര യൂണിവേഴ്സിറ്റി ഡിബേറ്റ്: പരിശീലനം തുടങ്ങി
തേഞ്ഞിപ്പലം: ഏപ്രിൽ എട്ട് മുതൽ 12 വരെ ഖത്തറിൽ നടക്കുന്ന നാലാം ഖത്തർ അന്താരാഷ്ട്ര യൂണിവേഴ്സിറ്റി ബിരുദ വിദ്യാർഥി ഡിബേറ്റിൽ പങ്കെടുക്കുന്നവർക്ക് കാലിക്കട്ട് സർവകലാശാലയിൽ പരിശീലനം ആരംഭിച്ചു. ഇന്നത്തെ സംവാദകർ നാളത്തെ നേതാക്കൾ എന്ന ആശയത്തിൽ ഖത്തർ ഫൗണ്ടേഷനാണ് കഴിഞ്ഞ ഒരു ദശാബ്ദമായി ഈ പരിപാടി സംഘടിപ്പിച്ചു വരുന്നത്. പങ്കെടുക്കുന്ന രാജ്യങ്ങളുടെ പ്രതിനിധികൾക്ക് ഖത്തർ ഫൗണ്ടേഷൻ ആസ്ഥാനത്തുള്ള ഡിബേറ്റ് അക്കാദമിയിൽ പരിശീലനം നൽകാറുണ്ട്. ഈ വർഷം ഇന്ത്യൻ സർവകലാശാലയിൽ നിന്നും ഖത്തർ ഡിബേറ്റിനു പരിശീലനം ലഭിച്ച ഏക വ്യക്തി കാലിക്കട്ട് സർവകലാശാലാ അറബി വിഭാഗം മേധാവി ഡോ. എ.ബി. മൊയ്തീൻകുട്ടിയായിരുന്നു.
തെരഞ്ഞെടുത്ത വിദ്യാർഥികൾക്കുള്ള പരിശീലനമാണ് കാലിക്കട്ട് സർവകലാശാലയിൽ ആരംഭിച്ചിട്ടുള്ളത്. സർവകലശാലാതല തെരഞ്ഞെടുപ്പിന് ശേഷം ഖത്തർ ഫൗണ്ടേഷൻ പരിശീലകരുടെ ടെലിഫോണ് അഭിമുഖം കൂടി നടത്തിയാണ് അലി പറങ്കോടത്ത്, മുഹമ്മദ് അനീസുദ്ധീൻ, മുഹമ്മദ് റിയാസ്, മുഹമ്മദ് ഉവൈസ് എന്നീ വിദ്യാർഥിളെ തെരഞ്ഞെടുത്തത്.
ഖത്തർ ഡിബേറ്റ് പരിശീലനത്തിൽ പങ്കെടുക്കാൻ ചൈന, ജപ്പാൻ, അമേരിക്ക, ഇംഗ്ലണ്ട്, റഷ്യ, ജർമ്മനി മുതലായ അറുപതോളം രാജ്യങ്ങളുടെ പ്രതിനിധികളുണ്ടായിരുന്നുവെന്ന് ഡോ.എ.ബി. മോയ്തീൻകുട്ടി അറിയിച്ചു.