ജെഎൻയു: കംബൈൻഡ് ബയോടെക്നോളജി എൻട്രൻസ് എക്സാമിനേഷൻ മേയ് 19ന്
ന്യൂഡൽഹി ജവഹർലാൽ നെഹ്റു യൂണിവേഴ്സിറ്റിയുടെ (ജെഎൻയു) ദേശീയതലത്തിലുള്ള ബയോടെക്നോളജി പ്രവേശന പരീക്ഷ കംബൈൻഡ് ബയോ ടെക്നോളജി എൻട്രൻസ് എക്സാമിനേഷൻ (സിബിഇഇ) മേയ് 19നു നടത്തും. തിരുവനന്തപുരം, കോഴിക്കോട്, കോയന്പത്തൂർ, മധുര, ചെന്നൈ, ഗോവ, പുതുച്ചേരി, വിശാഖപണം, മുംബൈ, ഡൽഹി തുടങ്ങി രാജ്യത്തെ 52 നഗരങ്ങളിലാണു പരീക്ഷ. ഏപ്രിൽ അഞ്ചു വരെ അപേക്ഷിക്കാം.
ഈ സംയുക്ത പ്രവേശനപരീക്ഷയുടെ മാർക്കിന്റെ അടിസ്ഥാനത്തിൽ രാജ്യത്തെ അന്പതോളം സർവകലാശാലകൾ, സ്ഥാപനങ്ങൾ നടത്തുന്ന എംഎസ്സി ബയോടെക്നോളജി, എംഎസ്സി അഗ്രികൾച്ചറൽ ബയോടെക്നോളജി, എംവിഎസ്സി ബയോടെക്നോളജി, എംടെക് ബയോടെക്നോളജി പ്രോഗ്രാമുകളിൽ പ്രവേശനം ലഭിക്കും. കേരള കാർഷിക സർവകലാശാലയിലെയും കാലിക്കട്ട് സർവകലാശാലയിലെയും എംഎസ്സി ബയോടെക്നോളജി കോഴ്സുകളിലേക്കും കൊച്ചി ശാസ്ത്ര സാങ്കേതിക സർവകലാശാലയിലെ എംടെക് മറൈൻ ബയോടെക്നോളജി കോഴ്സിലേക്കും ഈ പ്രവേശന പരീക്ഷയിലൂടെയാണ് അഡ്മിഷൻ.
എംഎസ്സി ബയോടെക്നോളജി യോഗ്യത: ഫിസിക്കൽ, ബയോളജിക്കൽ, അഗ്രികൾച്ചറൽ, വെറ്ററിനറി ആൻഡ് ഫിഷറി സയൻസ്, ഫാർമസി, എൻജിനിയറിംഗ് ടെക്നോളജി വിഷയങ്ങളിലൊന്നിൽ 55 ശതമാനത്തിൽ കുറയാതെ ബാച്ചിലേഴ്സ് ഡിഗ്രി അല്ലെങ്കിൽ ബിഎസ് (ഫിസിഷ്യൻ അസിസ്റ്റന്റ്) ബിരുദം അല്ലെങ്കിൽ എംബിബിഎസ്/ബിഡിഎസ് ബിരുദം 55 ശതമാനം മാർക്കിൽ കുറയാതെ നേടി വിജയിച്ചിരിക്കണം.
എംഎസ്സി അഗ്രി. ബയോടെക്നോളജി/ എംവിഎസ്സി ബയോടെക്നോളജി യോഗ്യത: 55 ശതമാനം മാർക്കിൽ കുറയാതെ ബിഎസ്സി അഗ്രികൾച്ചർ, ഫോറസ്ട്രി, ബയോടെക്നോളജി, ബിവിഎസ്സി ആൻഡ് എഎച്ച് തുടങ്ങിയ യോഗ്യതയുള്ളവർക്ക് അപേക്ഷിക്കാം.
എംടെക് ബയോടെക്നോളജി യോഗ്യത: 60 ശതമാനം മാർക്കിൽ കുറയാതെ കെമിക്കൽ എൻജിനിയറിംഗ്/ബയോകെമിക്കൽ ഇൻഡ്സട്രിയൽ ബയോടെക്നോളജി/ ലതർ ടെക്നോളജി/ബയോടെക്നോളജി/ബയോമെഡിക്കൽ എൻജിനിയറിംഗ്/ബയോകെമിസ്ട്രി/ബയോ എൻജിനിയറിംഗ്/ ഫാർമസ്യൂട്ടിക്കൽ ടെക്നോളജി/ ഫുഡ് ടെക്നോളജി ബ്രാഞ്ചുകളിലൊന്നിൽ ബിഇ/ബിടെക് ബിരുദം അല്ലെങ്കിൽ കെമിസ്ട്രി, ഫിസിക്സ് ബയോഎൻജിനിയറിംഗ്/ മറൈൻ ബയോടെക്നോളജി/മറൈൻ ബയോളജി/അക്വാിക് ബയോളജി ആൻഡ് ഫിഷറീസ്/ എൻവയണ്മെന്റൽ ബയോടെക്നോളജി വിഷയങ്ങളിൽ 60 ശതമാനം മാർക്കിൽ കുറയാതെ എംഎസ്സി ഉള്ളവർക്ക് അപേക്ഷിക്കാം.
അപേക്ഷാ ഫീസ് 1,000 രൂപ. സംവരണ വിഭാഗങ്ങൾക്ക് 500 രൂപ.
മുംബൈയിലെ ഇൻസ്റ്റിറ്റ്യൂട്ട് ഓഫ് കെമിക്കൽ ടെക്നോളജിയിൽ ബയോ പ്രോസസ് ടെക്നോളജി, ഫുഡ് ടെക്നോളജി, ഫാർമസ്യൂട്ടിക്കൽ ബയോ ടെക്നോളജി എന്നിവയിൽ എംടെക് കോഴ്സ് പ്രവേശനവും സിബിഇഇയുടെ അടിസ്ഥാനത്തിലാണ്.
വിശദവിവരങ്ങൾ www.jn u.ac.in വെബ്സൈറ്റിൽ ലഭിക്കും. ഫോൺ:+911126742676, 26742575, 26741557.