നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജി (എൻഐഎഫ്ടി) യുടെ കണ്ണൂർ ഉൾപ്പടെയുള്ള 15 സെന്ററുകളിൽ നടത്തുന്ന വിവിധ കോഴ്സുകളിലേക്ക് ഇപ്പോൾ അപേക്ഷിക്കാം. ഡിസൈൻ, മാനേജ്മെന്റ്, ടെക്നോളജി എന്നിവയിൽ വിവിധ കോഴ്സുകളാണ് എൻഐഎഫ്ടി നടത്തുന്നത്.
അക്സസറി ഡിസൈൻ, ഫാഷൻ കമ്യൂണിക്കേഷൻ, ഫാഷൻ ഡിസൈൻ, നിറ്റ്വെയർ ഡിസൈൻ, ലെതർ ഡിസൈൻ, ടെക്സ്റ്റൈൽ ഡിസൈൻ, അപ്പാരൽ പ്രൊഡക്ഷൻ എന്നിവയിൽ ബിരുദ കോഴ്സുകളിലേക്കും ഡിസൈൻ, ഫാഷൻ മാനേജ്മെന്റ്, ഫാഷൻ ടെക്നോളജി എന്നിവയിൽ പിജി കോഴ്സുകളിലേക്കുമാണ് അപേക്ഷ ക്ഷണിച്ചിരിക്കുന്നത്. ന്യൂയോർക്കിലെ ഫാഷൻ ഇൻസ്റ്റിറ്റ്യൂട്ട് ഓഫ് ടെക്നോളജി (എഫ്ഐടി) യുമായി ഉണ്ടാക്കിയ കരാർ അനുസരിച്ച് മിടുക്കരായ വിദ്യാർഥികൾക്ക് അമേരിക്കയിൽ നിന്ന് ഇരട്ട ബിരുദം നേടുന്നതിനും സൗകര്യമുണ്ട്.
ബാച്ചിലർ പ്രോഗ്രാമുകൾക്ക് പ്ലസ്ടുവാണ് അപേക്ഷിക്കാനുള്ള യോഗ്യത. അപ്പാരൽ പ്രൊഡക്ഷൻ കോഴ്സിന് അപേക്ഷിക്കുന്നവർ ഫിസിക്സ്, കെമിസ്ട്രി, മാത്തമാറ്റിക്സ് പഠിച്ച് പ്ലസ് ടു പാസായവരായിരിക്കണം. നാലു വർഷമാണു ബാച്ചിലർ പ്രോഗ്രാമുകളുടെ കാലദൈർഘ്യം. ഡിസൈനിലും മാനേജ്മെന്റിലും മാസ്റ്റർ പ്രോഗ്രാമിന് ബിരുദധാരികൾക്ക് അപേക്ഷിക്കാം. മാസ്റ്റർ ഓഫ് ഫാഷൻ ടെക്നോളജിക്ക് ബിടെക്കാണ് യോഗ്യത. മാസ്റ്റേഴ്സ് പ്രോഗ്രാമുകൾ രണ്ടു വർഷമാണ്.
ഓണ്ലൈനായി ഡിസംബർ 29 വരെ അപേക്ഷിക്കാം. അപേക്ഷാ ഫീസായ 1500 രൂപയ്ക്കു ( പട്ടിക ജാതിവർഗക്കാർക്ക് 750 രൂപ) പുറമേ 5000 രൂപ ലേറ്റ് ഫീസോടെ ജനുവരി രണ്ടു വരെയാണ് അപേക്ഷിക്കാവുന്നത്. ജനുവരി 21നാണ് പ്രവേശന പരീക്ഷ. ഏപ്രിൽ, മെയ് മാസങ്ങളിലായി ഗ്രൂപ് ഡിസ്കഷനും ഇന്റർവ്യുവും നടക്കും. ജനറൽ എബിലിറ്റി ടെസ്റ്റ് (ജിഎടി), ക്രിയേറ്റീവ് എബിലിറ്റി ടെസ്റ്റ് (ക്യാറ്റ്) എന്നീ രണ്ടു ഘട്ടങ്ങളായാണു പ്രവേശന പരീക്ഷ. ഇതു രാവിലെയും ഉച്ചയ്ക്കുമായി ക്രമീകരിച്ചിരിക്കുന്നു.
ക്വാണ്ടിറ്റേറ്റീവ് എബിലിറ്റി, കമ്യൂണിക്കേറ്റീവ് എബിലിറ്റി, ഇംഗ്ലീഷ് കോംപ്രിഹെൻഷൻ, അനലിറ്റിക്കൽ എബിലിറ്റി, ജനറൽ നോളജ് ആൻഡ് കറൻറ് അഫയേഴ്സ് എന്നിവയാണു ജിഎടിയിൽ ഉൾപ്പെടുത്തിയിരിക്കുന്നത്. വർണവും വരകളും ചേർത്ത് സർഗാത്മക സൃഷ്ടി നടത്താനുള്ള കഴിവാണ് സിഎടിയിൽ പരീക്ഷിക്കുന്നത്. മാതൃകാ ചോദ്യ പേപ്പർ വെബ്സൈറ്റിലുണ്ട്.
ബാച്ചിലർ പ്രോഗ്രാമിനുള്ള പ്രായ പരിധി 2017ന് ഒക്ടോബർ ഒന്നിന് 23 വയ്സ്. മാസ്റ്റേഴ്സ് പ്രോഗ്രാമിനു പ്രായപരിധിയില്ല. www.nift.ac.in , https://applyadmission.net/NIFTNRI2018 എന്ന വെബ്സൈറ്റു വഴി വേണം അപേക്ഷിക്കാൻ. വെബ് സൈറ്റിൽ നിന്നു പ്രോസ്പെക്ടസ് ഡൗണ്ലോഡ് ചെയ്തെടുക്കാം.പ്രവേശ പരീക്ഷയ്ക്ക് കൊച്ചിയും കണ്ണൂരുമാണു കേരളത്തിലെ കേന്ദ്രങ്ങൾ.
കണ്ണൂരിൽ ഫാഷൻ ഡിസൈൻ (30 സീറ്റ്), ടെക്സ്റ്റൈൽ ഡിസൈൻ (30 സീറ്റ്), നിറ്റ്വെയർ ഡിസൈൻ (30 സീറ്റ്), ഫാഷൻ കമ്യൂണിക്കേഷൻ (30 സീറ്റ്), അപ്പാരൽ പ്രൊഡക്ഷൻ (30 സീറ്റ്), മാസ്റ്റർ ഓഫ് ഡിസൈൻ (30 സീറ്റ്), മാസ്റ്റർ ഓഫ് ഫാഷൻ മാനേജ്മെന്റ് (30 സീറ്റ്) കോഴ്സുകളാണുള്ളത്. ബംഗളൂരു,ഭോപ്പാൽ, ചെന്നൈ, ഗാന്ധിനഗർ, ഹൈദരാബാദ്, കോൽക്കത്ത, മുംബൈ, ന്യൂഡൽഹി, പാറ്റന, റായിബറേലി, ഷില്ലോംഗ്, കാംഗ്ര, ജോധ്പൂർ, ഭുവനേശ്വർ എന്നിവിടങ്ങളിലാണ് മറ്റ് എൻഐഐഎഫ്ടി സെൻററുകൾ.
കണ്ണൂർ കേന്ദ്രത്തിന്റെ വിലാസവും ഫോണ് നന്പരും ഇമെയിൽ ഐഡിയും ഡയറക്ടർ, നാഷണൽ ഇൻസ്റ്റിറ്റ്യൂട്ട് ഓഫ് ഫാഷൻ ടെക്നോളജി, നിഫ്റ്റ് കാന്പസ്, ധർമശാല, മങ്ങാട്ടുപറന്പ്, കണ്ണൂർ670 564.
ഫോണ് : 0497 2784781, (011) 24608500. ഇമെയിൽ: kannurn
[email protected]. കോഴ്സിനെക്കുറിച്ചും ഇൻസ്റ്റിറ്റ്യൂട്ടിനെക്കുറിച്ചും വിദ്യാർഥികൾക്കും രക്ഷകർത്താക്കൾക്കും അവബോധം സൃഷ്ടിക്കുന്നതിന് ഓപ്പണ് ഹൗസ് എല്ലാ നിഫ്റ്റ് സെന്ററുകളിലും നടത്തുന്നുണ്ട്.