മൂന്നു സർവകലാശാല വിസിമാരുടെ നിയമനം അസാധുവാക്കാൻ ഗവർണർ : Deepika.com Kerala News |

Click here for detailed news of all items

മൂന്നു സർവകലാശാല വിസിമാരുടെ നിയമനം അസാധുവാക്കാൻ ഗവർണർ

Monday, April 29, 2024 12:39 AM IST

തിരുവനന്തപുരം: സംസ്ഥാനത്തെ വെറ്ററിനറി, ഡിജിറ്റൽ, ഓപ്പണ്‍ സർവകലാശാലകളിലെ വൈസ് ചാൻസലർമാരുടെ നിയമനം അസാധുവാക്കുന്നതിന് ചാൻസലർ കൂടിയായ ഗവർണർ ആരിഫ് മുഹമ്മദ് ഖാൻ നടപടി സ്വീകരിച്ചേക്കും. ഗവർണർ ആരിഫ് മുഹമ്മദ്ഖാൻ മേയ് ഒന്നിനു തിരുവനന്തപുരത്തു മടങ്ങിയെത്തിയ ശേഷമാകും നടപടി സ്വീകരിക്കുക.

ഇതിനു മുന്നോടിയായി വെറ്ററിനറി സർവകലാശാലയിലെ സസ്പെൻഷനിലായ വൈസ് ചാൻസലർക്ക് കാരണം കാണിക്കൽ നോട്ടീസ് നൽകാൻ രാജ്ഭവൻ നടപടി തുടങ്ങി.

സസ്പെൻഷനിലായയ വൈസ് ചാൻസലർ ഡോ.എം.ആർ.ശശീന്ദ്രനാഥിനെ തെരഞ്ഞെടുത്ത സേർച് കമ്മിറ്റിയിൽ യുജിസി പ്രതിനിധി ഇല്ലായിരുന്നുവെന്നതു ഗുരുതര വീഴ്ചയാണ്. ഈ സാഹചര്യത്തിൽ ഇദ്ദേഹത്തിന്‍റെ നിയമനം അസാധുവാക്കുന്നതിനു മുന്നോടിയായി കാരണം കാണിക്കൽ നോട്ടിസ് നൽകണമെന്നാണ് യുജിസിയിൽ നിന്നും നിയമവിദഗ്ധരിൽ നിന്നും ഗവർണർക്ക് ലഭിച്ച ഉപദേശം. തുടർന്ന് ഹിയറിംഗ് നടത്തി തുടർ നടപടികളിലേക്ക് കടക്കും.

ഡിജിറ്റൽ സർവകലാശാലാ വൈസ് ചാൻസലർ ഡോ.സജി ഗോപിനാഥ്, ശ്രീനാരായണ ഗുരു ഓപ്പണ്‍ സർവകലാശാലാ മുൻ വൈസ് ചാൻസലർ ഡോ.പി.എം.മുബാറക് പാഷ എന്നിവരെ സർക്കാർ നേരിട്ടു നിയമിച്ചതാണ്. പുതിയ സർവകലാശാലകൾക്ക് യുജിസി അംഗീകാരം ലഭിച്ചു കഴിഞ്ഞാൽ യുജിസി മാനദണ്ഡം അനുസരിച്ച് സേർച്ച് കമ്മിറ്റി രൂപീകരിച്ച് വിസിയെ നിയമിക്കണമെന്നാണ് ചട്ടം. ഇവരുടെ നിയമനം യുജിസി ചട്ടം അനുസരിച്ചല്ലെന്നു വ്യക്തമായ സാഹചര്യത്തിലാണ് കാരണം കാണിക്കൽ നോട്ടീസ് അയച്ച് ഹിയറിംഗ് നടത്തിയത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.