മോഷ്ടാക്കൾ വിഷം കുത്തിവച്ച് കോൺസ്റ്റബിളിനെ കൊലപ്പെടുത്തി : Deepika.com National News |

Click here for detailed news of all items

മോഷ്ടാക്കൾ വിഷം കുത്തിവച്ച് കോൺസ്റ്റബിളിനെ കൊലപ്പെടുത്തി

Friday, May 3, 2024 4:31 AM IST

മുംബൈ: മഹാരാഷ്‌ട്രയിൽ മോഷ്ടാക്കൾ പോലീസ് കോൺസ്റ്റബിളിനെ വിഷം കുത്തിവച്ച് കൊലപ്പെടുത്തി. താനെ സ്വദേശിയായ വിശാൽ പവാർ (30) ആണ് ആശുപത്രിയിൽ ചികിത്സയ്ക്കിടെ മരിച്ചത്.

ഫോൺ തട്ടിയെടുക്കാൻ ശ്രമിച്ചതു തടയുന്നതിനിടെയാണ് മോഷ്ടാക്കൾ റെയിൽവേ ട്രാക്കിൽവച്ച് വിശാലിനു വിഷം കുത്തിവച്ചത്. ഏപ്രിൽ 28നായിരുന്നു സംഭവം. താനെയിലെ ആശുപത്രിയിൽ പ്രവേശിപ്പിച്ച വിശാൽ ബുധനാഴ്ച മരിച്ചു.

ട്രെയിൻ യാത്രയ്ക്കിടെയായിരുന്നു മോഷ്ടാക്കൾ വിശാലിന്‍റെ ഫോൺ തട്ടിയെടുക്കാൻ ശ്രമിച്ചത്. വാതിലിനോടു ചേർന്നുനിന്ന് വിശാൽ ഫോണിൽ സംസാരിക്കുകയായിരുന്നു. സയൺ, മാട്ടുംഗ സ്റ്റേഷനുകൾക്കു മധ്യേ ട്രെയിൻ വേഗം കുറച്ചപ്പോൾ, ട്രാക്കിലുണ്ടായിരുന്ന അക്രമികൾ വിശാലിന്‍റെ കൈക്ക് അടിച്ചു.

തുടർന്ന് ഫോൺ ട്രാക്കിലേക്കു വീണു. മോഷ്ടാക്കൾ ഫോണുമായി ട്രാക്കിലൂടെ ഓടി. ട്രെയിനിന്‍റെ വേഗം കുറഞ്ഞപ്പോൾ വിശാൽ ചാടിയിറങ്ങി മോഷ്ടാക്കളുടെ പുറകെ ഓടി. കുറേ ദൂരം പിന്നിട്ടപ്പോൾ മയക്കുമരുന്നിനടിമകളായ ഒരു സംഘം വിശാലിനെ വളഞ്ഞ് ആക്രമിച്ചു.

ഇതിനിടെ ഒരു അക്രമി വിശാലിനു വിഷം കുത്തിവച്ചു. ചുവപ്പുനിറമുള്ള ഒരു ദ്രാവകം അക്രമികൾ വിശാലിന്‍റെ മുഖത്ത് ഒഴിക്കുകയും ചെയ്തു. തുടർന്ന് വിശാൽ അബോധാവസ്ഥയിലായി. പിറ്റേന്ന് രാവിലെ ബോധം തെളിഞ്ഞ വിശാൽ വീട്ടിലെത്തിയെങ്കിലും സ്ഥിതി വഷളായി. തുടർന്ന് താനെയിലെ ആശുപത്രിയിൽ പ്രവേശിക്കുകയായിരുന്നു.

പോലീസ് സംഘം ഇദ്ദേഹത്തിന്‍റെ മൊഴി രേഖപ്പെടുത്തുകയും അക്രമികൾക്കെതിരേ കേസെടുക്കുകയും ചെയ്തു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.