"ജീവനൊടുക്കും'എന്ന് ഡോ.ഷഹനയുടെ അവസാന സന്ദേശം; എന്നിട്ടും നമ്പര്‍ ബ്ലോക്ക് ചെയ്തു റുവൈസ് |

Click here for detailed news of all items

"ജീവനൊടുക്കും'എന്ന് ഡോ.ഷഹനയുടെ അവസാന സന്ദേശം; എന്നിട്ടും നമ്പര്‍ ബ്ലോക്ക് ചെയ്തു റുവൈസ്

Friday, December 8, 2023 2:06 PM IST

തിരുവനന്തപുരം: തിരുവനന്തപുരം മെഡിക്കല്‍ കോളജിലെ പിജി വിദ്യാര്‍ഥിനി ഡോ.ഷഹന ജീവനൊടുക്കിയ സംഭവത്തില്‍ കൂടുതല്‍ വിവരങ്ങള്‍ പുറത്തുവിട്ട് പോലീസ്. താന്‍ ജീവനൊടുക്കുകയാണെന്ന കാര്യം ഷഹ്ന വാട്‌സ് ആപ്പ് സന്ദേശത്തിലൂടെ ഡോ. റുവൈസിനെ അറിയിച്ചിരുന്നു. എന്നാല്‍ മെസേജ് കിട്ടിയതോടെ ഇയാള്‍ ഷഹ്നയെ ബ്ലോക്ക് ചെയ്യുകയാണുണ്ടായത്.

പോലീസ് അറസ്റ്റ് ചെയ്യുന്നതിന് തൊട്ടുമുമ്പ് റുവൈസ് ഈ സന്ദേശം ഡിലീറ്റ് ചെയ്തിരുന്നു. എന്നാല്‍ ഷഹനയുടെ ഫോണില്‍ നിന്നും മെസേജിന്‍റെ വിവരങ്ങള്‍ പോലീസിന് ലഭിച്ചു. റുവൈസിന്‍റെ ഫോണിലെ സന്ദേശങ്ങള്‍ വീണ്ടെടുക്കാന്‍ സൈബര്‍ പരിശോധനയക്ക് അയയ്ച്ചിട്ടുണ്ട്.

തിങ്കളാഴ്ച രാവിലെ ഒമ്പതിനായിരുന്നു ഷഹന സന്ദേശം അയച്ചത്. അന്ന് രാത്രിയാണ് ഷഹനയെ അബോധാവസ്ഥയില്‍ ഫ്‌ളാറ്റില്‍ കണ്ടെത്തുന്നത്.

ഡോ.ഷഹനയുടെ മരണത്തിന് ഉത്തരവാദി റുവൈസാണെന്നാണ് എഫ്ഐആറിലുളളത്. സ്ത്രീധനത്തിന്‍റെ പേരില്‍ വിവാഹ ബന്ധത്തില്‍ നിന്നും റുവൈസ് പിന്‍മാറിയതാണ് ഷഹനയുടെ ആത്മഹത്യയ്ക്ക് ഇടയാക്കിയത്.

പ്രതിയെ കഴിഞ്ഞദിവസം റിമാന്‍ഡ് ചെയ്തിരുന്നു. ഒളിവിലായിരുന്ന ഇയാളെ വ്യാഴാഴ്ച പുലര്‍ച്ചെ കരുനാഗപ്പള്ളിയില്‍ നിന്നും തിരുവനന്തപുരം മെഡിക്കല്‍ കോളജ് പോലീസ് ആണ് കസ്റ്റഡിയിലെടുത്തത്.

കേസിൽ കുറ്റപത്രം സമയബന്ധിതമായി നല്‍കാനാണ് പോലിസിന്‍റെ തീരുമാനം. ഇതിനായി തെളിവെടുപ്പുകള്‍ക്കായി റൂവൈസിനെ കസ്റ്റഡിയില്‍ വാങ്ങും.

അതേസമയം, ഡോ.ഷഹനയുടെ മരണവുമായി ബന്ധപ്പെട്ട് കൂടുതല്‍പേര്‍ പ്രതികളാകും. കേസില്‍ അറസ്റ്റിലായ റുവൈസിന്‍റെ ബന്ധുക്കളെ പ്രതിചേര്‍ക്കാനാണ് പോലീസ് തീരുമാനം.

ബന്ധുക്കള്‍ സ്ത്രീധന തുക ചോദിക്കുകയും സമ്മര്‍ദം ചെലത്തുകയും ചെയ്തുവെന്ന് ഷഹനയുടെ അമ്മ മൊഴി നല്‍കിയിരുന്നു. ഇതിന്‍റെ അടിസ്ഥാനത്തില്‍ റുവൈസിന്‍റെ ബന്ധുക്കളെ ചോദ്യംചെയ്യും.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.